<p>११ कार्तिक, काठमाडौं ।<br>नेपालका लागि युएईका राजदूत सैद हाम्दन अल नक्वीले सन् २०१७ जनवरी १६ मा युएईमा हुने वल्र्ड फ्युचर इनर्जी समिटका लागि प्रधानमन्त्री पुष्पकमल दाहाल प्रचण्डलाई निमन्त्रणा गर्नु भएको छ ।</p><p>राजदूत नक्वीले उर्जा सम्मेलनबाट नेपालले प्रशस्त लाभ लिन सक्ने भन्दै त्यसका लागि नेपाललाई पहिलोपटक निमन्त्रणा गरेको बताउनुभयो ।</p><p>प्रधानमन्त्रीले निमन्त्रणाका लागि हार्दिक धन्यवाद दिँदै सम्मेलनमा सहभागी हुन आफू ईच्छुक रहेको बताउनुभयो ।</p><p>बिहीबार प्रधानमन्त्री तथा मन्त्रीपरिषदको कार्यालय सिंहदरबारमा भएको भेटमा नेपाल–युएई बीचको सम्बन्ध र द्वीपक्षीय हितका विषयमा छलफल भएको थियो ।</p><p>भेटमा प्रधानमन्त्रीले युएईको अदालतद्वारा मृत्युदण्डको सजाय सुनाएका दार्चुलाका अमर बमलाई आममाफीको व्यवस्था गर्न राजदूत नक्वीको ध्यानाकर्षण गराउनु भएको थियो ।</p><p>भेटमा राजदूत नक्वीले नेपाल र युएई पुराना मित्र भएको भन्दै दुई देशको सम्बन्ध प्रधानमन्त्रीको चासोबारे आफू युएई फर्केर छलफल गर्ने बताउनु भयो ।<br><br><br></p>

<p><span style="line-height: 1.42857143;">पप्पु गुरुङ्ग-दोधारा चादनी,कात्तिक ११ । लोपोन्मुख बिभिन्न प्रजातीका बाघको संरक्षण गरौ, बन्यजन्तुको अवैध चोरी शिकारी नियन्त्रण गरौ भन्ने मुल नाराको साथ शुक्लाफाँटा बन्यजन्तु आरक्ष अन्र्तगत गठन भएको सगरमाथा मध्यवर्ती उपभोक्ता समितिको आयोजनामा ‘दोधारेली प्रथम वाघ महोत्सव २०७३’ को दोस्रो दिन स्थानिय नाट्य कलाकारहरुले दर्शकलाई निकै हसाए ।&nbsp;</span><br></p><p><span style="line-height: 1.42857143;">यस्तै राष्ट्रिय स्तरका गायक तथा मोडेलहरु दर्शकको केन्द्र रहे । लोपोन्मुख बिभिन्न प्रजातीका बाघको संरक्षण गरौ, बन्यजन्तुको अवैध चोरी शिकारी नियन्त्रण गरौ भन्ने मुल मर्म सहित स्थानिय नाट्य कलाकारले दर्शकलाई पेट मिची–मिची हसाए । दोधारा चाँदनीका रामलिला नाटकका प्रमुख हास्य कलाकार दान बहादुर थापाले मञ्चबाटै दर्जनौ बाघको मार्ने शिकारीको भुमिकामा दर्शकको सामु प्रस्तुत भए ।&nbsp;</span><br></p><p><span style="line-height: 1.42857143;">उनि आरक्ष क्षेत्रमा बाघका शिकार गर्ने कुख्यात शिकारीको भेषमा मञ्चमा प्रस्तुत हुदा दर्शकले उनलाई तालीले स्वागत गरे । उनले बिगत लामो समय देखि बाघको शिकार गर्दै आएको भुमीकामा उनि दर्शको माँझ प्रस्तुत भए । उनको काँधमा थ्रिनटथ्रि राईफल बोकेर बाघको शिकारी गरे ।