<p align="justify">६ बैशाख, काठमाडौं । मागी गुम्बा समिति बाराले यही बैशाख १० देखि १२ गतेसम्म राजधानीको बौद्धमा विश्व शान्ति पूजाको आयोजना गर्ने भएको छ । <br>रिपोर्टर्स क्लब नेपालमा मागी गुम्बा समितिले बिहीबार पत्रकार सम्मेलन गरेर रौतहटको चन्द्रनिगाहपुरमा नेपालकै अग्लो १३२ फिट अग्लो बौद्ध स्तुपा निमाणार्थ विश्व शान्ति पूजाको आयोजना गर्न लागेको जानकारी दिएको हो । <br>आदिबासी जनजाति अभियन्ता एवम् पत्रकार सम्मेलनका प्रमुख अथिति कृष्ण कुमार ग्लानले व्यक्तिवादी सोचको अन्त्य गर्नुनै बुद्ध धर्मको मूल मर्म रहेको दाबी गरेका छन् । <br>उनले जातीय विभेदलाई समानतामा बदल्नु आजको आवश्यकता रहेको बताउँदै भने,‘बुद्धको ज्ञान र शिक्षाले पनि यही भन्छ, व्यक्तिवादी स्वार्थ र आफूमात्रै बन्नु भन्ने भावनाको अन्त्य गर्नु बुद्धको मूख्य ध्येय थियो, हाम्रो देशमा पीडितहरुको नाममा अरुले सुविधा लिईरहेका हुन्छन् यो गलत हो ।’<br>उनले अघि थपे,‘आयोजक संस्था जुन काम गर्दैछ, यो सत्कर्मको लागि होस्, आर्थिक पारदर्शीता होस्, बुद्धको नाममा कसैलेपनि बेईमानी नगरोस्, हाम्रो मुलुक समाजवादको अभ्यासमा पसिसकेको हुनाले सबै मानिसहरुले समान सोच र सामान व्यवहार गर्नुपर्छ भन्नेमा आफूलाई उभ्याउनुपर्छ।’<br>त्यस्तै धर्मगूरु कर्मा गुम्चेन लामाले बुद्ध जन्मेको देश नेपालमा हिँसाका घट्नाहरु घट्नु दुःखद् भएको टिप्पणी गरेका छन् । <br>उनले भने,‘आजका दिनमा हाम्रो मुलुकमा धेरै प्रकारका हिँसाका घट्नाहरु घटिरहेका छन्, बरु बाहिरी मुलुकमा त्यस्तो छैन्, केही देशहरुमा नरसंहार मच्चिएको छ, ती देशहरुमा शान्तिको लागि हामीले २५६२ औं बुद्ध जयन्तीका अवसरमा यही बैशाख १० देखि १२ गतेसम्म विश्व शान्तिको कामना गर्दैछाँै ।’<br>पत्रकार सम्मेलनमा गजलाल बाँस्कोटाले रौतहटको चन्द्रनिगाहपुरमा निमार्ण गर्न लागिएको विशाल स्तुपाको सहयोगार्थ आयोजनामा गरिएको विश्व शान्ति पूजामा उपस्थित हुन आग्रह गरेका छन् । <br>उनले मानव जीवनलाई सफल र सहज बनाउन शान्ति अहिँसा, करुणा, प्रेमको माध्यामबाट सम्पूर्ण प्राणी र चराचर जगतको रक्षा गर्न सकिन्छ भन्ने बुद्धको पवित्र ज्ञानलाई व्यवहारमा लागू गर्नुपर्नेमा जोड दिएका छन् । <br><br><br><br></p>

<p>काठमाडौं । यातायात व्यवसायीले वैशाख २० गते सबै भाडाका यातायात ठप्प पार्ने निर्णय गरेका छन्। सरकारले सिन्डिकेट खारेज गरेपछि, त्यसको विरोधस्वरुप नेपाल यातायात व्यवसायी राष्ट्रिय महासंघको अगुवाइमा वैशाख २० गते देशव्यापी चक्काजाम गर्ने निर्णय गरेका हुन्।<br><br>आइतबार बसेको विभिन्न यातायात सम्वद्ध संस्थाको बैठकले सरकारले सुनुवाइ नगरे वैशाख २६ गतेदेखि अनिश्चितकालीन बन्दको घोषणा गरेका छन्। सरकारले ल्याएको यातायात व्यवस्थापन कार्यविधि निर्देशिकाको खारेजीको माग गर्दै वैशाख २० गते सबै भाडाका गाडी नचलाउने निर्णय गरेको महासंघले जनाएको छ ।