<p>काठमाडौ । प्रधानमन्त्री केपी शर्मा ओलीदेखि अभिनेता राजेश हमाललगायतले मृत्युपश्चात आँखा दानको घोषणा गरेका छन् ।<br></p><p>उनीहरूले तिलगंगा आँखा प्रतिष्ठानको नेपाल आँखा बैकमा मृत्युपर्यन्त आँखा (नानी) दानको प्रतिबद्धता (घोषणा) गरेका छन् । पराराष्ट्रमन्त्री प्रदीप ज्ञवाली, नेकपाका वरिष्ठ नेता माधवकुमार नेपाल, विद्युत् प्राधिकरणका कार्यकारी निर्देशक कुलमान घिसिङ, अभिनेत्री करिष्मा मानन्धर, हरिवंश आचार्य, मदनकृष्ण श्रेष्ठलगायतले आँखा दानको घोषणा गरेका हुन् । यस्तै कर्मचारी, नेताहरू, कलाकार आदिले आँखा दानको घोषणा गरेको नेपाल आँखा बैंकका व्यवस्थापक शंखनारायण त्वायनाले बाह्रखरीलाई जानकारी दिए । “करिब २५ वर्षको अन्तरालमा ७७ हजारले मृत्युपछि आँखाको नानी दान गर्ने प्रतिबद्धता जनाएका छन्,” उनले भने, “२०५१ भदौ ३१ मा आँखा बैंक स्थापना यता १४ हजारभन्दा बढीले नानी दान गरिसकेका छन् ।”&nbsp;<br></p><p><b>जसले मृत्युपछि अरूलाई नयाँ दृष्टि दिए&nbsp;</b><br></p><p>तिलगंगा आँखा प्रतिष्ठानको आँखा बैंकमा मृत्युपछि आँखा दान गरेर नयाँ दृष्टि दिनेमा मनमोहन अधिकारीदेखि कलाकार शान्ति मास्केसम्म छन् । त्यसबाहेक हरिवंश आचार्यकी (पत्नी) मीरा, माधव नेपालका बुबा मंगलकुमार उपाध्याय, साहना प्रधानका बुबा, आलोक नेम्वाङ (निर्देशक) नेता निर्मल लामालगायत छन् ।</p><p>“आँखा दानबाट धेरैले गुमेको दृष्टि पाएका छन्,” व्यवस्थापक त्वायनाले भने, “आँखा बैंक सुरु भएको वर्ष चिनिमाया तुलाधरले मात्र नानी दिने प्रतिबद्धता जनाएकी थिइन् । उनको नानी सोही वर्षमै झिकिएको थियो ।” सन् २०१५ देखि २०१९ सम्ममा ३ हजार ९ सय ८८ जनाले दृष्टि पाएको प्रतिष्ठानले जनाएको छ ।<br></p><p>प्रतिष्ठानका कार्यकारी निर्देशक प्रा.डा. सन्दुक रुइतले धेरै मानिसमा आँखादान भन्नेबित्तिकै आँखाको डल्लो झिक्ने सोच भए पनि त्यस्तो नहुने सुझाए । “आँखाको डल्लो झिक्ने होइन, बाहिरको नानी मात्र निकाल्ने हो,” रुइतले भने, “यसमा धार्मिक, सांस्कृतिक रूपमा अफ्ठ्यारो केही हुँदैन । मृत्युपश्चात् झिक्ने हो ।”<br></p><p>प्रतिष्ठानका जनसम्पर्क निर्देशक भागिरथ बानियाका अनुसार संकलन भएका सबै नानी प्रत्यारोपण हुँदैन । नानी दान गर्ने व्यक्तिको मृत्यु भएको ८ देखि १० घण्टामा निकालिसक्नुपर्ने रुइतले जानकारी दिए ।&nbsp;<br></p><p>आँखा दानका विषयमा पशुपति आर्यघाट विद्युतीय शवदाह गृहलगायत वीर अस्पताल, त्रिवि शिक्षण अस्पताल, सहिद गंगालाल राष्ट्रिय हृदय केन्द्र र पाटन अस्पतालमा आँखा बैंकबाटै खटाइएका परामर्शदाताहरूले परामर्श तथा जानकारी दिने गरेको प्रतिष्ठानले जनाएको छ । त्यस्तै, प्रतिष्ठानले स्थानीय आँखा अस्पतालको समन्वयमा मेची, विराटनगर, लहान, हेटौंडा, भरतपुर, लुम्बिनी, पोखरा र कैलालीमा पनि नानी संकलन केन्द्र स्थापना भई नानीहरू संकलन गरिरहेको छ ।&nbsp;</p><p><a href="https://baahrakhari.com/news-details/242293/2020-02-19">यो सामाग्रि बाह्रखरीकर्मी सञ्जिता खनालले तयार गर्नुभएको हो ।&nbsp;</a><br></p>

