मृत्यु भएका शिशु गाड्न लाग्दा रोएपछि

<p>नेपालगञ्ज ।<br>कुनै बालकको मृत्यु भयो भने उनका आफन्त, बुवा आमाको रुवाई र वेदना सामान्य घटना हो । तर नेपालगञ्जमा मृत्यु भएको भन्दै गाड्न लागेका शिशुनै रोएपछि सबै अचम्ममा परेका छन् ।<br><br>मृत्यु भएको भन्दै खाल्डो खनेर गाड्ने तयारी गरिरहेको अवस्थामा रोएपछि एक नवजात शिशुले जीवन पाएका छन् भने यसले सबैलाई अचम्मित बनाएको छ ।<br><br>घटना यही शुक्रबार दिउँसो ३ बजेतिरको हो । नवजात शिशुले धेरै बेरसम्म कुनै प्रतिक्रिया नजनाएर चाल बिहिन बन्दै स्वास प्रस्वास समेत नलिएपछि रुकुमको एक दम्पतीले मरेको ठहर गर्दै नेपालगन्ज– १७, बुलबुलियास्थित घाट पुर्‍याएर बच्चा गाड्न लागेका थिए ।<br><br>रुकुम, रुघा–२ की १९ वर्षीया भावना ओली खड्काले घरैमा जन्माएको शिशु नचल्मलाएपछि पति चौखावाङ– ७ का २७ वर्षीय गोपाल खड्काले नजिकैको मेडिकल पुर्‍याएका थिए ।<br>मेडिकल सञ्चालकले बच्चा नरोएको, नचलेको, शरीर नीलो भइसकेको र श्वास नफेरेको भन्दै मृत घोषित गरिदिएका थिए ।<br><br>उनले तैपनि भेरी अञ्चल अस्पतालमा एकपटक देखाउन सुझाव दिएका थिए । तर, खड्का दम्पतीले शिशु मरेको भन्दै अपराह्न ४ बजेतिर गाड्न लगेको थियो ।<br><br>घाटमा पुगेर सहयोग मागेपछि शिशुको दाहसंस्कारका लागि स्थानीयले सहयोग गरेको देवबहादुर बोहराले बताए । तर, खाल्डो खन्दै गर्दा शिशु रोएपछि स्थानीय छाँगोबाट खसेझैँ भएका थिए ।<br><br>उनीहरूले खड्का दम्पतीप्रति शंका गर्दै प्रहरीलाई खबर गरे। र, शिशुलाई प्रहरीको जिम्मा लगाए।<br><br>‘हामीले चिहान खन्न फरुवा खोज्दै थियौं तर नगाड्दै बच्चा करायो,’ बोहराले भने, ‘बच्चा कराएपछि सबै अचम्म पर्‍यौं, त्यसपछि प्रहरी बोलाएर जिम्मा लगायौं।’<br><br>वडा प्रहरी कार्यालयले खड्का दम्पतीसहित शिशुलाई तत्काल भेरी अञ्चल अस्पताल पुर्‍याएको थियो। शिशुको स्वास्थ्य अवस्था सामान्य बन्दै गएको अस्पताल स्रोतले जनाएको छ ।<br><br>‘बच्चा रोएपछि हामी पनि खुसी भयौं, जानीजानी जिउँदो बच्चालाई गाड्न खोजेका होइनौं,’ खड्का दम्पतीले बताएका छन् ।<br><br></p>