१७ चैत,काठमाडौं  । 
कांग्रेस सभापति शेरबहादुर देउवाले संसदीय दल र कार्यसमिति निर्वाचनअघि नै विधान संशोधनका लागि अग्रसरता लिएका छन्। उनले नेता रामचन्द्र पौडेललाई मंगलबार फोन गरी निर्वाचनअघि नै विधान संशोधन गर्नेबारे आश्वस्त तुल्याएका हुन्। पौडेल पक्षधरले विधान संशोधन नगरी दलको नेता र कार्यसमिति निर्वाचन गर्न नहुने बताएकाले देउवाले संशोधन गर्न अग्रसरता लिएको उनी निकट नेता विमलेन्द्र निधिले बताए। तत्कालीन सभापति एवं दलका नेता सुशील कोइरालाको निधनपछि उक्त पद खाली छ।
 
पौडेलले विधान संशोधन र चैत २० गते बार एसोसिएसनको निर्वाचनका कारण जनाई पूर्वनिर्धारित निर्वाचन मिति सार्न आग्रह गरेका थिए। कानुन व्यवसायीको पृष्ठभूमि भएका कतिपय सांसदहरू नै मतदानका लागि जिल्ला जानुपर्ने भएकाले निर्वाचन मिति सार्न पौडेलले आग्रह गरेका थिए। पौडेलको आग्रहप्रति भने देउवा सहमत भएनन्। 
 
प्रमुख विपक्षी दलको नेता नचुनिँदा संवैधानिक निकायका पदाधिकारी नियुक्तिमा असर पुग्ने भएकाले ढिलाइ गर्न नहुने देउवाको तर्क छ। स्रोतका अनुसार पौडेलले वैशाख पहिलो साता निर्वाचन गर्नुपर्ने प्रस्ताव गरेका थिए। निर्वाचन समितिको बहुमत निर्णयअनुसार दलको नेताका लागि चैत २४ र कार्यसमितिका लागि चैत २६ गते निर्वाचन हुने कार्यक्रम छ। कान्तिपुर दैनिकमा समाचार छ।

काठमाडौं,चैत २० ।   उम्मेदवारलाई अस्वीकार गर्ने मतदाताको अधिकारलाई सरकारले स्थानीय निर्वाचनमा लागू गर्ने भएको छ। मन्त्रिपरिषदले शुक्रबार पारित गरेको स्थानीय निर्वाचन कार्यविधि ऐनको संशोधन विधेयकमा कुनै पनि मतदातालाई मत नदिने अर्थात् सबैलाई अस्वीकार गर्ने अधिकार मतदातालाई हुनेछ। कान्तिपुर दैनिकमा समाचार छ।
 
‘चित्त नबुझे कुनै पनि उम्मेदवारलाई मत नदिने अधिकार विधेयकको मस्यौदामा राखिएको छ,’ मन्त्रिपरिषद कार्यालयका एक अधिकारीले भने, ‘संसदले यो प्रावधान पारित गरे निर्वाचनका क्रममा मतदाताले मताधिकारको नयाँ अवधारणाको अभ्यास गर्न पाउँछन्।’ नेपालमा हालसम्म कुनै पनि उम्मेदवारलाई अस्वीकार गर्ने अधिकार मतदातालाई थिएन। मन्त्रिपरिषदले स्वीकृत गरेको विधेयकमाथि अब संसदमा छलफल हुनेछ।
 
 उम्मेदवारलाई अस्वीकृत गर्ने अधिकारको माग राखी दायर रिटको फैसलाका क्रममा सर्वोच्च अदालतले यसअघि नै ‘अस्वीकारको अधिकार’ अर्थात् ‘राइट टु रिजेक्ट’ सुनिश्चित गर्न निर्वाचन आयोग, प्रधानमन्त्री तथा मन्त्रिपरिषद कार्यालयका नाममा निर्देशनात्मक आदेश जारी गरेको थियो।
 
निर्वाचन आयोगका सहसचिव सुशील कोइरालाले कार्यविधि ऐन संशोधनका क्रममा महिला सहभागिताको मुद्दालाई सम्बोधन गर्न खोजिएको बताए।

२१ चैत, काठमाडौं ।

कांग्रेसको सभापतिमा शेरबाहादुरलाई नै सर्वसम्मत रुपमा संसदीय दलको नेता चयन गर्न रामचन्द्र पौडेल पक्षधर नेता नै अग्रसर भएका छन् ।

यसपटक सर्वसम्मत रुपमा सभापति देउवालाई संसदीय दलको नेता चयन गरी पार्टी एक भएको सन्देश दिनुपर्नेमा उनीहरुले जोड दिएको आजको राजधानी दैनिकमा समाचार छ।

१३ औं महाधिवेशनमा सर्वाधिक मत ल्याएका पौडेल पक्षधर केन्द्रीय  सदस्य शेखर कोइरालाले देउवालाई नेता बनाउने कार्यको अगुवाई गरेका छन् ।

कोइरालाले दलको नेतामा उठ्ने मनस्थिति बनाएका पौडेललाई समेत भेटेर देउवालाई सर्वसम्मत बनाउनुपर्नेमा जोड दिएका छन् ।

उनले केन्द्रीय सदस्य दिलेन्द्रप्रसाद बडूलाई समेत भेटेर देउवादलाई नै दलको नेता निर्वाचित गराउनुपर्ने धारणा राखेका छन् । २४ चैतमा कांग्रेस संसदीय दलको निर्वाचन हुँदै छ ।

