<p>चितवन ।</p><p>यात्रुबहाक बस र ट्रिपर आज बिहान ९ः१५ बजे एक आपसमा ठक्कर खाँदा २६ जना घाईते भएका छन् ।</p><p>नारायणगढबाट गोर्खा जाँदै गरेको ना ५ ख ८६९४ नम्बरको यात्रुवाहक बस र विपरित दिशाबाट आउँदै गरेको बा ३ ख ९०१२ नम्बरको ट्रिपर भरतपुर महानगरपालिका वडा नम्बर १ रामनगर जंगलमा ठक्कर खाँदा २६ जना घाईते भएका हुन् ।</p><p>जिल्ला प्रहरी कार्यालय चितवनका प्रहरी नायब उपरीक्षक शिब शर्मा आचार्यका अनुसार घाईतेहरुको चितवन मेडिकल कलेज, भरतपुर अस्पताल र कलेज अफ मेडिकल साईन्सेज शिक्षण अस्पतालमा उपचार भईरहेको छ ।</p><p>उनीहरु मध्ये सात जना गम्भीर घाईते रहेका छन् । घाईते बसको चालक र यात्रुहरु हुन । ट्रिपर चालक फरार रहेको र उनको खोजीकार्य जारी रहेको शर्माले बताउनुभयो । </p>

<p><span style="line-height: 1.42857;">बिर्तामोड ।</span><br></p><p>बेपत्ता बालक मृत अवस्थामा भेटिएपछि भएको उग्र प्रदर्शनमा प्रहरीको गोली लागेर एक जनाको मृत्यु भएपछि बढको बिर्तामोडको विवाद डिएसपीको सरुवा र प्रदर्शनमा मारिएका व्यक्तिको परिवारलाई १० लाख दिने सहमतीपछि सामान्य बनेको छ ।</p><p><br></p><p>इलाका प्रहरी कार्यालय अनारमनीका प्रमुख डीएसपी राजकुमार सिलवाललाई जिल्ला तानेपछि उनको स्थानमा जिल्ला प्रहरी कार्यालय झापाका डीएसपी जितेन्द्र बस्नेतलाई विर्तामोडमा खटाइएको छ ।</p><p><br></p><p>झापाको बिर्तामोडमा भएको गोलीकाण्डमा मृत्यु भएका प्रदर्शनकारी अर्जुनधारा–११ का नरेश थापाको परिवारलाई सरकारले राहत स्वरुप १० लाख रुपैयाँ दिने निर्णय गरेको छ।</p><p><br></p><p>शनिबार इलाका प्रहरी कार्यालय अनारमनीमा बसेको राजनीतिक दल, स्थानीय प्रशासन र पीडित परिवारबीचको बैठकले यस्तो निर्णय गरेको हो ।</p><p><br></p><p>यस्तै किरिया खर्च स्वरुप नगरपालिका र जिल्ला समन्वय समितिले २५/२५ हजार रुपैयाँ दिने निर्णय समेत गरेको छ ।</p><p><br></p><p>मृतक परिवारको सन्तानलाई अध्ययनका लागि नगरपालिकाले खर्च व्यहोर्ने समेत सहमति भएको छ । बैठकले अर्जुनधाराका ११ वर्षीय बालक लक्ष्मण शिवाकोटीको हत्याको विषयमा पीडित परिवारको माग अनुसार पुनः दुई दिन थप अनुसन्धान गर्ने निर्णय पनि गरेको छ ।</p><p><br></p><p>दसैंको टीकाको दिन बेपत्ता भएका अर्जुनधारा ११ का शिवाकोटीको शव त्यसको भोलिपल्ट विर्तामोड १ वैंसावाडी स्थित झाडीमा फेला परेको थियो ।</p><p><br></p><p>शुक्रबार भएको घट्नापछि बिर्तामोडमा लगाइएको कर्फ्यु हट्दै सामान्य बनेको छ ।</p>

