<p>पाँचथर ।&nbsp; पाँचथरमा ९ जनाको विभत्स हत्या भएको छ । जिल्लाको मिक्लाजुङ गाउँपालिका-३, आरुबोटे भन्ने स्थानमा गएराति दुई परिवारका ९ जनाको हत्या भएको हो । १ बालिका घाइते छिन् ।<br><br>जिल्ला प्रहरी कार्यालय, पाँचथरका प्रहरी निरीक्षक अनील पौडेलले एक परिवारको पाँच र अर्को परिवारको ४ गरी ९ जनाको हत्या भएको पुष्टि गरे ।<br><br>हत्या गरिएकामा ४१ वर्षीय धनराज शेर्मा, ६ वर्षीया इक्सा शेर्मा, १३ वर्षीया योवना शेर्मा, आठ वर्षीया मुना शेर्मा र १२ वर्षीया आशिका खजुम लिम्बू छन् । त्यसैगरी, फियाक परिवारका ७४ वर्षीय वमबहादुर फियाक, उनकी श्रीमती, ३६ वर्षीया जस्मिता फियाक र २६ वर्षीया मनकुमारी फियाकको पनि हत्या भएको छ ।<br><br>१२ वर्षीया सीता खजुम भने भागेर बाँच्न सफल भएकी छन् । प्रहरीका अनुसार, उनी गम्भीर घाइते छिन् ।<br><br>मध्यराति घटना भएकाले स्थानीयवासीले बिहान मात्रै थाहा पाएका थिए ।<br><br>घटनाबारे जानकारी पाएलगत्तै प्रहरी टाेली घटनास्थलतर्फ लागेको प्रहरी निरीक्षक पौडेलले जानकारी दिए ।<br><br>घटनास्थल मिक्लाजुङ पाँचथर सदरमुकाम फिदिमबाट ६५ किलोमिटर दक्षिण पर्छ । </p><p><b>सीडीओ भन्छन्– झापाबाट अनुसन्धान टोली आउँदैछ :<br></b>पाँचथरका प्रमुख जिल्ला अधिकारी (प्रजिअ) मुरारी वस्तीले घटनास्थल सदरमुकामबाट टाढा रहेकाले विस्तृत विवरण आउन बाँकी रहेको बताए । उनका अनुसार घटनाबारे जानकारी पाएलगत्तै प्रहरी परिचालन गरिएको छ ।<br><br>जिल्ला प्रहरी कार्यालयबाट डीएसपी र नजिकैको इलाका प्रहरी कार्यालयबाट इन्स्पेक्टरको नेतृत्वमा प्रहरी टोली घटनास्थलतर्फ गइरहेको जानकारी प्रजिअ वस्तीले दिए ।<br><br>पाँचथरसँगै छिमेकी जिल्ला झापाबाट पनि प्रहरी बोलाइएको छ । घटनाबारे अनुसन्धानका लागि झापाको साथ खोजिएको प्रजिअ वस्तीले बताए । प्रजिअ वस्तीका अनुसार, झापाबाट डीआईजीसहितको अनुसन्धान टोली अहिले घटनास्थलतर्फ लागेको छ ।<br></p>

<p>राजबिराज । किर्ते उपभोक्ता समिति गठन प्रकरणमा पक्राउ परेका राजपा नेपालका दुई केन्द्रीय सदस्यलाई सप्तरी जिल्ला अदालतले पुर्पक्षका लागि कारागार पठाएको छ। <br><br>सोमबार भएको मुद्दा सुनुवाइका क्रममा बिपी यादव र हरि मण्डललाई कारागार पठाउने आदेश भएको हो।<br><br>बैसाख ५ गते पक्राउ परेका छिन्नमस्ता गाउँपालिका मोहनपुर निवासी यादव पूर्वसासंद समेत हुन्। उनी रातो पासपोर्ट दुरुपयोग काण्डमा पनि मुछिएका थिए। राजगढ गाउँपालिका ३ नर्घो निवासी अर्का केन्द्रीय सदस्य मण्डल स्थानीय शान्ति समितिका पूर्व संयोजक हुन्।