<p><span style="line-height: 1.42857143;">काठमाडौं,भदौ १४ । प्रधानमन्त्री पुष्पकमल दाहाल प्रचण्डले आफ्नो आसन्न भारत भ्रमणको टोली सानो बनाउन परराष्ट्र मन्त्रालयलाई निर्देशन दिएका छन् । प्रधानमन्त्रीले परराष्ट्रमन्त्री प्रकाशशरण महत र सचिव शंकरदास बैरागीलाई भ्रमण टोली सानो बनाउन गृहकार्य गर्न निर्देशन दिएका हुन् । प्रधानमन्त्री प्रचण्ड यही भदौ ३० देखि चार दिने भारत भ्रमणमा जाँदैछन् । आजको अन्नपूर्ण पोष्ट दैनिकमा खबर छ । परराष्ट्र मन्त्रालय र प्रधानमन्त्री कार्यालयले भारत भ्रमण टोली र एजेण्डाबारे गृहकार्य गरिरहेका छन् । भ्रमण दल कति सदस्यीय हुने भन्ने अझै निधो भइनसकेको परराष्ट्र अधिकारीले बताए ।</span><br></p>

<p><span style="line-height: 1.42857143;"><b>‘संविधान संशोधन प्रक्रिया अघि बढ्छ’</b></span><br></p><p>काठमाडौं, भदौ १३ । कानुनमन्त्री अजय शंकर नायकले संविधान कार्यान्वयको लागि आवश्यक पर्ने ऐन, कानुनहरु द्रुत गतिमा निर्माण भैरहेको बताएका छन् । सोमबार रिपोर्टर्स क्लब नेपालले आयोजना गरेको साक्षात्कारमा बोल्दै मन्त्री नायकले संविधान कार्यान्वयनको लागि आवश्यक पर्ने सबै ऐन तथा कानुनहरु द्रुत गतिमा निर्माण भैरहेको बताएका हुन् । उनले भने,‘प्राथमिकताका आधारमा अहिले ऐन तथा कानुनहरु धमाधम निर्माण गर्ने काम भैरहेको छ, मैले सम्बन्धित निकायलाई निर्देशन दिईसकेको छु ।’</p><p><br></p><p>साक्षात्कारमा बोल्दै मन्त्री नायकले सरकारको प्रमुख दायित्व नै संविधान कार्यान्वयन गर्नु भएकोले आवश्यक विद्येयकहरु तिव्र गतिमा निर्माण भैरहेको जनाए । उनले अघि थपे,‘संविधान कार्यान्वयन हुँदैन कि भनेर अहिले शंका–उपशंका भैरहेको छ, ढुक्क हुनुहोस संविधान कार्यान्वयन हुन्छ ।’&nbsp;</p><p><br></p><p>मन्त्री नायकले एक वर्षभित्र निर्माण गर्नुपर्ने कानुनहरु असोज ३ गतेभित्रै निर्माण गर्न समेत आफूले निर्देशन दिएको जनाए । भाषा आयोग, उच्च अदालत गठन, न्याय परिषद, न्याय सेवा गठन लगायत अन्य कुराहरुमा समेत कानुन निर्माण छिट्टै गरिने मन्त्री नायकको विश्वास थियो ।&nbsp;</p><p>त्यस्तै उनले तीन वर्षभित्र गर्नुपर्ने कामहरु समेत सरकारले प्राथमिकताका आधारमा गर्ने तयारी गरेको स्पष्ट पारे । नायकले शान्तिप्रक्रियालाई निश्कर्षमा पुर्याउन टिआरसीसम्बन्धी बनेको विद्येयक संशोधन गर्ने गृहकार्यमा आफू जुटेको स्पष्ट पारे ।&nbsp;</p><p>नायकले संविधानका ३१५ वटा ऐनमा शब्द संशोधन वा पूर्नलेखन गर्नुपर्ने भएकाले त्यसलाई पनि चाँडै टुँक्याउनेगरि काम थालेको जनाए ।