<p><span style="line-height: 1.42857;">बुटवल ।</span><br></p><p>नेकपा माओवादी केन्द्र निकट योंग कम्युनिष्ट लिग वाईसिएलका कार्यकर्ताले रुपन्देहीको शुद्धोधन गाउँपालिका बेलडाडाका किसानको धान लुटेको छ ।</p><p><br></p><p>स्थानिय मुनिव लोनियाको पाकेको धान थ्रेसर लगाउने तयारीमा राखेको अवस्थामा २०÷२२ जनाको समूहमा आएका वाईसीएल कार्यकर्ताले आफैंले थ्रेसर लगाएर लुटेर लगेका हुन ।</p><p><br></p><p>किसान लोनियाले २० क्विन्टल धान लुटिएको बताएका छन् । उनले आफ्नो धान कार्तिक ५ गते नै लुटिएको र त्यस लगत्तै जिल्ला प्रहरी कार्यालयमा उजुरी दिएको बताए । तर, प्रहरीले धान लुटिएको विषयमा अनुसन्धान नगरेको उनको आरोप छ ।</p><p><br></p><p>वाईसीएल प्रदेश ५ का सदस्य शम्भु लोनियाको नेतृत्वमा आएको टोलीले धान नियन्त्रणमा लिएको हो । उनीसंगै शुद्धोधन गाउँपालिका उपाध्यक्ष इन्द्र गैरे, हिमाल गैरे लगायत सहभागी थिए ।</p><p><br></p><p>वाईसीएल नेता शम्भु, मुनिव लोनियाका माइलो दाइका छोरा हुन । दाजुहरुको धम्कीका कारण मुनिवले प्रहरीको सहयोग लिएर धान रोपेका थिए । त्यही धान भित्र्याउने समयमा वाईसिएलले झण्डा गाड्दै नियन्त्रणमा लिएको हो ।</p>

<p><span style="line-height: 1.42857;">जनकपुरधाम ।</span><br></p><p>आगामी मंसिर ७ गते हुने श्री सीताराम विवाह पञ्चमी महोत्वस यस पटक पनि ७ दिने कार्यक्रमको आयोजना गरेर भव्य रुपमा मनाउने भएका छन् ।</p><p>श्रीसीताराम महोत्सव २०७४ को विषयमा आज जनकपुरधामको जानकी मंन्दिरमा आयोजना गरिएको विषेश वैठकवाट विगत वर्ष भन्दा पनि यस पटक भव्य रुपमा विवाहपञ्मी महोत्सव मनाउने निर्णय भएको छ ।</p><p>विवाह पञ्चमी महोत्सव अन्तर्गत २ नगर दर्शन, ३ गते फूलवारीलिला, ४ गते धनुषयज्ञ, ५ गते तिलकोत्सव, ६ गते मटकोर, ७ गते विवाह उत्सव तथा ८ गते रामकलेवा संगै विवाहपञ्चमी महोत्सवको समापन गर्ने कार्यक्रम रहेको छ ।</p><p>जानकी मंन्दिरका छोटे महन्थ रामरोशन दासको अध्यक्षतामा भएको सो वैठकवाट मंन्दिरका महन्थको संयोजकत्वमा विवाहपञ्चमी मूला समारोह समिति गठन गर्ने निर्णय गरेको छ । यसै गरि विभिन्न उपसमितिहरु पनि मनाउने भएका छन् ।</p><p>यस पटक पनि भारतको अयोध्यावाट आउने जन्तिलाई भव्य रुपमा स्वागत गर्ने निर्णय पनि गरेको छ । प्रत्येक वर्ष मंसिर शुक्लपक्ष पञ्चमी तिथिका दिन जनकपुरधाममा रामजानकी विवाहपञ्चमी महोत्सवको आयोजना हुँदै आएको छ । &nbsp;</p><p>वैठकमा जनकपुृर उपमहानगरपालिकाका निर्वाचित नगरप्रमुख लालकिशोर साह, उपप्रमुख रिता कुमारी मिश्र, विभिन्न वडाका अध्यक्षहरु, धनुषाका प्रमुख जिल्ला अधिकारी दिलीप चापागाई सुरक्षा निकायका प्रमुखहरु, विभिन्न दलका नेताहरु, समाजसेवी, युवा क्लवका अध्यक्षहरु पनि सहभागि रहनु भएको थियो । &nbsp;</p><p>वैठकमा बोल्दै जनकपुर उपमहानगरपालिकाका प्रमुख लालकिशोर साहले जनकपुर उपमहानगरपालिकाले विवाहपञ्चमी महोत्सवलाई भव्यता दिनका लागि सवै प्रकारको सहयोग गर्ने पनि बताउनु भयो ।&nbsp;</p>