&nbsp;</span><br></p><p><span style="line-height: 1.42857143;">उनले बिगत लामो समय देखि बाघको छाला तस्करीमा संलग्न रहेको ब्यङ्गे नाट्य प्रस्तुत गर्दै दर्शकको माँझ खरो उत्रिए । बाघ हाम्रो भावी सन्ततीको पेवा हो, बाघलाई संरक्षण गर्नु पर्छ भन्ने सन्देश नाटकका टिमले दर्शकलाई सन्देश दिए । गायक तथा मोडेल बादल थापा, सुरेश रानाको प्रस्तुतिले भने युवा पुस्तालाई मोहित बनायो ।&nbsp;</span><br></p><p><span style="line-height: 1.42857143;">उनिहरुले आफ्नो म्यजिक एल्बमका गित दर्शक माँझ प्रस्तुत गरेर मन जिते । साथमा स्थानिय कलाकारहरुको नृत्य महोत्सवको आकर्षण बन्यो । सयौ दर्शकले बाघ महोत्सवको दोस्रो दिनको आनन्द लिएका छन् । ९ गतेबाट संचाल भएको महोत्सवको १२ गते सम्म संचालन हुने आयोजकले जनाएको छ् ।&nbsp;</span><br></p><p><span style="line-height: 1.42857143;">बाघको संरक्षण तथा बाघ र मानव बिचको दुरीलाई कसरी कम गर्न सकिन्छ भन्ने उद्धेश्य रहेको आयोजक समिति मध्यवर्ती उपभोक्ता समितिका अध्यक्ष अमर बस्नेतले जानकारी दिनुभएको छ् । महोत्सवमा दर्शकको संख्या अझै बढ्ने आयोजक समितिले दाबी गरेको छ् । लोपोन्मुख बिभिन्न प्रजातीका बाघको संरक्षण गरौ, बन्यजन्तुको अवैध चोरी शिकारी नियन्त्रण गरौ भन्ने मुल भावका साथ बाघ महोत्सव संचालन गरिएको आयोजक समितिले जनाएको छ् ।&nbsp;</span><br></p><p><span style="line-height: 1.42857143;">लोपोन्मुख विभिन्न प्रजातीका रुपमा परिचित वाघ संरक्षणको लागी वाघको वासस्थानको विस्तार, चोरी शिकारी नियन्त्रण, बाघको अवैध अंग तस्करी नियन्त्रण तथा जंगली जनावर र मानव विचको द्धन्द घटाउने लगायतका जनचेतनामुलुक कार्यक्रमको महोत्सवको प्रस्तुती रहेको महोत्सवका कार्यक्रम संयोजक यसवन्त खड्काले जानकारी दिनुभएको छ् ।</span><br></p>

<p><span style="line-height: 1.42857143;">काठमाडौं,कात्तिक ११ । बख्तरबन्द गाडी (एपिसी)लगायतका बन्दोबस्तीका सामान खरिद गर्न नसक्दा नेपाल प्रहरी र सशस्त्र प्रहरी बलको एक–एक एफपियू शान्ति मिसन गुम्न खतरा देखिएको छ । एपिसी खरिद गर्न गृह मन्त्रालयले सहमति नदिँदा प्रहरीको थप्न लागिएको संयुक्त राष्ट्रसंघीय शान्ति मिसन गुम्न लागेको हो ।</span><br></p><p><span style="line-height: 1.42857143;">राष्ट्रसंघले दुवै प्रहरीलाई एक–एक एफपियू मिसन दिने र त्यसका लागि आवश्यक एकतिहाइ सामग्री खरिद गर्न भनेको थियो । राष्ट्रसंघीय टोली मंसिरको दोस्रो साता सामानहरू निरीक्षण गर्न नेपाल आउँदै छ । तर, करिब एक महिना मात्र बाँकी रहँदा पनि दुवै प्रहरीले एपिसी खरिद प्रक्रियासमेत सुरु गरेका छैनन् । यसले एफपियू मिसन गुम्न सम्भावना बढेको नयाँ पत्रिकामा समाचार छ ।