<p>ककनी । नुवाकोटको ककनी गाउँपालिकामा गाई भैसी पाल्ने किसानले सुत्केरी भत्ता पाउने भएका छन। गाई भैँसी व्याएपछि किसानलाई तीन हजार रुपैयाँ सुत्केरी भत्ता दिने गाउँपालिकाले जनाएको छ।<br><br>पालिकाले आवश्यक बजेट नै विनियोजन गरेर सुत्केरी भत्ता वितरणको सुरुवात गरेको अध्यक्ष मनबहादुर लामाले बताए । कृषकहरुलाई पेसा प्रति जागरुक र आत्मनिर्भर बनाउनको लागी गाउँपालिकाले यस्तो निर्णय गरेको उनको भनाई छ ।<br><br>‘गाउँघरमा गाई भैंसी पाल्ने प्रवृति हराएको छ’, उनले भने, ‘किसानलाई प्रोत्साहित गर्न र दुध उत्पादन बढाउन सुत्केरी भत्ताको व्यवस्था गरिएको हो।’<br><br>आगामी दिनमा कृषि पेशा र पशुपालनबाट किसानहरु आत्मनिर्भर बन्नको लागी ककनी गाउँपालिकाले अन्य सेवा र सुबिधाहरुको लागी पहल गर्ने अध्यक्ष लामाले जानकारी दिए ।<br></p>

<p>काठमाडौ । काठमाडौंको कालीमाटीमा राँगोले हान्दा चारजना घाइते भएका छन् । काठमाडौंमा मासुका लागि तराइबाट ल्याइएको राँगो मंगलबार बिहानै कालीमाटीमा ट्रकबाट झार्ने क्रममा सडकमा निस्किएर चारजनालाई हानेर घाइते बनाएको थियो ।<br><br>त्यहाँबाट भागेको राँगोलाई खिचापोखरीमा घेरा हालेर प्रहरीले गोली हानेको हो ।महानगरीय प्रहरी परिसरको टोलीले राँगोलाई गोली हानेर मारेको हो ।<br><br>केही मानिसहरुलाई राँगोले आक्रमण गरेर घाइतेसमेत बनाएकाले गोली हानेर मार्नु परेको प्रहरीले जनाएको छ ।<br></p>

<p>कैलाली । तीन वर्षीया छोरीको हत्या गरी बाबुले आत्महत्या गरेका छन्। कैलालीको गौरीगंगा नगरपालिका-५ का रामबहादुर कलेलले सल्पास नामक विषादी सेवन गराई छोरीको हत्या गरेको र त्यसपछि आफूले पनि उक्त विषादी खाएर आत्महत्या गरेको जिल्ला प्रहरी कार्यालय कैलालीले जनाएको छ। &nbsp;<br><br>तीन वर्षीय छोरी अनुष्कालाई सल्पास खुवाएपछि मृत्यु भएको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक दक्षकुमार बस्नेतले जानकारी दिए।<br><br>गत वैशाख १६ गते कलेलकी श्रीमती सरिता कलेल कोठामै झुन्डिएर आत्महत्या गरेपछि उनीविरुद्ध माइती पक्षले आत्महत्या दुरुत्साहनको मुद्दा दर्ता गराएका थिए।<br>&nbsp;<br><br>सरिताका माइती पक्षले दुरुत्साहनमा मुद्दा दर्ता गरेपछि गत जेठ २६ गते जिल्ला अदालत कैलालीले कलेललाई पुर्पक्षका लागि कारागार चलान गरेको थियो। साउन २२ गतेको अदालतको इजलासले उनलाई निर्दोष ठहर गरेपछि उनी छुटेका थिए।<br><br>छुटेको झन्डै डेढ महिनापछि उनले नाबालक छोरीसहित विष सेवन गरेर आत्महत्या गरेका हुन्। यस बारेमा प्रहरीले अनुसन्धान सुरु गरेको प्रहरी नायव उपरीक्षक बस्नेतले जानकारी दिए। उनले भने, ‘सफाइ पाइसकेपछि उनले किन छोरीको हत्या गरेर आफूले आत्महत्या गरे भन्ने विषयमा हामी अनुसन्धान गरिरहेका छौँ।’<br><br>अदालतको फैसलामा सुसाइट नोट लेखेर उनले आत्महत्या गरेको प्रहरीले जनाएको छ। आइतबार राती विष सेवन गरेका उनलाई उपचारका लागि सेती प्रादेशिक अस्पताल धनगढी ल्याउँदै गर्दा ज्यान गएको प्रहरीले जनाएको छ।<br></p>