&nbsp;</p><p>स्थानीय निकायको चुनाव हुन्छ</p><p>उनले स्थानीय निकायको निर्वाचनसम्बन्धी बनेको विद्येयक संशोधन गरेर गृहमन्त्रालयमा पेश गरेको समेत जनाए । उनले अघि थपे,‘अहिले स्थानीय निकायको चुनाव हुन्छ कि हुँदैन भनेर व्यापक चर्चा भएको छ, चुनावको लागि राष्ट्रिय सहमतिको आवश्यक छ, सरकार अहिले गृहकार्यमा जुटेको छ ।’ स्थानीय निर्वाचसम्बन्धी बनेको विद्येयकको डा«फ्ट संसदमा टेबुल गर्ने उनले बताए ।&nbsp;</p><p>संविधान कार्यान्वयनको लागि पनि तीनवटै निकायको निर्वाचन संविधानले निर्दिष्ट गरेबमोजिम आगामी ०७४ माघ ७ गतेभित्रै सम्पन्न गर्नुपर्ने बाध्यता रहेकोले सरकारले त्यसको तयारी गरेको उनले स्पष्ट पारे । ‘‘पहिले स्थानीय तहको निर्वाचन गर्नुपर्छ, हामी यसको तयारीमा जुटिसकेका छौं, उनले थपे ।’</p><p>छिट्टै संविधान संशोधन प्रस्ताव अघि बढ्छ</p><p>उनले असन्तुष्टहरुको माग सम्बोधन गर्न सरकारले छिट्टै संशोधन प्रस्ताव अघि बढाउने जनाए । उनले अघि थपे,‘समय तोक्दिन तर छिट्टै संशोधन प्रस्ताव अघि बढ्छ, दलहरुवीच आन्तरिक छलफल चलिरहेको छ, एउटा निश्कर्ष आएपछि यो प्रक्रिया अघि बढ्छ ।’&nbsp;</p><p>संविधान संशोधनमा एमालेले नसघाउने निर्णय गरेको छ नि भन्ने पत्रकारको जिज्ञासामा उनले भने,‘एमाले पनि यो देशको जिम्मेवार पार्टी, उसले सहयोग गर्छ भन्नेमा म चाहीँ आशावादी छु ।’ उनले एमालेका नेताहरुले राष्ट्रिय नेताको भूमिका निर्वाह गर्नुपर्ने समेत बताए ।&nbsp;</p><p>संविधानप्रति असन्तुष्ट मधेशी मोर्चासँग भएको तीन बुँदे सहमति कार्यान्वयनतर्फ उन्मुख रहेको उल्लेख गर्दै मन्त्री नायकले भने,‘सरकारले महत्वपूर्ण निर्णय गरिसकेको छ, अब मधेशको समस्या साधान हुन्छ भन्नेमा म पुर्ण विश्वस्त छु, यो कुरा स्वयम मोर्चाका नेताहरुले पनि महशुस गर्नुभएको छ ।’&nbsp;</p><p>मधेश लगायत सबैको समस्या समाधान गर्ने कुरामा प्रधानमन्त्री पुष्पकमल दाहाल प्रचण्ड गम्भिर रहेको उनको विश्वास थियो । उनले अघि थपे,‘प्रधानन्त्रीज्यूले प्रशंसनीय कदम चाल्नुभएको छ । उहाँले सबैलाई मिलाएर लैजान सक्नुहुन्छ ।’&nbsp;</p><p>सरकारको प्राथमिकतामा सुशासन, भुकम्पपछिको मुलुकको पूर्ननिर्माण, जनतालाई प्रत्यक्ष राहत हुने कार्यक्रम र आर्थिक समृद्धि रहेको उल्लेख गर्दै यही दिशामा काम भैरहेको जनाए । उनले भने,‘जनतालाई प्रत्यक्ष राहत दिने कुरामा सरकार पूर्ण जिम्मेवार छ, हामी सुशासनदेखि मुलुक समृद्धि यही सेरोफेरोमा सम्भब छ भन्ने हिसावले काम गरिरहेका छौं, सबैको साथ र सहयोग आवश्यक छ ।’</p><p><br></p>