</span><br></p><p><span style="line-height: 1.42857143;">दुवै प्रहरीले एपिसी खरिद सहमित माग्दै गृह मन्त्रालयमा तीन महिनाअघि नै पत्राचार गरेका थिए । तर, गृहले सहमति नदिँदा खरिद प्रक्रिया अघि बढेको छैन । तर, एपिसीबाहेक गाडीलगायत अन्य बन्दोबस्तीका सामग्री खरिद प्रक्रिया भने दुवै प्रहरीले अगाडि बढाएका छन्।</span><br></p><p><span style="line-height: 1.42857143;">सुरक्षा सामग्री खरिद निर्देशिकाअनुसार एपिसी खरिद गर्न गृह मन्त्रालयको सहमति लिनुपर्ने प्रावधान छ । गृहसचिव लोकदर्शन रेग्मीले भने एपिसी खरिदका लागि प्रहरीबाट मागिएको सहमतिको पत्रबारे आफूलाई जानकारी नभएको बताए ।</span><br></p><p><span style="line-height: 1.42857143;">स्रोतका अनुसार विगतमा पनि एपिसी खरिद विवादमा पर्दै आएकाले गृहका अधिकारीहरूले त्यसमा सहमति दिन आनाकानी गरेका हुन् । तर, खरिदको सबै काम प्रहरीबाट हुने भएकाले यसमा गृह संलग्न हुँदैन । सुडान भ्रष्टाचार प्रकरणपछि प्रहरीका यस्ता सामग्री खरिद तुलनात्मक रूपमा पारदर्शी हुने गरेका छन् ।</span><br></p>

<p><span style="line-height: 1.42857143;">काठमाडौं,कात्तिक ११ । उपत्यकाको कलङ्की, चावहिल र सूर्यविनायकमा थप तीनवटा यातायात कार्यालय खुल्ने भएका छन् । &nbsp;सवारी साधन चालक अनुमतिपत्र (लाइसेन्स) लिनेहरूको चाप बढेर सेवाग्राहीले सास्ती भोग्नु परेपछि सरकारले तत्काल थप कार्यालयहरू स्थापना गरेर छिटो र सहज सेवा प्रदान गर्न भदौ ६ गते निर्देशन दिएको थियो ।</span><br></p><p><br></p><p>निर्देशनपछि १५ दिनभित्र थप कार्यालय सञ्चालनमा आउने बताइए पनि अढाई महिनामा बल्ल कार्यालय खोल्ने स्थानको टुङ्गो लागेको हो । यातायात व्यवस्था विभागका अनुसार उक्त तीन स्थानमा सञ्चालन हुने यातायात व्यवस्था कार्यालयले एकान्तकुनामा रहेको कार्यालयले जस्तै सवारी साधनसम्बन्धी सबै काम गर्ने छन् ।</p><p><br></p><p>कार्यालय स्थापनाका लागि बजेट र दरबन्दी स्वीकृत भइसकेको विभागका निर्देशक निरञ्जन रिजालले बताए । उनका अनुसार थप कार्यालयमा उपसचिवको नेतृत्वमा २६ देखि २८ जना कर्मचारी रहनेछन् । थप कार्यालय खोल्ने क्षेत्रहरूको किटान गरिए पनि कार्यालय राख्ने काम अझ बाँकी छ ।</p><p><br></p><p>प्रक्रियाअनुसार कार्यालयका लागि घर भाडामा लिन एक महिनाको सूचना सार्वजनिक गर्नुपर्ने भएकाले थप कार्यालय सञ्चालन हुन पनि अझैं एक महिना लाग्ने विभागले जनाएको छ । तत्कालका लागि चलिरहेका निजी ट्रायल सेन्टरलाई भाडामा लिइने निर्देशक रिजालले बताए ।</p>