<p align="justify">१४ कार्तिक, काठमाडौ । सर्वोच्च अदालतले गोरखापत्र संस्थानका महाप्रबन्धकबाट वसन्तप्रकाश उपाध्यायलाई हटाउने मन्त्रिपरिषद्को निर्णय कार्यान्वयन नगर्न अन्तरिम आदेश जारी गरेको छ । न्यायाधीश ईश्वर खतिवडाको एकल इजलासले आज उपाध्यायलाई पदबाट बर्खास्त गर्ने मन्त्रिपरिषद्को निर्णय कार्यान्वयन नगर्न अन्तरिम आदेश दिएको हो । मन्त्रिपरिषद्को गत आइतबारको बैठकले उपाध्यायलाई पदबाट हटाउने निर्णय गरेको थियो ।<br><br>मन्त्रिपरिषद्को निर्णयविरुद्ध उपाध्यायले सर्वोच्च अदालतमा रिट निवेदन दायर गर्नुभएको थियो । सरकारले यसअघि पनि उपाध्यायलाई बर्खास्त गर्ने निर्णय गरेको थियो । सो निर्णयविरुद्ध पनि उपाध्यायले सर्वोच्च अदालतमा रिट निवेदन दायर गर्नुभएको थियो । सो निवेदनको सुनुवाइ गर्दै अदालतले गत असार २९ गते सरकारको निर्णय कार्यान्वयन नगर्न आदेश दिएपछि उपाध्याय संस्थानको महाप्रबन्धकको जिम्मेवारी लिएर फर्कनुभएको थियो ।<br><br>उपाध्यायलाई तत्कालीन प्रधानमन्त्री शेरबहादुर देउवाको पालामा २०७४ मङ्सिर २५ गतेको मन्त्रिपरिषद्को बैठकले गोरखापत्र संस्थानको महाप्रबन्धक पदमा चार वर्षका लागि नियुक्त गरेको थियो । <br><br></p>

<p>१४ कार्तिक, हेटौँडा । प्रदेश नं ३ का प्रदेश नीति तथा योजना आयोगका उपाध्यक्ष डा. खिमलाल देवकोटाले प्रदेशको १३ जिल्लाको भूगोल र जनताको आवश्यकता अनुसारको योजनालाई तत्काल फेरबदल नगरी कार्यान्वयनमा ल्याउन आगामी आव २०७५-७६ देखि ३ नं प्रदेशमा प्रोजेक्ट बैंकको स्थापना गर्ने तयारी भइरहेको बताउनुभएको छ ।<br><br>उपाध्यक्ष डा देवकोटाले राष्ट्रिय समाचार समितिसँग आज सङ्क्षिप्त कुराकानी गर्दै राष्ट्रिय गौरवको आयोजना तथा जिल्लाका आवश्यकताअनुरुप विकास योजनाको छनोट गर्न आगामी मङ्सिर महीनाभित्र पाँचवर्षे आवधिक योजनाको आधारपत्रको मस्यौदा तयार गरिसक्ने जानकारी दिनुभयो ।<br><br>उहाँले प्रोजेक्ट योजनाअन्तर्गत ऊर्जा उत्पादन, पर्यटन, कृषि उत्पादन र बहुर्राष्ट्रिय कम्पनी स्थापनाका लागि स्वदेशी र विदेशी लगानीकर्तालाई प्रदेश सरकारले सहज सुविधायुक्त सेवा उपलब्ध गराउन नीति योजना आयोगले समन्वय कर्ताको भूमिका निर्वाह गर्ने बताउनुभयो ।<br><br>डा देवकोटाले एक प्रश्नको उत्तरमा जिल्लाको भौगोलिक र आवश्यकताअनुसार स्थानीय निकायबाट सिफारिश भई आएका योजनालाई यदाकदा राजनीतिक दलको नेता, प्राविधिक कार्यालय र उच्च प्रशासनका पदाधिकारीबाट फेरबदल गर्ने प्रक्रिया चलेकाले स्थानीय भेगमा निर्माण हुने विकास आयोजनाले मूर्तरुप पाउन नसकेको उल्लेख गर्नुभयो । उहाँले जनताले प्रत्यक्ष लाभ पाउने योजनालाई फेरबदल नगरिकन ती योजनालाई कार्यान्वयन गर्ने प्रक्रियालाई अब निरन्तरता दिनुपर्नेमा जोड दिँदैै प्रोजेक्ट बैंकबाट योजनाको निष्पक्ष छनोट र स्थलगतरुपमा कार्यान्यवन गर्ने र त्यसको प्रत्यक्ष अनुगमन गर्ने नीति योजना आयोगले उच्च प्राथमिकतामा राखेको बताउनुभएको छ ।