<p>५ असार, रुपन्देही ।<br>६ महिनाकै उमेरमा आमा गुमाएकी समीक्षा सुवेदीले यस वर्ष एसएलसी परीक्षामा ४ जीपीए ल्याएर आफूलाई अब्बल साबित गरेकी छन्। उनले रूपन्देहीको सैनामैना ३ स्थित सुनगाभा पब्लिक उच्च माविबाट एसएलसीमा यो सफलता चुमेकी हुन्।<br><br>आजको अन्नपूर्णमा महेन्द्र थापा अगाडी लेख्छन्( पहिलोपटक ग्रेडिङ प्रणालीबाट नतिजा प्रकाशन भएको यस वर्ष अहिलेसम्म समीक्षाबाहेक अरू कसैले ४ जीपीए ९ग्रेड प्वाइन्ट एभरेज० ल्याएको दाबी गरेको छैन। समीक्षाले भविष्यमा चिकित्सक बनेर समाजमा योगदान गर्ने सपना साँचेकी छन्।<br><br>परिवार र शिक्षकको सहयोगका कारण आफूले एसएलसीमा यस्तो नतिजा हात पारेको समीक्षाले बताइन्। उनले अबको अध्ययनमा यस्तै नतिजा ल्याउने दृढतासमेत व्यक्त गरिन्।<br><br>चिकित्सक बन्न विज्ञान विषय लिएर प्लस टु पढ्ने योजना भए पनि बुटवल वा काठमाडौं कहाँ पढ्ने भन्ने टुंगो भइसकेको छैन। एसएलसीमा अब्बल ठहरिएपछि समीक्षा त दंग छिन् नै आफन्त र छरछिमेकी पनि मक्ख परेका छन्।<br><br>नतिजा सार्वजनिक भएपछि सैनामैना नगरपालिका ४ सिसौडाँडास्थित उनको घरमा बधाई दिन आफन्त र शुभेच्छुकको लर्को लाग्न थालेको छ। उनी पढेको सुनगाभा पब्लिक उच्चमाविले उनले चार जीपीए ल्याएको खुसीयालीमा र्‍याली निकालेर सैनामैनाको मुर्गियानगर परिक्रमासमेत गरायो।<br><br>उनको मार्मिक जीवनकथा थाहा पाएका गाउँलेले यो सफलताको खुसीयालीमा नाचगान र भोजभतेर गरे। समीक्षाका हजुरबुबा रुक्मागत सुवेदीका अनुसार १७ वर्षअघि जेठ १९ गते अर्घाखाँचीको डाँडाकटेरीमा भएको बस दुर्घटनामा उनकी आमा गीता सुवेदीको निधन भएको थियो।<br><br>६ महिनाकी काखे समीक्षालाई लिएर माइतीबाट घर फर्कंदा गीता चढेको बस दुर्घटनामा परेको थियो। बस पल्टिएपछि गीताले ६ महिनाकी समीक्षालाई झ्यालबाट बाहिर फ्यालिदिएकी थिइन्। दुर्घटनामै गीताको ज्यान गएको थियो।<br><br>झाडीमा खसेकी समीक्षाका दुवै खुट्टा भाँचिए पनि उपचारपछि उनी ठीक भइन्। त्यसपछि उनलाई हजुरबुबा र हजुरआमाले स्याहारसुसार गरे। आमाको दूधबाट वञ्चित समीक्षालाई हजुरबुबा र हजुरआमाले गाईभैंसीको दूध खुवाएर हुर्काए। <br><br>गीताको दुर्घटनामा निधन भएपछि बाबु तेजप्रसादले केही समयमै अर्को बिहे गरे। कान्छीआमाबाट जन्मेका समीक्षाका भाइ आशीषले पनि यही वर्षको एसएलसी परीक्षामा जीपीए ३।८५ ल्याएका छन्।<br><br>समीक्षालाई स्कुल पढ्न सजिलो थिएन। घरको आर्थिक अवस्था नाजुक थियो। बुबाको सानो व्यापारमात्र थियो। हजुरबुबा रुक्मागतले नातिनी समीक्षाका लागि भगवान् शिवको आराधना गर्न थाले। उनी हरेक दिन नातिनीले राम्रो पढून् भनेर प्रार्थना गर्थे। समीक्षालाई पनि राम्रो पढ्न प्रेरणा दिइरहन्थे।<br><br></p>