<p>तिगाँउ&nbsp; । बेलकोटगढी नगरपालिकाको वडा नं. ११ को माथिल्लो तिगाँउमा मौसमी भाइरलको कारण गाउँनै प्रभावित भएको छ । पछिल्लो तीनदिनदेखि देखिएको मौसमी भाइरलको कारण गाउँको प्रत्येक घरमा बिरामी देखिएको वडाध्यक्ष रामहरि पाण्डेले जानकारी दिनुभयो । उहाँको अनुसार उपल्लो तिगाँउमा बेलकोट स्वास्थ्य चौकीबाट बिहीबार गएको अनमी उषा सिंह र कमला पाण्डेले ५४ जना बिरामीको उपचार गर्नुभयो ।<br></p><p>करीब पचास घरधुरी रहेको उपल्लो तिगाँउमा उच्च ज्वरो, रुघाखोकी, रक्तचाप भएका बिरामी प्रत्येक घरमा पाइएको छ । सोमबारदेखि फैलन सुरु भएको ज्वरोको कारण गाउँनै प्रभावित भएको जानकारी स्थानीय कमबहादुर तामाङबाट पाए लगत्तै नगर प्रमुख राजेन्द्ररमण खनाल र प्रमुख प्रशासकीय अधिकृत शिवप्रसाद लम्सालसंग समन्वयको आधारमा स्वास्थ्यकर्मी र औषधि सहितको टोली लिएर घरघरमै पुगेर बिरामीको उपचार गरेको वडाध्यक्ष रामहरि पाण्डेले जानकारी दिनुभयो । बिहीबार ५४ जनाको उपचार गरेको र उनीहरुलाई स्वाथ्यकर्मीको निगरानीमा राखिएको उहाँले जानकारी दिनुभयो । </p><p>तामाङ समुदायको बासिन्दाको बासोबास रहेको उपल्लो तिगाँउमा रहेको नागरिकहरु बिरामी पर्नुको कारण खानेपानीमा दूषित भएको र सगसगैँ जनचेतनाको कमी भएका कारण उनीहरुको उपचार सहित स्वच्छ पानी पिउनको लागी अपिल गरिएको र रोग फैलन नदिन आफूहरु सक्रिय भएर लागिरहेको वडाध्यक्ष पाण्डेले जानकारी दिनुभयो ।&nbsp;</p>

<p>विदुर । नुवाकोट उद्योग बाणिज्य संघको आयोजनामा बट्टारमा जारी छैठौँ नुवाकोट महोत्सवको आठौ दिन बिहीबार पाँच हजार भन्दाबढी दर्शकले मेलाको अवलोकन गरेका छन् ।<br></p><p>गएको माघ १६ गतेदेखि सुरु भएको मेलोको आठौ दिन बिहीबार टिकट लिएर दुई हजार पाँचसय र पास लगायतका सुविधाको आधारमा करीब तीन हजार गरेर पाँच हजार भन्दा बढीले मेलाको अवलोकन गरेको महोत्सव आयोजना अन्तरगत प्रचार–प्रसार उपसमितिका संयोजक उपेन्द्र बुढाथोकीले जानकारी दिनुभयो । जारी रहेको छैठौँ नुवाकोट महोत्सवमा बिहीबार नेपाल आइडल प्रतिस्पर्धी एंव चर्चित गायक प्रताप दास लगायतका कलाकारहरुको प्रस्तुती रहेको थियो ।&nbsp;</p><p>महोत्सवको अवलोकन गर्न पुग्नुभएका बागमति प्रदेशका उपसभामुख राधिका तामाङले पछिल्लो समयमा नुवाकोटको विकासको गति निकै तिव्र हुदै अघि बढेको उदाहरण दिदै महोत्सव लगायतका गतिविधिले जिल्लालाई आर्थिक रुपमा थप सम्मुन्नत बनाउनुपर्ने बताउनुभयो । पूर्व राज्यमन्त्री समेत रहनुभएका उपसभामुख राधिका तामाङले छहरेबाट–टोखा पुग्ने सुरुङ मार्गको निर्माणको सकारात्मक सम्भाव्यता देखिएको र त्यसको लागी समय लाग्ने भएकाले छहरे हुदै गुज्रेभञ्याङबाट टोखा पुग्ने सडकलाई पक्की बनाई सञ्चालन गरेर नुवाकोटका जनतालाई राजधानी ओहोर–दोहोरको लागी सहज बनाउन सबै राजनीतिक दलबीच सहकार्य र कार्यगत एकताको आवश्यकता रहेको बताउनुभयो । उहाँले नुवाकोटको विकासको लागी प्रयाप्त बजेट आएकाले त्यसको सही रुपमा सदुपयोगको लागी प्रतिपक्ष दल काँग्रेस र योजनाको लाभ लिने जनतालाई पनि सचेत भएर जागरुक नागरिकको भूमिका निर्वाह गर्न आग्रह गर्नुभयो ।&nbsp;</p><p>महोत्सवको अवलोकनको लागी बिहीबार नै बागमती प्रदेससभाका सदस्य बद्री मैनाली, दुप्चेश्वर गाउँपालिका अध्यक्ष योबिन्दसिंह तामाङ, उपाध्यक्ष अञ्जु आचार्य, शिवपुरी गाउँपालिकाको उपाध्यक्ष मञ्जु केसी लगायतका जननिर्वाचित प्रतिनिधिहरु पुग्नुभएको थियो ।&nbsp;</p><p>महोत्सवको नवौ दिन शुक्रबारपनि चर्चित कलाकारहरुको प्रस्तुती रहेको आयोजक उद्योग बाणिज्य संघका अध्यक्ष ताराबहादुर कार्कीले जानकारी दिनुभयो ।&nbsp;</p>