<p><span style="line-height: 1.42857143;">भक्तपुर,भदौ १३ । नेपाल मजदुर किसान पार्टीका अध्यक्ष नारायणमान बिजुक्छेंले सभामुखको भूमिकामा प्रश्न खडा भएको बताउनु भएको छ ।</span><br></p><p>कार्यक्रम बोल्दै बिजुक्छेंले आफ्नो पदिय दायित्व भन्दा पनि राजनीतिक दलको कार्यकर्ताको भुमिकामा देखा पर्दा सहि ब्यक्तिलाई सहि स्थान दिन नसक्नुको परिणाम सभामुखको कार्यसम्पादनले प्रष्टाएको बताउनु भएको हो ।</p><p>बिजुक्छेंले सार्क राष्ट्रभित्रका लागि जसरी संयुक्त बिद्युत सम्झौता गरिँदै छ यसको साँचो भारतमा रहने भएकाले नेपालका लागि हित नभएको भन्दै उहाँले अघिल्लो सरकारमा उर्जा मन्त्री टोपबहादुर रायमाझी हुँदा प्रस्ताब गर्नु र हाल माओबादीकै नेतृत्वको सरकारमा संसदमा बिधेयक प्रस्तुत गर्नुले पनि वर्तमान सरकारको भारतप्रतिको झुकाप प्रष्टाएको बताउनु भएको छ । उहाँले नेपालको हरेक निर्णयको चाबी भारतसँग भएको समेत बिस्तारै प्रष्टिँदै गएको उहाँले बताउनु भयो ।</p><p>दक्षिण एसिसामा जसरी संयुक्त सेनाको फौज बनाउने र त्यसको प्रमुख भारतकै सेनाको पदाधिकारी रहने तयारी भारतले गरिरहेको छ यसले अन्य देश स्वतन्त्र र सार्वभौम भन्ने शब्दमा मात्र सिमित रहने उहाँको टिप्पणी छ ।</p><p>प्रचण्डको नेतृत्वको सरकार गठनसँगै जसरी बिशेष दुतका रुपमा भारतमा बिमलेन्द्र निधिलाई पठाईयो यो गलत भएको भन्दै उहाँले कुस्ती खेल्न पठाउनु पर्ने ब्यक्तिलाई दुतको रुपमा पठाउनु प्रधानमन्त्रीको त्रुटि भएको उहाँको भनाई छ ।</p><p>भारतकै इशारामा सरकार निर्माण भएको भनाईहरुको पुष्टि वर्तमान सरकारमा जाने मन्त्रीहरुको नाम पहिले नै दिल्लीले निर्धारण गरेको भनाई र पछि उनै नामका मन्त्रीहरु हुनुले प्रमाणित भएको उहाँले बताउनु भयो ।</p><p>स्थानिय निकायको निर्वाचनको समय जसरी तोकिएको छ यो सम्भव नरहेको भन्दै १४ अञ्चल ७५ जिल्लाकै आधारमा निर्वाचन नगरिए दुई तीन वर्षसम्म पनि निर्वाचन नहुने उहाँको दाबी छ । तीनवटा निर्वाचन एकै समयमा गर्न नसकिने निर्वाचन आयोगले समते बताई रहेका बेला जसरी वर्तमान सरकरले लिंडे ढिपिमा लागिरहेको छ यसले पनि प्रष्टाउँछ कि सरकारमा आउन छिमेकीले लगाएको गुण तिर्न उनीहरु लागि पर्ने र नेपालमा अस्थिरता बढाउँदै लगाएको गुण तिर्न लागि परेको आरोप लगाउनु भयो ।</p><p>भारतीय राजदुतले नेपालमा गरिरहेको क्रियाकलाप कुटनीतिक मर्यादा भन्दा बाहिर रहेको र नेपालको राजदुत फिर्तासँगै भारतले पनि आफ्नो राजदुत फिर्ता बोलाउनु पर्ने भएता पनि नेपाल सरकारको निरहिता र &nbsp;भारतको हेपाहा प्रबृतिकै कारण रे ले नेपालमा मनपरि काम गरिरहेको उहाँले बताउनु भयो ।</p><p><br></p>

