<p>९ कार्तिक, काठमाडौं ।<br>अख्तियार दुरुपयोग अनुसन्धान आयोग प्रमुख लोकमानसिंह कार्कीविरुद्ध सर्वसाधरणसमेतले महाभियोग सिफारिस समितिमा उजुरी दिन पाउने भएका छन् । <br><br>समितिको कार्यविधि तय गर्दै सिफारिस समिति मातहतको उपसमितिले कार्कीका काम कारबाहीविरुद्ध सर्वसाधरणले पनि उजुरी दिनसक्ने व्यवस्था गरेको खबर आजको गोरखापत्रमा छापिएको छ।&nbsp; तर, सर्वसाधरणले उजुरी दिन पाउने व्यवस्था उपसमितिले कार्यविधिमा राखे पनि उजुरी दर्ताअघि कम्तीमा तीन जना सांसदले प्रमाणित गर्नुपर्नेछ।<br><br>उपसमितिले कार्यविधिलाई करिब अन्तिम रूप दिएको छ ।&nbsp; मङ्गलबार दिउँसो बस्ने बैठकले मात्र कार्यविधिबारे अन्तिम निर्णय गर्नेछ ।&nbsp; उपसमितिको प्रतिपेदन समितिमा पेस भई पारित भएपछि कार्यान्वयनमा आउनेछ ।&nbsp; उपसमिति सदस्य राष्ट्रिय प्रजातन्त्र पार्टी नेपालका संसदीय दलका प्रमुख सचेतक दिलनाथ गिरीले उपसमितिले सर्वसाधरणले उजुरी दिन सक्ने व्यवस्था गरेको जानकारी दिए। उजुरीकर्ता सर्वसाधरणलाई समितिले आवश्यक परे थप प्रमाणसमेत माग्न सक्नेछ । <br><br>संसद्को कार्यसञ्चालन नियमावलीले नै समितिको धेरै कार्यविधि तय गरेको छ ।&nbsp; नियमावलीले आरोपितलाई सफाइको मौका दिनुपर्ने समयसीमा, काम सुरु गरेपछि प्रतिवेदन दिने समय, विज्ञसँग राय लिन सक्ने व्यवस्था नियमावलीमा नै गरेको छ ।&nbsp; अन्य समितिको हकमा यस्ता प्राविधिक विषय कार्यविधिले नै तय गर्ने गरेको छ ।<br><br>समितिमा महाअभियोग दर्ताका हस्ताक्षरकर्ता नै समितिमा रहेको लगायतका प्राविधिक प्रश्न पनि उपसमितिको बैठकमा उठेका छन् ।&nbsp; हस्ताक्षरकर्ता समितिमा रहेको प्रश्न उपसमिति बैठकमा हस्ताक्षरकर्ता सांसद नै सिफारिस समितिमा भएको भन्ने प्रश्न उठेको छ ।&nbsp; अभियोग लगाउने सांसद नै सदस्य भएपछि आरोपितले न्याय पाउँछन् वा पाउँदैनन् भन्नेमा प्रश्न उठेको हो ।&nbsp; ११ सदस्यीय महाभियोग सिफारिस समितिमा प्रतिनिधित्व गर्ने सदस्यमध्ये काँग्रेसका चार सदस्यले हस्ताक्षर गरेका छैनन् । <br><br>यस्तै राप्रपा नेपालका गिरीले पनि हस्ताक्षर गर्नुभएको छैन ।&nbsp; समितिमा रहेका माओवादी केन्द्रका दुवै सदस्यले हस्ताक्षर गरेका छन् भने, एमालेका चारै सदस्यले नै हस्ताक्षर गरेका छन्।यस्तै, सर्वोच्चमा विचराधीन कार्कीको योग्यतासम्बन्धी मुद्दामा पक्ष भई वकालत गरेका माओवादी केन्द्रका सांसद रामनारायण बिडारी पनि समितिमा सदस्य छन्। संसद्को नियमावलीको नियम २३३ ९ज० मा कुनै स्वार्थ जोडिने विषय आफूले प्रतिनिधित्व गर्ने समितिमा भए सोको जानकारी सदस्यले दिनुपर्ने व्यवस्था छ ।