<p><span style="line-height: 1.42857143;">काठमाडौं,असार १७ । काठमाडौं उपत्यकामा ३६ वर्षपछि धेरै वर्षा भएको छ । उपत्यकामा बुधबार बिहान ८:४५ देखि बिहीबार बिहान ८:४५ सम्मको २४ घन्टामा ९५ मिलिमिटर वर्षा भएको छ । उपत्यकामा वर्षा भएको २४ घन्टाको रेकर्ड २७ जेठ ०३७ को २४ घन्टाको भन्दा केही कम हो । सो वर्षको २४ घन्टामा १०० दशमलव १ मिलिमिटर पानी परेको जल तथा मौसम विज्ञान विभाग पूर्वानुमान महाशाखाको तथ्यांक छ ।</span><br></p><p><span style="line-height: 1.42857143;">उपत्यकामा यस वर्षको मनसुन सुरु भएको २८ जेठदेखि बिहीबारसम्म कुल ३९५ दशमलव २ मिलिलिटर पानी परेको महाशाखाका मौसमविज्ञ सुजन सुवेदीले जानकारी दिए ।&nbsp;</span><span style="line-height: 1.42857143;">महाशाखाका अनुसार यसअघि मनसुन सुरु भएपछि उपत्यकामा सामान्यत: २३६ दशमलव ३ मिलिमिटर वर्षा हुने गरेको थियो । सुवेदीका अनुसार यस वर्ष पूर्वी र पश्चिमी क्षेत्रका केही ठाउामा भारी वर्षा हुनसक्ने प्रक्षेपण गरिएको छ । नेपालमा मनसुन सामान्यत: २८ जेठदेखि सुरु भएर असोज पहिलो सातासम्म सकिने अाजको नयाँ पत्रिका दैनिकमा समाचार छ ।&nbsp;</span><span style="line-height: 1.42857143;">यस वर्षको मनसुनमा क्षेत्रगत रूपमा सुदूरपश्चिमका तराई–पहाडी क्षेत्रमा औसतभन्दा धेरै पानी पर्ने प्रक्षेपण छ । नेपालमा वर्षमा १४ सय मिलिमिटर पानी पर्ने गर्छ ।</span></p>

<p><span style="line-height: 1.42857143;">सुर्खेत,असार १७ । &nbsp;सुदुरपश्चिमको पहाडी जिल्ला बझाङमा दुई दिनदेखि लगातार भूकम्पको धक्का महसुस भएपछि स्थानीयबासिन्दा त्रसित बनेका छन् । बुधबार दिउँसो २ बजे पहिलोपटक पाँच म्याग्निच्यूडको भूकम्प गएको थियो । त्यसपछि बभाङ केन्द्रविन्दु भएर लगातार भूकम्प गइरहेको छ । विहीबार दिउँसो ३ बजे सम्ममा २१ पटक पराकम्पन गएको भूकम्प मापन केन्द्र सुर्खेतले जनाएको छ ।</span><br></p><p><span style="line-height: 1.42857143;">गोरखामा गएको भूकम्पको पराकम्पन नभई बझाङमा नयाँ भूकम्पको धक्का मापन भएको केन्द्रले जनाएको छ । बझाङ सदरमुकाम चैनपुरबाट ११ किलोमिटर उत्तरपूर्व केन्द्र बनाएर भूकम्प गएको र अहिले पनि पराकम्पनहरु नरोकिएको भूकम्प मापन केन्द्र सुर्खेतका प्राविधिक सहायक कपिल महर्जनले जानकारी दिए ।</span><br></p><p>लगातार भूकम्पका धक्काहरु महसुस भएपछि सर्वसाधारण त्रसित बनेका छन् । करिब पाँच सय वर्षदेखि पश्चिम नेपालमा ठूलो भूकम्प नगएकाले कुनै पनि बेलामा ठूलो धक्का आउन सक्ने भन्दै उच्च सतर्कता अपनाउन केन्द्रले आग्रह गरेको छ ।