<p>विदुर । रसुवाको कालिका गाउँपालिकाको उपाध्यक्ष भवानीप्रसाद न्यौपानेको नेतृत्वमा रहेको शिक्षासंग सम्बन्धित टोली नुवाकोटको विदुर नगरपालिका र तारकेश्वर गाउँपालिकाको विद्यालयहरुको भ्रमण अवलोकन आएको छ । दुई दिने भ्रमणको लागी नुवाकोट आएको टोलीले विदुर र तारकेश्वरमा सञ्चालनम रहेका विद्यालयसंग अनुभवन आदान प्रदान गर्दै राम्रा पक्षलाई अनुसरण गर्ने र कमजोर पक्ष सुधारका सम्बन्धमा छलफल अघि बढाएर समाधानको लागी पहल गर्न सहायोग पुग्ने विश्वास लिएको उपाध्यक्ष न्यौपानले बताउनुभयो । नुवाकोटको दुई स्थानीयतहमा रहेका विद्यालयमा बिहीबारदेखि सुरु गरेर शुक्रबारसम्म दुई दिनसम्म चल्ने भ्रमणअवलोकनमा रसुवाको कालिका गाउँपालिकाको उपाध्यक्ष भवानीप्रसाद न्यौपाने सहित वडाध्यक्षहरु, विद्यालयका व्यवस्थापन समितिका अध्यक्ष र प्रधानध्यापक लगायतको सहभागिता रहेको छ ।<br></p>

<p>विदुर । विश्व बैंकले भूकम्पीय आवास पुनर्निर्माण आयोजनाका लागि करिब २२ अर्ब ८० करोड रुपैयाँ ऋण सहयोग गरेको छ । अर्थ मन्त्रालयमा एक कार्यक्रमका बीच विश्व बैंकका प्रतिनिधि र नेपाल सरकारका प्रतिनिधिबीच भूकम्पीय आवास पुनर्निर्माण आयोजनाका लागि ऋण सम्झौता पत्रमा हस्ताक्षर भएको हो । सम्झौता पत्रमा नेपाल सरकारको तर्फबाट अर्थमन्त्रालयका सहसचिव श्रीकृष्ण नेपालले हस्ताक्षर गर्नुृभएको हो । दोश्रो थप ऋण सहायता स्वीकार गर्नेसम्बन्धी वित्तीय सम्झौताअनुसार प्राप्त विश्व बैंकको पछिल्लो सहयोग रकमलाई भूकम्प प्रभावित ३२ जिल्लाका ८६ हजार ६ सय ८० वटा आवास निर्माणमा खर्च गरिने अर्थमन्त्रालयले जनाएको छ । विश्व बैंकले नेपालमा भूकम्प प्रतिरोधी आवास निर्माण कार्यक्रम सञ्चालन गरिरहेको छ । विश्व बैंकले वर्ष अघिपनि ५५ हजार घर पुनर्निर्माणका लागि ऋण सहायता उपलब्ध गराएको थियो ।&nbsp;<br></p>

<p>विदुर । बागमती प्रदेश सरकारले छुट्टै स्वायत्त निकाय स्थापना गरी विद्युतीय बस सञ्चालन गर्ने भएको छ । प्रदेश सरकारले साझा यातायातलाई बस खरिद गर्न रकम उपलब्ध नगराउने र आफैँ बस खरिद गरी सञ्चालन गर्ने तयारी अगाडि बढाएको जनाएको छ ।<br></p><p>संघीय सरकारले साझा यातायातलाई विद्युतीय बस खरिद गर्न दिएको तीन अर्ब फिर्ता लिने निर्णय गरेको थियो । प्रदेश सरकारले साझा यातायातलाई ३० करोड रुपैया रकम दिने प्रतिबद्धता जनाएपनि हालसम्म उपलब्ध नगराइसकेको बताइएको छ । यस्तै, प्रदेश सरकारले&nbsp; अब बस खरिद र प्रदेशभित्रको यातायात व्यवस्थापन गर्न ‘यातायात निगम’ स्थापनाको तयारी अघि बढाएको जनाइएको छ । यसका लागि आवश्यक छलफल भइरहेको भौतिक पूर्वाधार विकास मन्त्रालयका सचिव तेजराज भट्टले जानकारीले दिनुभयो ।&nbsp;</p>