<br><br>यसैगरी, सोही आरोपमा पक्राउ परेका पूर्वाधार विकास डिभिजन कार्यालय सिरहाका प्रमुख तथा सिनियर डिभिजनल इन्जिनियर राजकुमार गोइतलाई ४ लाख र निर्माण सामग्री आपूर्तिकर्ता दिलीपकुमार दास र रापाका स्थानीय नेता रमानन्द ठाकुरलाई जनही दुई लाख ५० हजार धरौटीमा रिहा गरिएको छ।<br><br>यादव र मण्डलसहितको संलग्नतामा अग्निसाइर कृष्णसवरण गाउँपालिकाको लेटरप्याड, प्रमुख प्रशासकीय अधिकृत धीरेन्द्र यादव, २ नम्बर वडाध्यक्ष पशुपति चौधरी र ३ नम्बर वडाध्यक्ष अरुणकुमार चौधरीको छाप किर्ते गरिएको आरोपमा प्रहरीले सबैलाई पक्राउ गरी मुद्दा चलाएको थियो। <br><br>प्रदेश २ सरकारको भौतिक पूर्वाधार विकास मन्त्रालयबाट अग्निसाइर कृष्णासवरण गाउँपालिका–२ र ३ का सडकमा माटो तथा ग्राभेल गर्न स्वीकृत योजनाको २५ लाख रकम निकाल्न किर्ते उपझोक्ता समिति गठन गर्न छाप किर्ते गरिएको प्रहरीको भनाइ छ।<br></p>

<p align="justify"><b>काठमाडौ । </b><br>काठमाडौं उपत्यकाबाट ३ पाङ्ग्रे र सार्वजनिक साना सवारी हटाइने भएको छ । टेम्पो र सानो आकारको माइक्रोको संख्या बढी भएकाले उपत्यकाको ट्राफिक व्यवस्थापन असहज भएपछि यातायात व्यवस्था विभागको नीतिगत सहयोगमा महानगरीय ट्राफिक प्रहरी महाशाखाले यस्ता सवारी हटाउने भएको हो ।<br><br>कम सीसीका सवारी साधनले क्षमताभन्दा बढी यात्रु बोक्दा दुर्घटनाको जोखिम रहेको महाशाखाको निष्कर्ष छ ।&nbsp; यातायात व्यवस्था विभागले असारसम्ममा रुट तोकेर साना सवारीलाई पूर्णरुपमा हटाउने तयारी गरेको छ । साघुँरो सीट हुने भएकाले वृद्ध, वृद्धा र फरक क्षमता भएका यात्रुका लागि यी सवारी अनुपयुक्त देखिएको छ । हाल उपत्यकामा ६ हजार ३३० वटा टेम्पो र माइक्रो सञ्चालनमा छन् ।<br><br>“सहज सार्वजनिक यातायात र ट्राफिक व्यवस्थापन चुस्त राख्न साना सार्वजनिक सवारी हटाएर ठूला सवारी भि-याउने सरकारको नीतिअनुसार हामीले त्यस्ता सवारी सञ्चालनमा रोक लगाउने भएका हौं,” महाशाखाका प्रमुख तथा एसएसपी वसन्त पन्तले बताए । उपत्यकामा विभिन्न नयाँ रुट तोकेर ती रुटमा ठूला आकारका सार्वजनिक सवारी सञ्चालन गर्न यातायात व्यवस्था विभागले हाल सञ्चालनमा रहेका र नयाँ रुटको अध्ययन गरेको छ । <br>हाल एउटै रुटमा साना र ठूला सवारी साधन सञ्चालन हुँदा ट्राफिक जामको समस्या बढेको एसएसपी पन्तले बताए । “यही असारसम्म विभिन्न सूचना र जानकारी गर्ने र त्यसपछि यस्ता सवारीलाई उपत्यकामा सञ्चालनमा रोक लगाइने छ,” पन्तले भने । ५० मा ३९ सवारी प्रदुषित महाशाखाले सवारीको धुँवा परीक्षण गर्ने क्रममा उपत्यकामा अत्यधिक प्रदुषित सवारी साधन सञ्चालन हुने पाइएको छ ।