<br><br>सो प्रदेश नीति योजना आयोगले आवधिक योजनाको आधारपत्र तयार गर्न कात्तिक १७ गते चितवनको भरतपुर, १८ गते नुवाकोट र २० गते ललितपुरमा योजना समीक्षा गोष्ठीको आयोजना गर्न लागेको एवं सो गोष्ठीबाट प्राप्त सुझावअनुसार योजनालाई समष्टिगतरुपमा अवधारणापत्र तयार गरी क्रमशः चालू आर्थिक वर्षभित्रै १३ जिल्ला योजना कार्यान्वयन गर्ने नीति योजना आयोगका सदस्य श्यामकुमार बस्नेतले बताउनुभएको छ ।<br><br>उहाँका अनुसार सो आयोगले प्रभावकारीरुपमा कार्यक्रमको तर्जुमाका साथै अनुगमन गर्ने कार्यका लागि आवश्यक जनशक्ति, कर्मचारीको दरबन्दी २२ जना भएको भए पनि हाल एक जना उपसचिव र एक जना प्रशासकीय अधिकृत कार्यरत हुनुभएकाले आफ्नो भूमिकालाई गतिशील बनाउन कठिनाइ उत्पन्न भएको जानकारी दिनुभएको छ । <br><br></p>

<p>महेन्द्रनगर । निर्मला हत्याकाण्डको अनुसन्धानमा डीएनए परीक्षण प्रक्रियालाई अगाडी बढाएको कञ्चनपुर प्रहरीले मङगलवार थप ४ जनाको नमूना संकलन गरी काठमाडौं पठाएको छ ।<br>अनुसन्धानका क्रममा विभिन्न कोणबाट शंकास्पद देखिएका थप ४ जनाको नमूना संकलन गरी काठमाडौं पठाइएको कञ्चनपुरका डीएसपी कृष्णराज ओझाले बताए । नमूना संकलन गरिएका व्यक्तिहरुको पहिचान भने खुलाइएको छैन । अाजकाे&nbsp; नेपाल समाचारपत्र दैनिकमा खबर छापिएकाे छ ।<br></p>

<p>पप्पु गुरुङ्ग, महेन्द्रनगर । भीमदत्त नगरपालिकामा समुदाय प्रहरी साझेदारी नगर स्तरीय समिति गठन गरिएको छ । भीमदत्त नगरपालिका कार्यालयमा गरिएको कार्यक्रममा नगर स्तरीय समिति गठन गरिएको छ । भीमदत्त नगरपालिका नगर प्रमुख सुरेन्द्र विष्टको अध्यक्षतामा गठन गरिएको समितिमा नगर प्रमुख सुशिला चन्द सिह उप संयोजक छन् । भीनपा वडा नं. १८ का वडा अध्यक्ष राजेन्द्र पाण्डेय, राधिका पन्त, बिमल खडायत, मदन चन्द, खडक बहादुर विष्ट, लक्ष्मी बोहरा, चन्द्रकला पन्त, बीर बहादुर चन्द, मोहन विष्ट, प्रभुनिधि पन्त, अमिर तिरुवा, ऋषि सुवेदी, हेलेन श्रेष्ठ, नरेश सिलाल, प्रितिधिर भण्डारी, भीम नाथ, गणेश बोहरा, भुवनेश्वरी जोशी, भोजराज भट्ट सदस्य छन् । जिल्ला प्रहरी कार्यालयको सबै स्थानीय तहमा समिति गठन गर्ने कार्यक्रम अनुसार मंगलबार भीमदत्त नगरपालिकामा सरकारी तथा गैर सरकारी संस्था सहितको सहभागितामा