</p><p>‘बुधबार दिउँसोबाट लगातार बझाङ केन्द्रविन्दु बनाएर भूकम्प गइरहेको छ, अहिलेसम्म २१ पटक तीन रेक्टर स्केलभन्दा माथिका धक्का महशुस भएका छन्’ महर्जनले भने,‘भविष्यवाणी गर्न त सकिँदैन, तर कुनै पनि बेलामा पश्चिमक्षेत्रमा ठूलो धक्का आउन सक्छ । लगातार पराकम्पन हुनु पनि यसैको संकेत हो, पूर्वसतर्कता अपनाउनु नै उपयुक्त हुन्छ ।’</p><p>करिब पाँच सय वर्षदेखि नेपालको पश्चिम क्षेत्रमा ठूलो भूकम्प नगएकाले पनि जोखिम बढी भएको उनको भनाइ छ । गोरखा र बझाङको भूधरातल र बनावट एउटै प्रकृतिको भएकाले पनि यस क्षेत्रमा भूकम्पको जोखिम बढी भएको केन्द्रले जनाएको छ ।</p><p><br></p><p>बझाङमा गइरहेको भूकम्पको मापन गर्दै सुर्खेतस्थित भूकम्प मापन केन्द्रका प्राविधिक । तस्बिर: ललितबहादुर बुढा</p><p>महर्जनले थपे,‘बझाङमा यसअघि बैशाखमा पनि भूकम्प गएको थियो, त्यहाँ आसपासको क्षेत्रमा बेलाबेलामा धक्का महसुस हुने गरेको छ । यसपटक लगातार धक्का आइरहेको छ, सावधानी अपनाउनु हितकर हुनेछ ।’</p><p>केन्द्रका अनुसार दुई दिनको अवधिमा पाँच म्याग्निच्यूड भन्दा ठूलो धक्का भने मापन भएको छैन । केन्द्रका अर्का प्राविधिक तीर्थ दाहालले पश्चिमक्षेत्रमा पूर्वसावधानी अपनाउनुपर्ने बताए ।</p><p>‘अहिलेसम्म बझाङमा मात्र सामान्य घर र विद्यालय भवनहरु चर्किएका छन्, मानविय क्षती भएको छैन’, उनले भने, ‘तर अब सावधानी अपनाउन आवश्यक छ, कति बेला के हुन्छ ढुक्क हुने अवस्था छैन ।’</p><p>उनका अनुसार बझाङमा विस्तारै धक्काहरु कमजोर बन्दै गएका छन् । अहिले दक्षिणतर्फ रहेको इण्डियन प्लेट र उत्तरतर्फ रहेको तिब्वेतियन प्लेट एक आपसमा घर्षण भइरहेका धक्का आइरहेको केन्द्रको भनाइ छ । भूकम्पको जोखिम बढी भएको र पश्चिमक्षेत्र संवेदनशील भएकाले पनि पश्चिम क्षेत्रमा उच्च सतर्कता अपनाउन कार्यालयले आग्रह गरेको छ ।</p><p><br></p><p>लगातार भूकम्पको धक्का आउन थालेपछि अहिले वीरेन्द्रनगरमा रहेको भूकम्प मापन केन्द्रमा रहेका प्राविधिक तथा कर्मचारीहरु पनि सतर्क अवस्थामा छन् ।</p><p>भूकम्प मापन केन्द्र सुर्खेतले सावधानी अपनाउन आग्रह गर्दै हल्लाको पछि नलाग्न र भागदौड नगर्न सर्वसाधारणहरुलाई आग्रह गरेको छ ।</p><p>कार्यालयले होसियारीपूर्वक सचेत रहन आग्रह गर्दै नआत्तिन समेत सुझाव दिएको छ । बझाङमा भने सर्वसाधारणहरु त्रसित बनेका छन् ।</p><p>स्थानीय प्रशासनले सर्वसाधारणहरुलाई नआत्तिन आग्रह गर्दै सुरक्षाकर्मीलाई तयारी अवस्थामा रहन निर्देशन दिएको छ । बझाङमा लगातार पराकम्पन गएपछि आसपासका जिल्लामा समेत सर्वसाधारणहरु त्रसित बनेका छन् ।</p><p>-अन्नपूर्ण पोष्ट</p>