<br><br>महासंघको निर्णय अनुसार पेट्रोल ढुवानी समेत ठप्प हुनेछ। यसैबीच यातायात विभागले भने सार्वजनिक यातायात बन्द गर्नै नपाउने भन्दै बन्द गरेमा कारवाही गर्ने जनाएको छ । सरकारले निर्देशिका जारी गर्दै कम्पनीमार्फत् सार्वजनिक यातायात चलाउनुपर्ने, यातायात समिति असारदेखि नविकरण नगर्ने लगायतका सुधारका मुद्दा अघि बढाएको थियो। यातायात व्यवस्था विभागले कम्पनीमार्फत् सार्वजनिक यातायात चलाउन अनुमति दिन थालेको थियो।विभागको अनुमतिपछि काठमाडौंदेखि बनेपासम्म मयुर यातायातले सेवा थालेको थियो।<br><br>मयुर यातायातको सेवाका विरुद्धमा कोटेश्वर पूर्वका व्यवसायीले एक दिन यातायात बन्द गरेका थिए। कोटेश्वर पूर्वका यातायात व्यवसायीले सार्वजनिक यातायात बन्द गरेपछि विभागले एकै दिन पाँच वटा कम्पनीलार्इ अस्थायी रुट इजाजत दिएको थियो।<br></p>

<p align="justify">जगदिश खनाल, <br></p><p align="justify">२ बैशाख, नुवाकोट । ‘विपद जोखिम न्युनिकरण तथा व्यवस्थापन सम्बन्धी ऐन २०७४’ कार्यान्वयनको लागी नुवाकोटका सबै स्थानीयतहले ऐक्यबद्धता जनाएका छन् ।<br><br>यहाँको स्थानीयतहका प्रतिनिधिहरु सम्मिलित विपद जोखिम न्युनिकरण तथा व्यवस्थापन सम्बन्धी विदुरमा सम्पन्न दुईदिने कार्यशाला गोष्ठि मार्फत एघार बुँदे नुवाकोट घोषणा पत्र जारीगर्दै ऐनले निर्देश गरेका कार्यक्रम सञ्चालन गर्न प्रतिबद्धता जनाएका हुन् ।<br><br>स्थानीयतहका प्रमुख, उपप्रमुख, प्रशासकीय अधिकृत, विपद्को क्षेत्रमा काम गर्दै आएका सरोकार राख्ने कार्यालयका प्रतिनिधि सम्मिलित गोष्ठिले नयाँ ऐन अनुसार स्थानीयतहमा समिति गठन, स्थानीयस्तरमा सुहाउदो अनुसारको नयाँ ऐनको निर्माण, विपद्बाट बच्न पूर्वतयारी, विपद्को सामना र विपद्मा उद्धार, उपचार तथा त्यसको पछिको अबस्थाको कार्ययोजना बनाउने घोषणा पत्रमा उल्लेख गरेका छन् ।<br><br>“जोखिम क्षेत्रको नक्सांकन, खुलाक्षेत्रको पहिचान, जोखिम न्यूनीकरण तथा अल्पिकरण र पुर्व तयारी योजना समावेश भएको स्थानीय विपद् ब्यवस्थापन योजन निर्माण गर्नेछौँ ।” घोषणा पत्रमा भनिएको छ “आपतकालीन खोज उद्वार र राहत सामग्रीहरुको उचित व्यवस्थापन र भण्डारण गरि विपद् समयमा समुचित सदुपयोग गर्न प्रतिबद्ध रहेका छौ ।”<br><br>जर्मन सहयोग नियोग (जिआईजेड)को ‘रिकभरी कार्यक्रम नुवाकोट’को सहयोगमा बिहीबार र शुक्रबार गरी दुई दिन सञ्चालित गोष्ठिमा सहभागीलाई संघीय मामिला तथा सामान्य प्रशासन मन्त्रालयका सहसचिव रुद्रसिंह तामाङ, मन्त्रालयका विपद् विशेषज्ञ अमरदिप सुनुवार, पहिरो विशेषज्ञ डा.कृष्ण देवकोटा, शहरी विकास तथा भवन निर्माण डिभिजन कार्यालयका प्रमुख विदुर खड्का, जिल्ला प्राविधिक कार्यालयका ईञ्जिनियर उषेश श्रेष्ठ, श्रीनाथ गण देवीघाटका सहसेनानी विद्युत बस्नेत, प्रहरी नायव उपरीक्षक नराहरी रेग्मी लगायतले ऐनको कार्यान्वय तथा विपद्को समयमा अपनाउनुपर्ने भूमिका सम्बन्धि सहजिकरण गर्नुभएको थियो । </p><p align="justify"><br><br></p>