<p>१३ भदौ, काठमाडौं ।<br>प्रधानमन्त्री पुष्पकमल दाहाल ‘प्रचण्ड’ले आफू भारत भ्रमणमा जानुअघि विज्ञहरु बोलाएर राष्ट्रिय महत्वका विषयहरुमा नीतिगत र प्राविधिक राय लिने बताउनुभएको छ ।<br><br>सोमबार राष्ट्रिय सरोकार अभियान नेपालको टोलीसँगको भेटमा प्रधानमन्त्रीले उक्त कुरा बताउनुभएको हो ।</p><p>प्रधानमन्त्रीले भन्नुभयो-‘तपाईहरुले धेरै गम्भीर विषयहरु उठाउनुभएको छ । राष्ट्रिय महत्वका विषयहरुमा राष्ट्र हित विपरित निर्णय नहुन् भन्नेमा तपाईले गराएको ध्यानाकर्षण महत्वपूर्ण छ । यहाँहरुले भनेजस्तै भ्रमण अघि नै उच्चस्तरीय सम्मेलनको आयोजना गर्न त समय पुग्दैन । तर, भ्रमणमा जानुअघि विज्ञहरु बोलाएर नीतिगत र प्राविधिक राय लिनेछु ।’</p><p>प्रधानमन्त्रीले निजगढ काठमाडौं द्रुत मार्ग 'फास्ट ट्रयाक' विदेशी कम्पनिलाई दिने आफ्नो कुनै सोच नभएको प्रष्ट पार्नुभएको छ । प्रधानमन्त्रीले भन्नुभयो, ‘फास्ट ट्रयाक नेपालले नै बनाउनुपर्छ भन्ने अघिल्लो सरकारको निर्णय मेरै पहलमा भएको हो । त्यतिबेला म उच्चस्तरीय राजनीतिक समितिको संयोजक थिएँ । मेरै जोडबलमा ओलीजीको सरकारले त्यो निर्णय गरेको हो । फास्ट ट्रयाक विदेशी कम्पनिलाई दिने भन्नेबारे चलाइएका हल्ला पूर्णतः निराधार हुन् । यो कुरामा सबै प्रष्ट हुन जरुरी छ ।’<br><br>प्रधानमन्त्रीले आफू धेरै बोल्नेभन्दा धेरै गर्ने ठाउँमा भएको जोड दिँदै भन्नुभयो, ‘अहिले धेरै भन्नु छैन, धेरै गर्नुछ । तपाईहरुले राष्ट्रिय चिन्तासहित राखेका विषयमा म गम्भीर छु । चुनौतिहरु थुप्रै छन् । मिलेर सामना गरेर मात्र यसलाई अवसरमा बदल्न सकिन्छ ।’ प्रधानमन्त्रीले संविधान कार्यान्वयन र राष्ट्रिय एकता सुदृढ गर्न सबैलाई मिलाएर लानुपर्ने बताउँदै भन्नुभयो, ‘संविधान कार्यान्वयन गर्ने दायित्व हाम्रो काँधमा आएको छ, राष्ट्रिय एकता सुदृढ गर्नुछ । यसका लागि सबै शक्ति शक्तिहरुसँग सहकार्य गर्न जरुरी छ । तर, मेरो नेतृत्वको सरकारले सहकार्य गर्दा कसैसँग राष्ट्रिय हित विपरित सम्झौता गर्दैन ।’</p><p>प्रधानमन्त्रीले राष्ट्रिय स्रोत साधन भएर पनि गरीब हुनुपर्ने र सम्पन्न हुने नाममा राष्ट्रियतामाथि खेलबाड गर्ने दुवै प्रवृत्ति रहेको भन्दै आफू दुवै अतिबाट बचेर सन्तुलित ढंगले अगाडि बढ्ने बताउनुभयो । भेटमा प्रधानमन्त्रीले माथिल्लो कर्णालीको ‘पिटिए’को बेला माओवादी केन्द्र प्रतिपक्षमा रहेको जानकारी गराउँदै माथिल्लो कर्णालीको विषयमा माओवादी केन्द्रको असहमति रहेको जानकारी गराउनुभयो ।</p><p>भेटमा पूर्व गर्भनर डा. दिपेन्द्रबहादुर क्षेत्री, विज्ञहरु प्रा.डा. हरि पण्डित, डा. गोपाल सिवाकोटी ‘चिन्तन’, डा. द्धारिकालाल ढुंगेल, रत्नसागर श्रेष्ठ, लोकबहादुर रावत, भरतबहादुर शाही, डा. मंगल बिश्वकर्मा लगायतले निजगढ–काठमाडौं द्रुतमार्ग, माथिल्लो कर्णाली, अरुण तेस्रो, उपल्लो मस्र्याङ्दी जलविद्युत आयोजना लगायतका राष्ट्रिय आयोजनाहरु नेपाली लगानीमा नै निर्माण गर्न प्रधानमन्त्रीको ध्यानाकर्षण गराउनुभएको थियो । <br></p>