कार्यक्रम गरी समिति गठन गरिएको छ । कार्यक्रममा प्रहरी प्रधान कार्यालयका प्रहरी नायब उपरीक्षक मेख बहादुर खत्रीले समुदाय प्रहरी साझेदारीको औचित्यबारे जानकारी गराएका थिए । समिति गठनपछि समितिका संयोजक नगर प्रमुख विष्टको अध्यक्षतामा बैठक बसेको छ । </p><p>बैठकले हरेक शनिबार बजार क्षेत्रमा सरसफाई कार्यक्रम गर्ने, ट्राफिक व्यवस्थापनका लागि छलफल गर्ने, कार्यक्रमको खाका तयार गर्ने लगायतका निर्णय गरेको छ । समितिका संयोजक नगर प्रमुख विष्टले शान्ति सुरक्षा कायम राख्न प्रहरीलाई सहयोग र नगर समृद्ध बनाउन सबै सरोकारवालाकासित सहकार्य गर्दै आएको बताए ।‘नगरको समृद्ध सबैको चाहना हो, विकास र सुशासन सबै चाहन्छौ, शान्ति सुरक्षा सबैका लागि अपरिहार्य छ, नगरलाई शान्त बनाउन यो समितिले सबै सरोकारवालासित हातेमालो गर्छ’ उनले भने । जिल्ला प्रहरी कार्यालयका प्रहरी उपरीक्षक कुबेर कडायतले गृह मन्त्रालयको कार्यक्रम अनुसार देशभर स्थानीय तह सहित विभिन्न निकायसित सहकार्य कार्यक्रम सुरु गरिएको बताए । </p><p>‘आज नगर स्तरीय समिति गठन गरिएको छ, अरु पनि समिति गठन गर्नु पर्नेछ, वडा, टोल, विद्यालय स्तरीय समिति गठन गर्छौ’ प्रहरी उपरीक्षक कडायतले भने । कार्यक्रममा सहभागीहरुले प्रहरीले जनतासित बलियो सम्बन्ध बनाउनु पर्ने सुझाव दिए । धुमपान निषेधका अभियन्ता मदन चन्दले शान्ति सुरक्षाका लागि सबैले सहयोग गर्न पर्ने उल्लेख गर्दै समितिलाई सक्रिय बनाउनु पर्नेमा जोड दिए ।‘यो समिति गठन गरेर मात्रै हुँदैन, केही गरेर पनि देखाउनु पर्छ’ उनले भने,‘सुरक्षा निकाय र मेयरसापले एक भएर जानु पर्छ, त्यसमा पूर्ण सहयोग गर्छौ ।’बुद्धिजीवि उत्तम विष्टले नगर स्तरीय समितिले जनचेतना मुलक सामग्री समेटिएको श्रव्यदृष्य सामग्री प्रकाशन, ट्राफिक व्यवस्थापन, सडक नाटक लगायतका कार्यक्रम गर्नु पर्नेमा जोड दिए ।</p><p>नेपाल पत्रकार महासंघ कञ्चनपुरका सह सचिव मोहन विष्टले समाजका विकृति, विसंगति हटाउन समितिको भूमिका प्रभावकारी हुने बताए ।अधिकारकर्मी अमिर तिरुवाले समितिले समुदाय स्तरमा रचनात्मक कार्य गर्नु पर्ने, परामर्श सेवा सञ्चालन गर्नु पर्ने, सडक नाटक प्रदर्शन, दलित समुदायका कार्यक्रममा सहभागी हुनु पर्ने लगायतका कार्यक्रम सञ्चालन गरिनु पर्नेमा जोड दिए ।महेन्द्रनगर माध्यमिक विद्यालयका प्रधानाध्यापक चन्द्रकला पन्तले समाज सुधारका लागि विद्यार्थी मात्रै नभएर अभिभावकलाई समेत शिक्षा दिनु पर्ने आवश्यकता औल्याइन । गैर सरकारी संस्था महासंघ कञ्चनपुरका अध्यक्ष नरेश सिलालले समितिले वादविवाद, होर्डिङ्ग बोर्ड, प्रहरी कार्यालयको १०० नम्बरको प्रचार, बालबालिका सुरक्षा, सामाजिक अभियान लगायतका कार्यक्रम सञ्चालन गर्नु पर्ने सुझाव दिए ।