<p>काठमाडौं । प्रहरी महानिरीक्षक (आईजीपी) का दाबेदार प्रहरी नायब महानिरीक्षक (डिआईजी) रमेश खरेलले दिएको राजीनामा स्वीकृत भएको छ । सरकारले डिआईजी सर्वेन्द्र खनाललाई महानिरीक्षक बनाएपछि असन्तुष्टि व्यक्त गर्दै खरेलले बुधबार राजीनामा बुझाएका थिए । उनको राजीनामा गृह मन्त्रालयले बुधबारै स्वीकृत गरेको हो ।<br><br>खरेलले आफू अपमानित भएर काम नगर्ने बताउँदै राजीनामा दिएका थिए । उनी ०४५ सालबाट भलिबल खेलाडीका रुपमा सिपाहीबाट प्रहरी सेवा प्रवेश गरेका थिए । सरकारले मंगलबार वरियता क्रममा पहिलो नम्बरमा रहेका खनाललाई आइजिपी बनाएको थियो । बरियतामा खरेल दोस्रो नम्बरमा थिए ।<br><br>को-को हुन् खरेललाई प्रहरी प्रमुख बन्न नदिने ?<br><br>गठबन्धनका प्रमुख राजनीतिक दल एमाले र नेकपा माओवादी केन्द्रका शिर्ष नेताको आँखामा खरेल नपरेका कारण उनी आइजीमा बढुवा हुन पाएनन् । एसपी हुँदादेखि नै प्रभावकारी काम गरेका खरेलले एसएसपी हुँदा काठमाडौंमा गुन्डागर्दी तहसनहस पारेका थिए ।<br><br>उनी संगठनका लागि ‘क्रिम’ अफिसरका रूपमा कार्यरत थिए । उनले भनेका छन्, ‘संगठनको नेतृत्व गर्ने सपना बोकेर हिँडेको थिएँ अब काम गर्ने उर्जा नै नरहने भएकाले राजीनामाको मनस्थितिमा पुगेको हुँ।’<br><br>सर्वेन्द्र खनालमा आफैमा सक्षम प्रहरी अधिकारी हुन् । उनको नियुक्तिको विषयमा कहीँ कतै विरोध सुनिएको छैन् । तर, खरेललाई आइजीमा बढुवा गरे पनि खनालले आइजी हुने अवसर पाउने थिए । १३ महिनाको कार्यकाल सँगै खरेल घर जाने समयावधि हुँदा त्यसपछिको प्रहरी कमान्ड खनालले पाउने स्पष्ट बाटो थियो ।<br><br>यसो त उनी यसअघि नै शेरबहादुर देउवा नेतृत्वको सरकारबाट अन्यायमा परेका थिए । देउवा सरकारले डीआइजी बढुवा गर्दा खरेललाई सर्वेन्द्र खनालले उछिनेका थिए । जतिबेला खरेल शान्ति मिसनमा डार्फरमा थिए । डीएसपीदेखि एसएसपीसम्म १ नम्बरमा रहेका खरेल डीआइजीमा भने दोस्रो भएका थिए । त्यतिबेला लागेको ठेसको चोट यसपटक खरेलले सहनु परेको हो । देउवा सरकारले आफूलाई अन्यायमा परेको भन्दै खरेलले प्रहरी महानिरीक्षक नियुक्तिमा आफूलाई न्याय मिल्ने आशा गरेका थिए । तर, प्रधानमन्त्री ओलीले वरियतालाई मिच्न चाहेनन् ।<br><br>यसअघि तीन नम्बरमा रहेका डिआइजी जयबहादुर चन्दलाई आइजीमा बढुवा गर्दा तत्कालिन देउवा सरकार विवादमा तानिएको थियो । त्यसबेला प्रचण्ड प्रधानमन्त्री थिए । सोही विवादका कारणले सर्वोच्च अदालतकी तत्कालिन प्रधानन्यायाधीश सुशिला कार्कीसम्मले महाअभियोगको सामना गर्दा राजनीतिक दलका नेताहरूको प्रत्यक्ष ‘इन्ट्रेस्ट’ सतहसम्म आएको थियो ।<br></p>

<p>काठमाडौं । त्रिभुवन अन्तर्राष्ट्रिय विमानस्थलमा गएको फागुन २८ मा भएको यूएस-बंगाल एयरलाईन्स जहाज दुर्घटनाको प्रारम्भिक अध्ययन प्रतिवेदनले पाइलटको मुख्य कमजोरी औँल्याएको छ। <br>दुर्घटना जाँचबुझ आयोगले संस्कृति, पर्यटन तथा नागरिक उड्डयनमन्त्री रवीन्द्र अधिकारीलाई सोमबार प्रतिवेदन बुझाएको छ। आयोगलाई एक महिनाभित्र प्रारम्भिक प्रतिवेदन बुझाउने समय दिएको थियो। उक्त प्रतिवेदन मन्त्री अधिकारीले मन्त्रीपरिषद्मा पेश गर्नेछन्।<br><br>विमानस्थलस्थित एयर ट्राफिक कन्ट्रोलरले पनि सही निर्णय लिन नसकेको छानविनले देखाएको प्रतिवेदनमा उल्लेख छ। जहाज अवतरण गर्ने क्रममा पाइलटले मिसअप्रोच लिएपछि जहाज दुर्घटना भएको प्रारम्भिक प्रतिवेदनमा उल्लेख छ। दुर्घटनामा ५२ जनाले ज्यान गुमाएका थिए। कारोबार दैनिकबाट ।<br></p>