<br><br>महाशाखाले सार्वजनिक सवारी र यातायातमा सुधार ल्याउन ३ महिनादेखि सञ्चालन गरिरहेको अभियानका क्रममा उपत्यकाका विभिन्न स्थानमा सवारीको धुँवा परीक्षण गरेको हो ।&nbsp; जसमा ५० वटा सार्वजनिक सवारीको धुँवा परीक्षण गरिएकोमा ३९ वटा सवारीको धुवाँ मापदण्डभन्दा प्रदुषित पाइएको हो । हाल यातायात व्यवस्था विभागसँग रहेको १ थान धुँवा जाँच गर्ने मेशिनले ट्राफिक प्रहरीले धुँवा जाँच गरिरहेको छ । <br><br>थप एउटा मेशिन विभागसँग मगाएको र चाँडै २ वटा मेशिनबाट धुँवा जाँच गरिने प्रमुख पन्तले बताए । सरकारले सवारीको धुवाँ परीक्षण गर्नका लागि पर्याप्त स्थान र कर्मचारीको व्यवस्था नगर्दा उपत्यकामा चल्ने अधिकांश सवारीको धुवाँ जाँच गर्न नसकिएको हो । <br><br><b>पछि बस्नेले पनि हेलमेट लगाउनुपर्ने :</b><br>यसैबीच ट्राफिक महाशाखाले असारदेखि लागु हुनेगरी मोटरसाइकलको पछि बस्नेलाई पनि हेलमेट अनिवार्य गरिएको जनाएको छ । “सडक दुर्घटनामा चालकलाई भन्दा पछि बस्नेको ज्यान जाने खतरा बढी देखियो,” एसएसपी पन्तले भने, “त्यसैले यात्रुको सुरक्षाका लागि हामीले यस्तो व्यवस्था गर्न लागेका हौं ।” यसका लागि गुणस्तर तथा नापतौल विभागले आइएसओ प्रमाणित गरेको हेलमेट प्रयोग गर्नुपर्नेछ ।<br>&nbsp;<br></p>

<p><b>काठमाडौ । </b><br>नेपाल पत्रकार महासंघ उपलब्ध केन्द्रीय समितिको बैठक महासंघका अध्यक्ष गोविन्द आचार्यको अध्यक्षतामा २०७६ जेठ ५ गते केन्द्रीय कार्यालय काठमाडौंमा सम्पन्न भएको छ । बैठकले गरेका निर्णय जानकारीका लागि यो प्रेस विज्ञप्ति जारी गरिएको छ ।<br><br>१. नेपाल सरकार मन्त्री परिषदवाट पारित भई संसदमा बैशाख २६ गते दर्ता भएको मिडिया काउन्सिल सम्वन्धी विधेयकका प्रावधानप्रति महासंघको गम्भीर ध्यानाकर्षण भई त्यसको विरोधमा पहिलो चरणको आन्दोलन सफलतापूर्वक सम्पन्न भएको निष्कर्ष महासंघले निकालेको छ । पहिलो चरणको आन्दोलन सफल पार्न सहयोग पु¥याउने आम सञ्चारकर्मी, मानव अधिकारवादीहरु, पेशागत संघसंगठनहरु, नागरिक समाज र सम्बन्धित सबैमा महासंघ हार्दिक आभार तथा धन्यवाद प्रकट गर्दछ ।<br><br>२. पहिलो चरणको आन्दोलन सम्पन्न हुँदासमेत सरकारले महासंघले उठाएका जायज मागहरु सम्वोधन गर्नेतर्फ कुनै गम्भीरता देखाएको छैन । समस्या समाधान गर्न सरकार सकारात्मक नदेखिएकाले महासंघले दोस्रो चरणको आन्दोलन घोषणा गरेको छ ।