<p>खानी तथा भूगर्भ विभागले मुस्ताङको लोमान्थाङ क्षेत्रमा युरेनियमको परिमाण धेरै र गुणस्तर पनि उत्कृष्ट खालको भेटिएको जनाएको छ ।<br><br>उद्योग मन्त्री सोम प्रसाद पाण्डे सहित खानी तथा भू–गर्व विभागको प्रविधिक टोलीले, यसै हप्ता मुस्तांगको युरेनीयम खानी, नुनखानीको अवलोकन तथा अध्ययन गरेको थियो ।<br><br>स्थलगतरूपमा गरिएको अध्ययनपछि उद्योगमन्त्री सोमप्रसाद पाण्डेले अब लोमान्थाङमा युरेनियम अन्वेषणका लागि उद्योग मन्त्रालयले थप प्राविधिक टोली छिट्टै खटाउने बताउनुभयो । <br><br>“कानुन बनाउन पनि मन्त्रालय लाग्ने र त्यसपूर्व यसको सबै प्रक्रिया पूरा गर्न राज्यले कुनै कसर बाँकी नराख्ने उद्योगमन्त्री पाण्डेले जानकारी दिनुभयो ।<br><br>युरेनियमलाई इन्धन र परमाणु हतियार निर्माणका लागि कच्चापदार्थका रूपमा प्रयोग गर्न सकिन्छ । <br><br>भूगर्भ विभागका अनुसार, मकवानपुर, वैतडी र बझाङ जिल्लामा समेत युरेनियमको खानी भेटिएको छ । <br><br>खानी तथा भूगर्भ विभागका प्रमुख राजन पौडेलले स्थलगतरूपमा गरिएको अध्ययन र सङ्कलन गरिएको तथ्यबाट मुस्ताङको मुक्तिनाथ क्षेत्रमा पेट्रोलियम पदार्थ र तेताङमा नुनको खानी रहेको पुष्टि भएको बताउनुभयो । <br><br></p>

<p>सुदूरपश्चिमको पहाडी जिल्ला बझाङ केन्द्रबिन्दु बनाएर २१ पटक धक्का महसुस भएको छ । <br><br>भूकम्प मापन केन्द्र सुर्खेतका अनुसार ती धक्काको केन्द्रबिन्दु बझाङको सदरमुकाम चैनपुरबाट ११ किमी उत्तरपूर्व मयानामा रहेको छ ।</p><p>आज मात्रै बिहान ४ बजेर ३२ मिनेटमा ३.४ रिक्टरको पहिलो, ७ बजेर ८ मिनेटमा ३.८ रिक्टरको दोस्रो, अपराह्न १२ बजेर ७ मिनेटमा २.८ रिक्टर स्केलको तेस्रो धक्का तथा बाँकी दुई वटा साना धक्का गएका थिए । <br><br>बुधबार १६ पटक र आज बिहीबार पाँच पटक गरी २१ पटक धक्का गएको भूकम्प मापन केन्द्र सुुर्खेतका प्राविधिक सहायक तीर्थ दाहालले जानकारी दिनुभयो । <br><br>राष्ट्रिय भूकम्प मापन केन्द्रका प्रमुख लोकविजय अधिकारीले ‘गोरखा भूकम्प’पछि देशभरि नै ससाना धक्का महसुस भइरहेकाले यसमा डराउनुपर्ने अवस्था नरहेको बताउनुभयो । <br><br>यो गोरखा भूकम्पको परकम्प नभई नयाँ भूकम्प भए पनि डराउनुपर्ने अवस्था नरहेको तर सतर्क रहनुपर्ने उहाँले बताउनुभयो । <br><br><br></p>