</p><p> अधिकारकर्मी प्रभुनिधि पन्तले प्रहरी र जनताबीच दुरी बढ्न राम्रो नहुने उल्लेख गर्र्दै आपशी सहकार्य र समन्वय गरी जानु पर्नेमा जोड दिए । कार्यक्रममा भीम नाथ, भोजराज भट्ट, गणेश बोहरा लगायतले नगर वासिन्दा र अन्य गैर सरकारी संस्थाहरुसित सहकार्य गरी जानु पर्नेमा जोड दिए । जिल्ला प्रहरी कार्यालयका प्रहरी निरीक्षक प्रकाश कार्कीले सञ्चालन गरेको कार्यक्रममा भीनपाका जनप्रतिनिधि, प्रहरी अधिकारी, अधिकारकर्मी लगायतका सहभागी भएका छन् <br><br></p>

<p>१३ कर्तिक, काठमाडौ । काठमाडौँको लैनचौरमा भएको मोटरसाइकल दुर्घटनामा नुवाकोट घर भएका&nbsp; प्रकाश तामाङको मृत्यु भएको काठमाडौ प्रहरीले जनाएको छ । </p><p><br>लैनचौरको खानी विभाग अगाडि मंगलबार बिहान ६ बजे बा. २ ख २०६८ नम्बरको माइक्रोबस र बा ६४ प ९२८४ नं को मोटरसाइकल एकापसमा ठोक्किँदा मोटरसाइकल चालक नुवाकोटका ३० वर्षीय प्रकाश तामाङको मृत्यु भएको प्रहरीले जनाएको हो । </p><p><br>महानगरीय ट्राफिक प्रहरी महाशाखाका सहप्रवक्ता जीतेश दाहालका अनुसार दुर्घटनामा गम्भीर घाइते तामाङको राष्ट्रिय ट्रमा सेन्टरमा उपचारको क्रममा मृत्यु भएको र मोटरसाइकलको पछाडि रहेका अर्का घाइते सुरज थापाको ट्रमा सेन्टरमा नै उपचार भइरहेको छ । दुर्घटनामा परेको सवारी साधनसहित माइक्रो चालकलाई प्रहरीले नियन्त्रणमा लिएको छ ।</p><p><br>यसैबीच, मंगलबार नै काठमाडौको बसुन्धरामा भएको मोटरसाइकल दुर्घटना हुदाँ नुवाकोटको बालकुमारी घर भएका नवराज रिजालको मृत्यु भएको छ । </p><p><br>२५ वर्षका रिजालले चलाएको बा.६८ प ७४७८ नम्बरको मोटरसाइकल आफै अनियन्त्रित भएर विद्युतको पोलमा ठोक्किन पुग्दा गम्भीर घाइते भएपनि उपचारको क्रममा उनको मृत्यु भएको प्रहरीले जनाएको छ ।<br>दुर्घटनामा परी घाइते भएका रिजाललाई उपचारको लागी शिक्षण अस्पताल महाराजगंजमा पु¥याएको केही समयमा नै मृत्यु भएको प्रहरीले जनाएको छ । </p><p><br><br></p>

<p>१३ कार्तिक,&nbsp; काठमाडौँ । विशेष अदालतले चितवन भरतपुरस्थित बीपी कोइराला क्यान्सर अस्पतालका तत्कालीन अध्यक्ष डा भक्तमान श्रेष्ठलाई भ्रष्टाचारको मुद्धामा दोषी ठहर गरेको छ ।<br><br>विशेष अदालतका अध्यक्ष बाबुराम रेग्मी, न्यायाधीशद्वय रत्नबहादुर बागचन्द, प्रमोदकुमार श्रेष्ठ वैद्यको इजलासले आज उहाँलाई एक वर्ष कैद र रु एक करोड १८ लाख ६६ हजार ७७६ जरिवानाको फैसला गरेको विशेष अदालतका रजिष्ट्रार भीमकुमार श्रेष्ठले जानकारी दिनुभयो ।