<br><br>प्रस्तावमा छलफल हुँदै<br><br>संसद्मा पेस भएको महाभियोग प्रस्ताव मङ्गलबारबाट छलफल हुँदैछ ।&nbsp; संसद् सविचलायले मङ्गलबार दिउँसो प्रस्ताव पेस गरी सैद्धान्तिक छलफल गर्ने सम्भावित कार्यसूची सार्वजनिक गरिसकेको छ । <br><br>गत आइतबारको बैठकमा नै प्रस्ताव पेस गरी सैद्धान्तिक छलफल गर्ने तयार भए पनि अन्तिम समयमा छलफलको दिनमात्र तोकेर छलफल स्थगित गरिएको थियो ।&nbsp; नेपाली काँग्रेसले दुई दिन बैठक स्थगित गर्न आग्रह गरे पनि संवैधानिक प्रावधानअनुसार सभामुखले एक दिनमात्र बैठक स्थगित गरेकी थिइन्।<br><br>संसद्को प्रक्रियाअनुसार सैद्धान्तिक छलफल भएपछि प्रस्ताव महाभियोग सिफारिस समितिमा जानेछ ।&nbsp; समितिले उक्त प्रस्तावमा अनुसन्धान गरी बढीमा ३० दिनभित्र संसद्लाई महाभियोग लाग्ने नलाग्ने विषयमा कारणसहित प्रतिवेदन दिनेछ ।&nbsp; समितिका प्रतिवेदनमा संसद्मा छलफल हुनेछ।<br></p>

<p>९ कार्तिक, काठमाडौं ।<br><br>भदौको अन्तिम साता रोल्पाको एक प्रहरी चौकी हतियारधारी समूहले घेरा हाल्यो । रातमा बन्दुक र पेस्तोल बोकेर चौकी आक्रमण गर्न १०–११ जनाको समूह पुगेको थियो । शंकास्पद व्यक्ति वरिपरि रहेको आशंकामा सेन्ट्रीका प्रहरीले ढुंगा हाने । प्रहरीले थाहा पाएपछि त्यो समूह भाग्यो ।</p><p>चौकी आक्रमण गरेर सशस्त्र युद्धको घोषणा गर्ने योजनामा रहेको मंगोल मूलबासी राष्ट्रिय फोर्स पार्टीको समूह थियो त्यो । त्यसपछि अरू ठाउँमा आक्रमणको तयारी गरेको उक्त भूमिगत पार्टीका अध्यक्ष उपेन्द्र घर्तीमगरसहित १३ नेता–कार्यकर्ता हतियारसहित पक्राउ परेका छन् । यो खबर आजको नयाँ पत्रिकामा छापिएको छ।<br><br>‘आफूहरूसँग थोरै हतियार भएकाले आक्रमण गर्न गएर पनि उनीहरू फर्किएका थिए,’ नेपाल प्रहरीको विशेष ब्युरोका डिआइजी बमबहादुर भण्डारीले भने, ‘राजनीतिक आवरणमा उनीहरू आपराधिक गतिविधिमा संलग्न थिए ।’<br><br>आठजना काठमाडौंमा र पाँचजना रोल्पामा पक्राउ परेका हुन् । उनीहरूबाट नौ थान बन्दुक, दुई पेस्तोल, दुई रिभल्वर र विस्फोटक पदार्थ बरामद भएको प्रहरीले जनाएको छ ।<br><br>प्रहरीले उपत्यका, सिन्धुपाल्चोक र रोल्पामा संयुक्त अप्रेसन चलाएर सशस्त्र युद्ध सुरु गर्न लागेको उक्त पार्टीका नेता÷कार्यकर्तालाई पक्राउ गरेको हो । उनीहरूले रोल्पामा एउटा तथा सिन्धुपाल्चोकको ग्रामिण क्षेत्रका दुई प्रहरी चौकीमा आक्रमणको योजना बनाएका थिए ।