<p>५ असार, काठमाडौं ।<br><br>असार भूकम्पमा ध्वस्त संरचना पुनर्निर्माणमा राष्ट्रिय तथा अन्तर्राष्ट्रिय गैरसरकारी संघसंस्थाले साढे २२ अर्ब रुपैयाँ खर्च गर्ने भएका छन्।<br><br>संघसंस्थाले भूकम्पपीडितका १९ हजार ४ सय ५२ निजी अवास तथा विद्यालय र स्वास्थ्यचौकी भवन निर्माण गर्ने प्रस्ताव राष्ट्रिय पुनर्निर्माण प्राधिकरणले स्वीकृत गरेको खबर आजको नयाँ पत्रिकामा टेकराज थामीले लेखेका छन्।<br><br>प्राधिकरणले १७ संघसंस्थाले पेस गरेको पुनर्निर्माण प्रस्ताव स्वीकृत गरेको हो । प्रस्ताव स्वीकृत भएका संस्थाले २२ अर्ब ३६ करोड पाँच लाख ९७ हजार दुई ४४ रुपैयाँ खर्च गर्ने प्राधिकरणले जनाएको छ । प्राधिकरणमा २७ भन्दा बढी संघसंस्थाले प्रस्ताव पेस गरेका थिए । प्राधिकरणका अनुसार पुनर्निर्माणमा सबैभन्दा ठूलो रकम सेभ द चिल्ड्रेनले खर्च गर्दै छ । उसले नौ अर्ब ८७ करोड ६९ लाख ७४ हजार रुपैयाँ खर्चेर विद्यालय तथा स्वास्थ्यचौकीका एक हजार ६ सय भवन निर्माण गर्ने प्राधिकरणले जनाएको छ ।<br><br>&nbsp;रेडक्रस सोसाइटीले सात अर्ब ३७ करोड ९४ लाख&nbsp; दुई हजार ९० रुपैयाँ खर्च गर्दै छ । उसले विद्यालय भवन तथा स्वास्थ्यचौकीका ६ हजार भवन निर्माण गर्ने भएको छ । क्यारिटेस नेपालले एक अर्ब ५६ करोड १८ लाख तीन हजार दुई सय तीन रुपैयाँ खर्चेर काभ्रे, सिन्धुपाल्चोक र दोलखामा चार हजार चार सय ४० नमुना घर निर्माण गर्नेछ । गैरआवासीय नेपालीहरूको संस्था एनआरएनएले २८ करोड ८९ लाख ३६ हजार चार सय ८२ रुपैयाँको लागतमा गोरखाको लाप्राकमा पाँच सय ७३ नमुना घर निर्माण गर्ने प्राधिकरणले जनाएको छ।<br><br>धुर्मुस–सुन्तली फाउन्डेसनले सिन्धुपाल्चोकमा तीन करोड २५ लाख रुपैयाँमा ६५ वटा नमुना घर निर्माण गने भएको छ । वर्ड रिन्यु संस्थाले नुवाकोटमा २४ करोड आठ लाख ९३ हजार ६&nbsp; सय ९३ रुपैयाँमा तीन सय ३२ घर, ह्याबिटेट फर ह्युम्यानिटीले ३१ करोडमा नुवाकोटमा तीन सय ५० घर निर्माण गर्नेछ । प्राधिकरणका अनुसार लुथेरन वर्ड फेडेरेसनले रसुवामा ८८ करोड ९३ लाख ५६ हजार लागतमा दुई हजार एक सय २४ आवास, सुमारिटन पर्सले २५ करोडमा रसुवामा पाँच सय घर बनाउनेछ । हेन्भेट्स नेपालले ४६ करोड ५९ लाख पाँच हजारमा सिन्धुपाल्चोकमा एक हजार घर निर्माण गर्नेछ । लुमती सपोर्ट गु्रप फर सेल्टरले ३० करोड ६९ लाख आठ हजार १० रुपैयाँमा काठमाडौं चन्द्रागिरीमा आठ सय ५० घर निर्माण गर्ने भएको छ। <br><br></p>

<p>५ असार, काठमाडौं ।<br>एचपी र सुगमको सिलिन्डरमा जोखिम भएको पहिल्यै थाहा थियो<br><br>आपूर्तिमन्त्री गणेशमान पुनले १२ फागुनमा धादिङमा एचपी र सुगम ग्यासको निरीक्षण गर्दा सिलिन्डरको हाइड्रोलिक र हाइड्रोस्टेटिक परीक्षण नगरेको भेटिएको थियो । तर, अयोग्य सिलिन्डर नै भरिएर बजार पुगेकाले दुर्घटना भएका छन् । ७ जेठमा पाटनमा एचपीको सिलिन्डर पड्किएर तीनजनाको ज्यान गयो । ३१ वैशाखमा कालिमाटीमा सुगमको सिलिन्डर पड्केर एकको मृत्यु भयो। आजको नयाँ पत्रिकामा खबर छापिएको छ।