<br><br>डा श्रेष्ठ अस्पतालको अध्यक्ष हुँदा रु एक करोड ६७ लाख ५७ हजार ११३ स्रोत नखुलेको ९अवैध० सम्पत्ति आर्जन गरेको उल्लेख गर्दै अख्तियार दुरुपयोग अनुसन्धान आयोगले विसं २०७२ फागुन २ गते विशेष अदालतमा मुद्दा दर्ता गरेको थियो ।<br><br>अदालतले रु ४८ लाख ९० हजार ३३७ बैध सम्पत्ति कमाएको ठहर गरेको छ । बाँकी रु एक करोड १८ लाख ६६ हजार ७७६ अवैध सम्पत्ति आर्जन गरेको ठहर गर्दै विशेष अदालतले यो बराबर डा श्रेष्ठको सम्पति जफत हुने फैसलो गरेको हो । अदालतले डा श्रेष्ठकी श्रीमती शिलु श्रेष्ठलाई भने सफाइ दिएको छ ।<br><br>डा श्रेष्ठ विशेषज्ञ चिकित्सकका रूपमा सो अस्पतालमा २०५४ सालमा सेवा प्रवेश गरी २०६४ भदौदेखि २०६७ सालसम्म क्यान्सर अस्पतालको कार्यकारी निर्देशक हुनुभएको थियो । <br><br></p>

<p align="justify">१३ कार्तिक, नुवाकोट । राष्ट्रिय गौरवको आयोजनाको रुपमा विस्तार भइरहेको ‘गल्छी–त्रिशूली–मैलुङ्ग–स्याफ्रुबेसी–रसुवागढी’ सडक योजनाको कालोपत्रेको काम थालिएको छ । </p><p align="justify"><br>विदुर नगरपालिका वडा नं. ५ पिपलटारदेखि गटेबजारसम्मको करीब चार किलोमिटर सडकमा मंगलबारदेखि कालोपत्रेको काम सुरु गरिएको हो । मुआब्जा वितरण गरेर मात्र सडक विस्तारको काम अघि बढाउनुपर्ने भन्दै स्थानीयबासीले पु¥याएको अबरोधको बीच आयोजनाले प्रहरीको सुरक्षाघेरामा&nbsp; काम अघि बढाएको ठेकेदार कम्पनी तुदी कन्स्ट्रक्सन प्रालीका इञ्जिनियर सुरजकुमार गौतमले जानकारी दिनुभएको छ ।</p><p align="justify"><br>उहाँको अनुसार सडकमा कालोपत्रे अन्तरगतको अहिले करीब ३ इञ्च हुने ६ सेन्टिमिटर बाक्लो पहिलो तह अर्थात डिबिएस सुरु गरिएको हो । ११ मिटर चौडामा डिबिएस गर्ने र त्यसपछि मुख्य कालोपत्रे भने सात मिटरमा गर्ने इञ्जिनियर गौतमले जानकारी दिनुभएको छ । &nbsp;</p><p align="justify"><img style="width: 1024px;" src="https://topnepalnews.comuploads/posts/76ba63dbae639499301a0d70a4564d5c1540915329.jpg"><br></p><p align="justify"><br>विदुर गगरपालिका वडा नं. ५ पिपलटारका स्थानीयबासीले सडकमा पर्ने जग्गाको मुआब्जा&nbsp; नदिई कालोपत्रेको काम अघि बढाएको भन्दै बिरोध गरेका छन् । <br>संघर्ष समिति नै गठन गरी स्थानीयबासीले सडकमा पर्ने जग्गाको मुआब्जा निर्धारण नगरेको र पासाङ ल्यामु राजमार्गमा&nbsp; क्षेत्रमा पर्ने जग्गाको दायाँबायाँ निर्धारण २०३४ सालमा नै सडक संरचना कायम भएकाले अहिले विस्तार हुने सडकमा पर्ने जग्गाको मुआब्जा अन्योल बनाएको भन्दै आन्दोलनमा उत्रिएका छन् । </p><p align="justify"><img