<br><br>३. केन्द्रीय समितिको बैठक अघि पत्रकार महासंघको आयोजनामा संचार सम्वद्ध विभिन्न संघ, संगठन र संस्थाका अध्यक्ष तथा प्रतिनिधिहरुसँग संयुक्त बैठक बस्यो । उक्त बैठकमा प्राप्त सुझाव समेतका आधारमा मिडिया काउन्सिल विधेयकको प्रेस स्वतन्त्रता विरोधी प्रावधानका विरुद्ध महासंघले निम्नाअनुसार विरोधका कार्यक्रम तय गरेको छ ।<br><br><b>संघर्षका कार्यक्रमहरु ;</b><br>जेठ ६ र ७ गते – महासंघका पूर्वअध्यक्षहरुसँग छलफल र परामर्श ।<br>जेठ ८ गते – संसद् प्रतिनिधित्व गर्ने राष्ट्रिय पार्टीहरुको ध्यानाकर्षण गराउने ।<br>जेठ ९ देखि १२ गतेसम्म – सञ्चारमाध्यमका सम्पादकहरुसँग भेट गरी सञ्चार अभियान सञ्चालन गर्ने ।<br>जेठ १३ र १४ गते – सांसदहरुसँग भेट गरी छलफल गर्ने ।<br>जेठ १६ र १७ गते – प्रेस स्वतन्त्रता सेनानीको ऐक्यवद्धता ।<br>जेठ १८ देखि २० गतेसम्म – महासंघको प्रतिष्ठान शाखा र एसोसिएटहरुको आयोजनामा उक्त विधेयकका कारण समाचार कक्षमा पर्ने प्रभावबारे छलफल कार्यक्रम चलाउने ।<br>जेठ २१ र २२ गते – महासंघका जिल्ला शाखाहरुले राजनीतिक दल, सञ्चारकर्मी, नागरिक संघसंस्था, पेशाकर्मी र अधिकारकर्मीसँग अन्तरक्रिया गर्ने ।<br>जेठ २३ र २४ गते – केन्द्रमा राजनीतिक दल, सञ्चारकर्मी, नागरिक संघसंस्था, पेशाकर्मी र अधिकारकर्मीसँग अन्तरक्रिया गर्ने ।<br>जेठ २५ गते – अपरान्ह ३ः०० बजे बानेश्वरदेखि बबरमहलसम्म मानव हातेसाङ्लो बनाई बृहत प्रदर्शन गर्ने । काठमाडौं उपत्यका बाहिर प्रदेश राजधानी रहेको स्थानमा सोही खालको प्रदर्शन गर्ने र त्यसको संयोजन प्रदेश समितिले गर्ने ।<br>(नोट : मिडिया काउन्सिल विधेयक संसद्मा पेश हुने दिन देशव्यापी रुपमा आकस्मिक विरोध प्रदर्शन गर्ने ।<br></p>

<p>सिन्धुली । प्रहरीको खोजीमा रहेका रामबहादुर बम्जन सिन्धुलीको कमलामाई नगरपालिका-८, पैरेस्थित आश्रममा सार्वजनिक भएका छन् । आश्रमबाटै अनुयायी बेपत्ता र बलात्कारको आरोप लाग्दै आएका उनीविरुद्ध प्रहरीमा उजुरी परेपछि भूमिगतजस्तै थिए । याैन शाेषण र व्यक्ति बेपत्ता पारेकाे लगायत आराेपमा उनी प्रहरीकाे खाेजी सूचीमा छन् । &nbsp;<br><br>विभिन्न व्यक्तिको उजुरीपछि चार महिनाअघि प्रहरीले सिन्धुपाल्चोकको बाँडेगाउँस्थित आश्रममा खानतलासी गर्नुका साथै पैरेमा समेत सोधपुछ गरेको थियो । त्यतिखेर प्रहरीले बम्जनलाई भेट्टाएन । प्रहरीको छानबिन पनि त्यसै सेलाएको छ ।<br><br>&nbsp;केही नबोल्ने बम्जनले शुक्रबार दिनभर टाउकोमा हात राखेर अनुयायीलाई आशीर्वाद दिएको आयोजक बोधीश्रवण धर्म संघले जनाएको छ । संघका अनुसार १४ औं विश्वशान्ति मैत्रीपूजाका अवसरमा ७७ जिल्लाबाटै आएका अनुयायीलाई तपस्वी बम्जनले दर्शन दिने कार्यक्रम छ ।