</p><p>रोल्पामा सो पार्टीको एसटिफ कमान्डर रहेका डेपुटी सुवास राईको नेतृत्वमा आक्रमण गर्न गएको थियो । तर, आक्रमण असफल भएपछि अन्यत्र योजना बनाएका थिए । बैंक र रात्रिबस लुट्ने तयारी गर्दा उनीहरू पक्राउ परेको महानगरीय प्रहरी आयुक्त एआइजी प्रतापसिंह थापाले सोमबार आयोजित पत्रकार सम्मेलनमा बताए ।<br><br>प्रहरीका अनुसार रुकुमको उच्च भेगमा उनीहरूले सैन्य तालिमसमेत गरेका थिए । प्रहरीमा भर्नाजस्तै लडाकु भर्नामा पनि मापदण्ड बनाएका थिए । हतियारसम्बन्धी तालिम दिएको प्रहरीले जनाएको छ ।<br><br>पक्राउ पर्नेमा पार्टी अध्यक्ष उपेन्द्र घर्ती, पूर्वक्षेत्रीय इन्चार्ज पृथ्वीनारायण लिम्बू, मध्य क्षेत्रीय इन्चार्ज टेम्डी शेर्पा छन् । त्यस्तै, केन्द्रीय सदस्यसचिव पालुवाङ लिम्बू, लडाकु कमान्डर बनाइएका सुवास राई र अन्य कार्यकर्ताहरू रविन श्रेष्ठ, वनबहादुर स्याङ्बो, अजय तामाङ, रामबहादुर मगर, लोकबहादुर मगर, चन्द्रवीर घर्तीमगर, दुजमान घर्तीमगर र जोगबहादुर घर्तीमगर छन् ।<br><br>०७२ मा गठन भएको सो फोर्सका नेता सबैजसो आपराधिक पृष्ठभूमिका छन् । उपेन्द्र घर्तीमगरको मंगोल नेसनल पार्टी, पृथ्वीनारायण लिम्बूको किरात मूलबासी राष्ट्रिय फोर्स तथा टेम्डी शेर्पाको संयुक्त जातीय मुक्ति मोर्चा समायोजन गरेर सो फोर्स स्थापना गरेको डिआइजी भण्डारीले बताए ।<br><br>जातीय नारा दिएर पार्टीलाई आपराधिक गतिविधिमार्फत चर्चामा ल्याई पैसा उठाउनु नै उनीहरूको प्रमुख उद्देश्य रहेको एआइजी प्रतापसिंह थापा बताउँछन् । रुकुम, रोल्पालगायत जिल्लामा उनीहरूको चन्दाआतंक थियो । पछिल्लो समय उनीहरूले हातहतियार संकलनलाई तीव्रता दिएका थिए । पूर्व, मध्य र पश्चिम गरी आफ्नो संगठनलाई तीन क्षेत्रमा विभाजन गरेका थिए । मंगोल नेसनल आर्मी नामक भ्रातृ संगठन स्थापना गरी त्यसअन्तर्गत मंगोल मुक्ति सेना, मंगोल मुक्ति कमान्डो तथा स्पेसल टाक्सफोर्ससमेत बनाइएको थियो । गत वर्ष नै उनीहरूले रुकुमको जाङखार खोलामा सैन्य तालिमसमेत दिएका थिए ।<br><br>आफ्नो परिचय लुकाउन उनीहरूले नक्कली नागरिकतालगायत कागजपत्र बनाउने गरेको प्रहरीले जनाएको छ । पछिल्लो समय ग्रामीण क्षेत्रका प्रहरी चौकीमा आक्रमण गरी हतियार लुट्ने योजना बनाएका थिए । बैंक तथा सुनपसलसमेत लुट्न उनीहरूले रेकी गरिसकेको एआइजी प्रतापसिंह थापाले बताए । रुकुममा यार्सागुम्बा लुट्ने योजना बनाएका थिए भने दुईपटक बस लुट्ने योजना असफल भएको अनुसन्धानमा खुलेको छ । सो पार्टीका तल्लो तहका नेता भने फरार रहेको डिआइजी बमबहादुर भण्डारीले बताए ।<br></p>