टप नेपाल न्यूज 
नुवाकोट । तारकेश्वर गाउँपालिकाको १३औँ गाउँसभा दाङसिङ रयलछापस्थित गाउँ कार्यपालिकाको नवनिर्मित प्रशासकीय भवनमा भव्य रूपमा सम्पन्न भएको छ।
गाउँसभामा गाउँपालिका अध्यक्ष शिव अधिकारी ‘अविरल’ले आगामी आर्थिक वर्ष २०८३/०८४ का लागि प्रस्तुत गर्नुभएको वार्षिक नीति तथा कार्यक्रम सर्वसम्मत रूपमा पारित भएको हो।
पारित नीति तथा कार्यक्रममा शिक्षा, स्वास्थ्य, सामाजिक सुरक्षा, पूर्वाधार विकास, कृषि तथा सीप विकासलाई प्राथमिकतामा राखिएको छ। विद्यालय कर्मचारी तथा लेखापाललाई गाउँपालिकाले उपलब्ध गराउँदै आएको अतिरिक्त सुविधालाई निरन्तरता दिँदै मासिक ३ हजार रुपैयाँ थप वृद्धि गर्ने व्यवस्था गरिएको छ।
त्यसैगरी ज्येष्ठ नागरिक, एकल महिला, अपाङ्गता भएका व्यक्ति, टुहुरा तथा अन्य लक्षित वर्गका नागरिकहरूलाई सामाजिक सुरक्षा भत्ताका अतिरिक्त प्रोत्साहन तथा जीविकोपार्जनमा सहयोग पुग्ने गरी थप सहयोग रकम उपलब्ध गराउने नीति लिइएको छ।
शिक्षा क्षेत्रलाई विशेष प्राथमिकतामा राख्दै दाङसिङ माध्यमिक विद्यालयमा स्नातक तह सञ्चालन का लागि बजेट व्यवस्था गरिएको छ। विद्यालयहरूको शैक्षिक गुणस्तर अभिवृद्धि गर्न मासिक प्रगति विवरणको समीक्षा, कक्षा १० का विद्यार्थीहरूका लागि अतिरिक्त कक्षा सञ्चालन तथा प्रविधिमैत्री डिजिटल शिक्षाको सुरुवात गरिने भएको छ।
विद्यार्थीहरूको व्यवहारिक तथा सीपमूलक शिक्षामा जोड दिन विद्यालयहरूमा “बुक फ्री डे” र “स्किल अफ फ्राइडे” कार्यक्रम सञ्चालन गरिने तथा उनीहरूको रुचिअनुसार सीप सिकाउन आवश्यक उन्नत सामग्रीको व्यवस्था गरिने नीति तथा कार्यक्रममा उल्लेख छ।
पूर्वाधार विकासतर्फ रङ्गशाला निर्माण, खेलकुद पूर्वाधार, सडक सञ्जाल विस्तार, सिँचाइ तथा खानेपानी आयोजनाहरूलाई विशेष प्राथमिकताका साथ कार्यान्वयन गरिने भएको छ। साथै सामाजिक न्याय, समावेशिता, महिला, ज्येष्ठ नागरिक तथा विपन्न वर्गको सीप विकास, स्वावलम्बन र सशक्तीकरणका लागि विशेष कार्यक्रम सञ्चालन गरिने जनाइएको छ।
गाउँसभा समापनका अवसरमा अध्यक्ष शिव अधिकारी अविरल ले गाउँसभाको सफल आयोजनामा सहयोग पुर्याउने जनप्रतिनिधि, कर्मचारी, राजनीतिक दल, सञ्चारकर्मी तथा सम्पूर्ण सरोकारवालाप्रति आभार व्यक्त गर्नुभयो।
उहाँले पारित नीति तथा कार्यक्रम र आगामी बजेटको प्रभावकारी कार्यान्वयनमार्फत गाउँपालिकाको समग्र विकास, सेवा प्रवाहको गुणस्तर सुधार तथा नागरिकको जीवनस्तर उकास्न सबै पक्षको साथ, सहयोग र मार्गदर्शन आवश्यक रहेको बताउनुभयो।
प्रतिक्रिया