<br><br><b>ग्यास पड्कने ६ कारण</b><br><br>विश्वबाबु पुडासैनी<br><br>महानिर्देशक, गुणस्तर तथा नापतौल विभाग<br><br>Ø नेपालमा उत्पादन हुने र आयात हुने ग्यास सिलिन्डरको गुणस्तर ‘नेपाल गुणस्तर ऐन’ले तोकेअनुसार नै नियमन भइरहेको छ । ग्यास उद्योगले नयाँ खरिद गरेको सिलिन्डरलाई गुणस्तर विभागले तोकिएको गुणस्तर परिधिभित्र रहेर परीक्षण गर्ने हो । तर, उद्योगीले खरिद गरिसकेपछि नियमित रूपमा प्रयोग हुन थालेको सिलिन्डरको जाँच गर्ने र सुरक्षाको विधि अपनाउने परिपाटीको विकास अहिलेसम्म हुन सकेको छैन । उद्योगीले सिलिन्डर कति सुरक्षित छन् भन्ने कुराको नियमन गर्न चासो दिएको पाइँदैन । उद्योगीसँग सिलिन्डरलाई सुरक्षित गर्ने पर्याप्त जनशक्ति र सुविधाहरू पनि रहेको देखिँदैन ।<br><br>Ø सिलिन्डरको भल्बको नियमित परीक्षण गर्नुपर्छ । कतिपय ग्यास उद्योगले सिलिन्डरमा बिग्रिएर बसेका तथा ग्यास लिकेज हुने भल्बहरूलाई मर्मत गरेर पुन: अर्को सिलिन्डरमा लगाउने गरेका छन्, यो गलत हो । सिलिन्डरमा पुरानो भल्ब फालेर नयाँ प्रयोग गर्नुपर्छ । उद्योगीले पनि गुणस्तरीय भल्बहरू परिवर्तन गरिएको सुनिश्चितता गर्न सक्नुपर्छ । सिलिन्डरमा एकपटक भल्ब लगाएपछि प्रत्येकपटक ग्यास भर्दा लिकेज परीक्षण गरिन्छ ।<br><br>Ø अधिकांश उद्योगले ग्यास सिलिन्डरको लिकेज परीक्षण गर्दा पानी प्रयोग गर्छन् । यसले सिलिन्डरको आयु घटाउँदै लान्छ । ग्यास लिकेज परीक्षण गर्ने मेसिन नै पाइन्छ । त्यस्ता मेसिनको प्रयोग गरिनुपर्छ । तर, अधिकांश उद्योगमा ग्यास लिकेज परीक्षण गर्ने मेसिन राखेको पाइँदैन ।<br><br>Ø सिलिन्डर राम्ररी प्रयोग गर्दा एकपटक हाइड्रोलिक टेस्ट गरेपछि १० वर्षसम्म नगर्दा हुन्छ । सिलिन्डरलाई पानीमा डुबाउने, घाममा राख्ने गर्‍यो भने चाँडो कमजोर हुनसक्छ । बढी कुच्चिएको, वास्तविक आकार बिग्रिएको, बढी खिया लागेको सिलिन्डरमा जोखिम हुन्छ ।<br><br>Ø सिलिन्डरको बाहिरी भागमा रङ लगाउनु भनेको फलामको पातालाई सुरक्षा गर्नु हो । रङ खुइलिएको सिलिन्डर घामपानीबाट चाँडै संक्रमित भई बिग्रन सक्छ । लामो समय रङ नभएको सिलिन्डर प्रयोग गर्दा पाताको बाक्लोपना पनि घट्न सक्छ ।<br><br>Ø धेरै उद्योगमा घामपानीको सीधै उपस्थिति हुने बाहिरी भागमा सिलिन्डरहरू राखिएको देखिन्छ । निरन्तरको घामपानीले सिलिन्डरको आयु कम हुँदै जान्छ । डिलरहरूले पनि बाटोमा खुला तरिकाले सिलिन्डर राखेको देखिन्छ । यसो गर्नुभएन ।<br><br>यसरी गरौँ सुरक्षा<br><br>चन्द्र थापा<br><br>महासचिव, ग्यास विक्रेता महासंघ<br><br>Ø सिलिन्डरबाट चुलोसम्म पुग्ने पाइप प्लास्टिकको प्रयोग गर्दै नगरौँ । अनिवार्य ‘होच पाइप’ प्रयोग गरौँ । सबै डिलरकहाँ होच पाइप हुन्छ ।<br><br>Ø खाली वा भरिएको सिलिन्डरमा अनिवार्य सेफ्टी क्याप लगाएर राखौँ । यसले लिकेज हुनबाट रोक्छ ।<br><br>Ø ‘एनएस’ वा ‘आइएसआई’ गुणस्तर चिह्नअंकित गुणस्तरीय रेगुलेटर मात्रै प्रयोग गरौँ ।<br><br>Ø कुच्चिएको सिलिन्डर प्रयोग नगरौँ । भान्सारमा दुईवटा सिलिन्डर सँगै राख्दै नराखौँ ।<br><br>Ø सकेसम्म भान्सा कोठाबाहिर सिलिन्डर राख्ने गरौँ । तर, बाहिर घामपानीले प्रत्यक्ष सिलिन्डर असर पार्नुहुँदैन ।<br><br>Ø सिलिन्डरभन्दा अग्लो ठाउँमा चुलो राखौँ । यसो गर्दा चुहोछेउमा लिकेज भए ग्यास तल जान्छ र दुर्घटनाको सम्भावना कम हुन्छ ।<br><br>Ø&nbsp; घरमा धेरै सिलिन्डर मौज्दात नराखौँ ।<br><br></p>