style="width: 1024px;" src="https://topnepalnews.comuploads/posts/c744f80bd47c095a2b027001c5cdd5a31540915311.jpg"><br></p><p align="justify"><br>संघर्ष समितिका संयोजक लिलानाथ न्यौपानले सडक विस्तार गर्नु राम्रो भएपनि पासाङ ल्यामु सडकमा पर्ने जग्गाको मुआब्जा नदिने र अन्य&nbsp; स्थानको भने दिनु&nbsp; न्यायोचित नभएको भन्दै आफूहरु बिरोधमा उत्रन बाध्य भएको बताउनुभएको छ । &nbsp;<br>&nbsp;&nbsp; &nbsp;गल्छी–त्रिशूली–मैलुङ्ग–स्याफ्रुबेसी–रसुवागढी’ सडक योजनामा पर्ने जग्गा अन्तरगत&nbsp;&nbsp; अन्तरगत सडकको दाँयाबाँया १५–१५ मिटर भित्रपर्ने जग्गाको साविक दुईपिपल, रातमाटे र जिलिङको जग्गाको मुआब्जा निर्धारण&nbsp; गरी रकम वितरण भइरहेको छ । &nbsp;</p><p align="justify"><br>मुआब्जा निर्धारण समितिले दोश्रो चरणमा अब साविक गेर्खु गाविसको बान्द्रेदेखि वेत्रावती हुदै मनकामनाको नयाँपुलदेखि मैलुङसम्मको जग्गाको मुल्य निर्धारण गर्ने जनाएको छ । पासाङ ल्यामु राजमार्ग अन्तरगत पर्ने पिपलटारदेखि ढुङ्गेसम्मको सडक आसापासमा पर्ने जग्गाको मुआब्जा प्रक्रिया भने अन्योल रहेको छ । यसअघि २०३४ सालमा नै सडक विस्तार भएर राजमार्ग कायम भएकाले राजमार्गको विस्तारको क्रममा आसापासमा पर्ने सडकको मुआब्जा दिने कानूनी व्यवस्था नभएको अन्योल हुदाँ स्थानीयबासीले मुआब्जा पाउने आधार कमजोर देखिएको छ ।</p><p align="justify"><br>‘गल्छी–रसुवागढी’ सडक पृथ्वी राजमार्ग स्थित धादिङको गल्छीबाट नुवाकोटको देवीघाट–त्रिशूली–रसुवाको मैलुङ्ग–स्याफ्रुबेसी–रसुवागढीहुदै चीनको केरुङ प्रवेशद्धारसम्म जोड्न सडक ८२ किलोमिटर दुरीको निर्माणको काम भइरहेको छ । <br>चीनसंगको सीमा क्षेत्र रसुवागढीदेखि धादिङको गल्छीसम्मको सडक निर्माणको लागी नेपाल सरकारले ‘गल्छी–त्रिशूली–मैलुङ्ग–स्याफ्रुबेसी–रसुवागढी’ सडक योजना मार्फत तीन खण्डमा निर्माणको लागी नौ अर्ब ५० करोड रुपैयाँ बजेट उपलब्ध गराएको छ । गल्छीबाट सुरु भएर रसुवागढीसम्म पुग्ने ८२ किलोमिटर सडकको निर्माण ठेकेदार पक्ष, नेपाली सेना र चीन सरकार मार्फत तीन खण्डमा भइरहेको छ । गल्छीबाट मैलुङसम्मको ४६ किलोमिटर सडक कोभेक–टुण्डी–रसुवा कन्स्ट्रक्सन मार्फत सडक निर्माण भइरहेको छ ।</p><p align="justify"><br>रसुवाको मैलुङदेखि स्याफ्रुबेसीसम्म १८ किलोमिटिर सडक नेपाली सेना मार्फत निर्माण भएर गएको चैत ३० मा नै ट्रयाक खोलर आयोजना पक्षलाई हस्तान्तरण गरिसकेको छ भने स्याफ्रुबेसीबाट रसुवागढीसम्मको १८ किलोमिटर सडक चीन सरकार मार्फत निर्माण अघि बढाइएको छ । <br><br><br></p>