१९ चैत, काठमाडौं ।
प्रधानमन्त्री केपी शर्मा ओलीले युरोपेली युनियन र भारतले अनुचित ढंगले नेपालको सार्वभौमिकता तथा संविधानसभाबाट संविधान बनाउने हकको अबमूल्यन गरेको बताउनु भएको छ ।

नेकपा एमाले संसदीय दलको  संसद भवनमा आयेजित बैठकमा बोल्दै प्रधानमन्त्री ओलीले युरोपेली युनियन र भारतले नेपालको मामिलामा अन्तराष्ट्रिय कानुन विपरित तथा संयुक्तराष्ट्र संघको प्रचलित स्थापित मूल्य र मान्यता विपरित विज्ञप्ती निकालेकोमा नेपालको गम्भीर ध्यानार्कषण भएको बताउनु भयो ।

प्रधानमन्त्री ओलीले भुकम्पको पीडामा परेको तथा भौगोलिक रुपमा सानो र जनसंख्या कम भएको मुलुक भन्दैमा नेपाल जस्तो स्वतन्त्र र सार्वभौम मुलुकको विरुद्धमा अन्य देशले विज्ञप्ती जारी गरी गर्ने कार्य कुनै पनि मित्र राष्ट्रले गर्न नमिल्ने पनि उल्लेख गर्नु भयो ।

पधानमन्त्री ओलीले नेपालले  नयाँ संविधान जारी गर्दै लामो समयको द्धन्दलाई पनि व्यवस्थापन गरेको उल्लेख पनि गर्नु भयो ।

प्रधानमन्त्री ओलीले नेपालमा अब कानुनी राजको स्थापना, शान्ति सुरक्षा कायम गर्ने,अपराध नियन्त्रण गर्ने र कालो बजारीलाई प्रभावकारी रुपमा नियन्त्रण गर्दै विकासका कामलाई सरकारले अघि बढाउने पनि उल्लेख गर्नु भयो ।

बैठकमा अर्थमन्त्री बिष्णु पौडेलले आगामी बजेटको तयारी तथा राष्ट्रिय योजना आयोगका उपाध्यक्ष डा.युवराज खतिवडाले आगामी योजना तथा कार्यक्रमका वारेमा जानकारी गराउनु भएको थियो ।

बैठकमा बोल्दै सासंहरुले आगामी बजेटमा देशका प्रतेक गाविसहरुमा ५० लाख बजेटको विनियोजन गर्नु पर्ने ,निर्वाचन क्षेत्र विकास कार्यक्रमको बजेट ५ करोड बनाउनु पर्ने, लगायतका विभिन्न विकास तथा योजनाका वारेमा सरकार तथा सम्बन्धीत निकायहरुको ध्यानाकर्षण गराउनु भएको थियो ।

प्रधानमन्त्री ओली ः चीन भ्रमण अत्यन्त सफल
चैत्र, १८

प्रधानमन्त्री केपी शर्मा ओलीले, आफ्नो चीन भ्रमण अत्यन्त सफल भएको र भ्रमणले नेपाल चीन वीचको सम्बन्धलाई अझ प्रगाढ बनाएको बताउनु भएको छ ।

अन्तर्राष्ट्रिय सरोकार केन्द्र, नेपालले आज राजधानीमा आयोजना गरेको नेपाल चीन सम्बन्ध ः नयाँ आयाम र सम्भाव्यताहरु विषयक कार्यक्रमलाई सम्बोधन गर्दै प्रधानमन्त्री ओलीले, भ्रमणका बेला भएका महत्वपूर्ण सम्झौताहरु कार्यान्वयनमा ल्याएर नेपालले लाभ लिन सक्नु पर्ने बताउनु भयो ।

प्रधानमन्त्री ओलीले चीनको भ्रमण र त्यहांको विकासबाट धेरै सिक्ने अवसर पाएको अब आफ्नै मौलिकतामा नेपालको विकास गर्न सबैले तत्काल सोच्ने बेला आएको बताउनु भयो ।

प्रधानमन्त्री  ओलीले अबको हाम्रो सम्पुर्ण प्रयत्न आर्थिक विकासमा केन्द्रित हुनु पर्ने बताउनु भयो ।

कार्यक्रममा नेपालका लागि चीनका राजदुत ऊ चुन्ताइले नेपालका प्रधानमन्त्री ओलीको चीन भ्रमण अत्यन्त सफल रहेको र त्यसलाई चीनले महत्वका साथ लिएको बताउनु भयो ।

कार्यक्रममा नेपाली कंग्रेसका मुख्य सचेतक चिनकाजी श्रेष्ठले, प्रधानमन्त्रीको भ्रमणका क्रममा भएका सम्झौता कार्यान्वयनमा आए नेपालको विकासमा ठूलो सहयोग पुग्ने विश्वास व्यक्त गर्नु भयो ।

एकीकृत माओवादीका सांसद राम कार्कीले,  चीनको विकासलाई हेरेर नेपालले आफ्नो विकासको लागि आफ्नै खाकामा विकास योजना अघि बढाउनु पर्ने बताउनु भयो ।

चीनका लागि नेपालका पूर्व राजदुत हिरण्यलाल श्रेष्ठ पूर्व मुख्य सचिव लिलामणि पौडेल लगायतले चीनसंग धेरै पहिले हुनु पर्ने सम्झौता ढिलै भए पनि यो सरकारले गरेको छ भन्दै सम्झौताको स्वागत गर्दै कार्यान्वयनमा जोड दिनु भयो ।