<p>नौविसे । दिउँसो सवारी साधनको मुख्य चाप हुने समयमा सडक कालोपत्रे (पिच) गरिँदा थानकोट-नौबिसे सडकमा पाँच किलोमिटरभन्दा लामो जाम भएको छ । बुटवलबाट दिउँसो ३ बजे नौबिसे आईपुगेका यात्रु सुरज महर्जन चार घण्टासम्म जाममा बस्नु परेको बताउँछन् ।<br><br>मुख्य सवारी चाप हुने समयमा सडक बन्द गरेर पिच गरिँदा यात्रुहरुको बिजोग भएको महर्जनले बताए । जामका कारण पर्यटकको समेत बिजोग भएको यात्रुले बताए ।<br>दशैंअघि नै सक्ने गरी काठमाडौंको मुख्य नाका नागढंगामा सुधारको काम थालिएको छ । यसका कारण यात्रुलाई जाममा बस्नुपर्दा भने निकै सास्ती भएको छ ।<br><br>खानीखोला ट्राफिक प्रहरीका प्रहरी सहायक निरीक्षक महेन्द्र चन्दका अनुसार उपत्यका आउँदै गरेका सवारीसाधनको लाम धार्के नाघेको छ । बिहान ११ बजे देखि २ बजेसम्म खाल्डाखुल्डी पुर्न अनुरोध गरिएपनि नमानेर चापकै समयमा ठेकदारले सडकमा अबरोध गरेको उनले बताए । ‘दोहोरो गाडी पास गर्नै सकिएन, सडक अबरुद्ध भयो,’चन्दले भने । <br></p>

<p>काठमाडौ । गोरखा केन्द्रबिन्दु भएर शनिबार बिहान ४ रेक्टरस्केलको शक्तिशाली भूकम्पको पराकम्प गएको छ । राष्ट्रिय भूकम्प मापन केन्द्रका अनुसार बिहान ६ बजेर १९ मिनेटमा गोरखाको सिरानचोक गाउँपालिका–१ केराबारी केन्द्रबिन्दु भएर भूकम्पको पराकम्प&nbsp; गएको हो ।</p><p><br>भूकम्पको धक्का गोरखा, धादिङ, नुवाकोट, तनहुँ र लमजुङमा महसुस गरिएको थियो । एक हप्ताको बीचमा यसअघि सुदूरपश्चिमा तीनवटा र लमजुङ केन्द्रबिन्दु भएर एक भूकम्प गइसकेको छ ।</p><p>२०७२ वैशाख १२ गते गते गोरखाको बारपाक केन्द्रविन्दु भएर भूकम्प जाँदा ठूलो जनधनको क्षति भएको थियो ।<br></p>

<p>भोजपुर । षडानन्द नगरपालिकाको कार्यालय परिसरमा बम विस्फोट भएको छ । अज्ञात समूहले आज बिहान ३ बजेतिर नगरपालिकाको गाडीलाई लक्ष्य गरी बम विस्फोट गराएको थियो।<br><br>कुकर बम विस्फोट गराइएको जिल्ला प्रहरी कार्यालय भोजपुरका प्रहरी नायब उपरीक्षक नरबहादुर सलामीमगरले बताए। विस्फोटन भएको ठाउँमा नेत्रविक्रम चन्द समूहकोे पर्चा भेटिएको र घटनाबारे थप अनुसन्धान भइरहेको उनले जानकारी दिए। <br><b>त्यस्तै, </b>नगरपालिकाको ग्यारेज छेउमा शङ्कास्पद वस्तु पनि फेला परेकाले त्यसलाई&nbsp; डिस्पोजनका लागि सङ्खुवासभाबाट नेपाली सेनाको डिस्पोजल टोली घटनास्थलतर्फ आउँदै गरेको प्रहरीले जनाएको छ ।<br></p>

<p>काठमाडौ । नेपाल आयल निगमले खाना पकाउने ग्यासको मूल्य घटाएको छ । संविधान दिवसको अवसर पारेर सरकारले उपभोक्तालाई राहत दिने गरी मूल्य समायोजन गरिएको हो ।<br><br>निगमका प्रवक्ता विरेन्द्र गोइतका अनुसार प्रतिसिलिन्डर २५ रुपैयाँ घटाइएको छ । अब ग्यास प्रतिसिन्डिर १ हजार ३ सय ५० रुपैयाँमा किन्न पाइनेछ ।<br><br>निगमले अन्तर्राष्ट्रिय उडानतर्फको हवाई इन्धनको मूल्य पनि घटाएको छ । निगमले प्रति किलोलिटर ५० अमेरिकी डलरले मूल्य घटाएको हो । अब अन्तर्राष्ट्रियतर्फ प्रतिकिलोलिटर १ हजार अमेकिी डलरमा जहाजले तेल हाल्न पाउनेछन् ।<br></p>