<br><br>आश्रममा तपस्वी बम्जनकै अनुयायीले कडा निगरानी गर्नुका साथै सुरक्षासमेत दिएका छन् । गेटमा नाम लेखाएर मात्र प्रवेश दिइएको छ । छालाबाट निर्मित वस्तु र धातुबाट बनेका सरसामान लगाएर जानेलाई छिर्न दिइएको छैन । फोटो खिच्न रोक लगाइएको छ । विदेशीसमेत दर्शनका लागि लाम बसेकाछन् ।<br><br>५ हजार बढी अनुयायीको नाम गेटमा इन्ट्री भएको बोधीश्रवण धर्म संघका केन्द्रीय सदस्य छत्र घिसिङले जानकारी दिए । करिब ४२ बिघा जमिनमा बम्जनको आश्रम छ । त्यसमध्ये २४ बिघा लालपुर्जा भएको र बाँकी सामुदायिक वनको जग्गा हो । बम्जनको आवास भने चाइनिज शैलीको आलिसान भवनमा छ ।<br><br>उक्त भवनमा प्रवेश निषेध गरिएको छ । ठूलो पर्खाल र चारैतिर काँडेतार लगाइएको छ । जिल्ला प्रहरी कार्यालयका प्रमुख एसपी चक्रबहादुर सिंहले बम्जनका विषयमा यतिखेर कुनै आदेश नआएको बताए । 'माथिबाटै छानबिन भएको हो, अहिले केही छैन,' उनले थपे ।<br><br>लिटिल बुद्धको उपनामले चिनिएका बम्जनमाथि जिल्ला प्रहरी कार्यालय मकवानपुर, नुवाकोट र बारामा चारवटा उजुरी छन् । मकवानपुर हेटौंडा १४ का महेन्द्र वाइबाले बम्जनको आश्रमबाट ४ वर्षदेखि बुबा सञ्चलाल हराएको भन्दै उजुरी दर्ता गराएका छन् । त्यस्तै बाराका हस्तबहादुर आलेमगरले बम्जनको आश्रमबाट छोरा हराएको भन्दै, मकवानपुरकै विजय रुम्बाले दिदी खोज्न भन्दै र नुवाकोटकी गंगामाया तामाङले बहिनी खोजिदिन भन्दै उजुरी दर्ता गराएका छन् ।<br><br>महेन्द्रले २०७२ को भूकम्पका बेला बुबा सञ्चलाल सिन्धुपाल्चोकस्थित आश्रममा रहेको, त्यसपछि फर्केर नआएको बताएका छन् । उनकै उजुरीपछि प्रहरीको केन्द्रीय अनुसन्धान ब्युरोले बम्जनको सिन्धुपाल्चोकस्थित आश्रममा खानतलासी गरेको थियो । बम्जनको आश्रममा बसेका केही अनुयायीले भने सञ्चलालको हत्या गरिएको र शव गाडिएको हुन सक्ने बताएका थिए । त्यही शंकाका आधारमा प्रहरीले आश्रमभित्रको केही शंकास्पद स्थानमा खाडल खनेको थियो । त्यहाँ प्रहरीले नुनको पोकाको खोलबाहेक अन्य प्रमाण फेला पारेन ।<br><br>अनुसन्धानमा संलग्न एक प्रहरी अधिकारीले शव गलाउन नुन प्रयोग गरिएको हुन सक्ने आशंका गरिए पनि पुष्टि हुने आधार नभेटिएको बताए ।<br><br>बम्जनको आश्रममा बस्दा आफूमाथि यौन हिंसा र बलात्कार गरेको आरोपमा महानगरीय प्रहरी अपराध महाशाखामा पनि उजुरी दर्ता भएको छ । उजुरीकर्ताले बम्जनको आश्रमभित्र आनीहरूमाथि यौन शोषण हुने गरेको र आफूमाथि पनि पटक-पटक बलात्कार गरेको बताउँदै आएकी छन् । <br><br></p>