<p>१६ असार, काठमाडौं ।<br>व्यवस्थापिका संसदको बिहिबारको बैठकमा विनियोजन विधेयक, २०७३ को विभिन्न शिर्षकहरुमाथिको छलफल अन्र्तगत शान्ति तथा पूनर्निर्माण मन्त्रालय, गृह मन्त्रालय, वन तथा भू–संरक्षण मन्त्रालय, शिक्षा मन्त्रालय, श्रम तथा रोजगार मन्त्रालय, खानेपानि तथा सरसफाई मनत्रालय र अर्थ मन्त्रालयको विभिन्न शिर्षक माथि छलफल जारी रह्यो ।<br><br>मन्त्रालयगत छलफलमा भाग लिने सांसदहरुले वजेट सवै क्षेत्रमा समान रुपमा वितरण नगरिएको र पहुँचका आधारमा वितरण गरिएको भन्दै सरकारले प्रभावकारी योजना निर्माणमा विशेष ध्यान दिनु पर्ने बताउनु भयो ।<br>सांसदहरुले शिक्षा क्षेत्रमा धनी र गरिवबीचमा रहेको शिक्षाको भिन्नताको अन्त्य हुने गरी नीजि र सामुदयिक शिक्षामा रहेको भिन्नता हटाइनु पर्ने र पहाडी ग्रामिण भेगमा योग्य शिक्षक पठाएर शिक्षाको गुुणस्तर सुधार गर्न सरकारले ध्यान दिनुपर्ने बताउनु भयो ।<br><br>संसदहरुले वन क्षेत्रको विकास गर्नका लागि आगलागी नियन्त्रण र तस्करहरुबाट वन फडानी रोक्ने&nbsp; गरी योजनाहरु ल्याउनु पर्ने, सामुदायिक र साझेदारी वनमा रहेको खिचातानि रोक्नु पर्ने, वन फडानी भएका ठाउँमा वृक्षरोपाण गर्ने&nbsp; र वन संरक्षण गर्ने गरी सरकार लाग्नु पर्ने बताउनु भयो ।<br><br>वजेटले यस अघिका सरकारले शहिद तथा वेपत्ता परिवारका लागि पहिलाका सरकारले ल्याएका विभिन्न योजनाहरुमा स्पष्ट धारणा नल्याएको र वजेटले धेरै विषयमा औपचारिकता मात्र पुरा गरेको आरोप पनि सांसदहरुले लगाउनु भयो ।<br><br>सांसदहरुले श्रम मन्त्रालयलाई जनताको मन्त्रालय बनाई म्यानपावरहरुले जनतालाई ठग्ने काम गरिरहेकाले त्यसलाई रोक्ने गरीे योजना ल्याउनु पर्ने बताउनु भयो । <br><br><br><b>व्यवस्थापिका संसदको बैठक<br></b>व्यवस्थापिका संसदको आजको बैठकमा सांसदहरुले राष्ट्रिय, क्षेत्रिय र जिल्लाका समसामयिक समस्याहरुबारे सदनलाई जानकारी गराउदै समाधानका लागि सरकारको ध्यानाकर्षण गराउनु भयो ।<br><br>बैठकको विशेष र शुन्य समयमा बोल्नसांसदहरुले हरेका बर्ष बाढी पहिरोबाट ठूलो परिणाममा जनधनको क्षति हुने गरेपनि राज्यबाट समयमै सचेतना अपनाउने तथा आवश्यक पूर्वतयारीको काम&nbsp; हुन नसकेको तर्फ संसदको ध्यानाकर्षण गराउनुभयो ।<br><br>सांसदहरुले लोकतान्त्रिक मधेसी मोर्चाले विगत नौ महिनादेखि संसद बहिस्कार गर्दै आएको तर्फ संसदको ध्यानाकर्षण गराउदै मोर्चाले उठाएका मागलाई बेवास्ता गरेर अघि बढन सक्ने अवस्था नरहेको भन्दै सभामुखकै पहलमा समिति गठन गरेर अघि बढन सुझाव दिनुभयो ।<br><br>आन्दोलनरत मधेसी मोर्चा लगायतका साना दलले आज पनि व्यवस्थापिका संसदकोे बैठक बहिष्कार गरेका छन् ।<br><br>बैठक शुरु हुनासाथ मधेसी मोर्चा सांसद उभिएर विरोध जनाउनु भयो । <br><br>त्यस लगत्तै संघीय समाजवादी फोरमका सांसद दिलबहादुर नेपालीले प्रमुख ठूला दलले संविधान बनाउने नाममा विश्वव्यापी लोकतान्त्रिक मान्यता विपरित उत्पीडित जनताको अधिकार कुण्ठित गरेको बताउनु भयो । <br><br><br></p>