लोकमानका सहयोगी सहित प्रहरी एआइजीमाथि अख्तियारद्धारा अनुसन्धान सुरु

<p>१ मंसिर, काठमाडौं ।<br>अख्तियार दुरुपयोग अनुसन्धान आयोगले विवादित पूर्व प्रमूख आयुक्त लोकमानसिंह कार्कीका सहयोगी सरकारका दुई सचिवसहित केही उच्च सरकारी अधिकारीमाथि छानविन थालेको छ ।<br><br>अख्तियार प्रमुख लोकमान सिंह कार्कीविरुद्ध महाअभियोग दर्ता भएर उनी पदीय जिम्मेवारीमा नरहेपछि अख्तियारले उनलाई सहयोग गर्दै आएकामाथि छानविन थालेको हो ।<br><br>कामु प्रमुख आयुक्त दीप बस्न्यातको नेतृत्वमा रहेको अख्तियारले तानेका धेरै उच्चपदस्थहरू यसअघि ‘लोकमान निकट’ र ‘पहुँचवाल’का रुपमा गनिन्थे ।<br><br>अख्तियारले छानबिनको प्रक्रियामा ल्याएका पदाधिकारीहरुमा नेपाल ट्रष्टको कार्यालयका सचिव अर्जुनकुमार कार्की, सिंचाई सचिव गजेन्द्रकुमार ठाकुर, सहसचिव तथा आन्तरिक राजस्व कार्यालयका महानिर्देशक चुडामणि शर्मा, कानुन मन्त्रालयका सहसचिव धनराज ज्ञवाली रहेका छन् ।<br><br>ट्रष्टको कार्यालयका सचिव कार्की यसअघि भौतिक मन्त्रालयमा थिए । भूकम्पका बेला खरिद गरिएको त्रिपालमा भएको अनियमिततामा कार्यालय प्रमुखको रुपमा दोषी देखिएका उनलाई लोकमानसिंह कार्कीले उन्मुक्ति दिएका थिए ।<br><br>यस्तै सहसचिव तथा भन्सार विभागका महानिर्देशक शिषिर ढुंगाना र विभागका अन्य कर्मचारीविरुद्ध पनि अख्तियारले छानबिन थालेको बुझिएको छ ।<br><br>सहसचिव ढुंगानालाई सोमबारमात्र सामान्य प्रशासन मन्त्रालयले सचिवमा बढुवाका लागि सिफारिस गरेको थियो । अब उनको कारबाही नटुंगिदासम्म सरकारले बढुवा गर्न पाउँदैन ।<br><br>नेपाल प्रहरीका बहालबाला एआईजी प्रताप थापा र विरेन्द्रबाबु श्रेष्ठमाथि पनि छानविन थालिएको बताइएको छ । श्रेष्ठ केही समयपहिलेसम्म कार्की आयुक्त रहेको समयमा अख्तियारमै कार्यरत थिए ।<br><br>अख्तियारले उनीहरुको बैंकको लकर र बैंक एकाउन्ट समेत मंगलबारबाट रोक्का गरिसकेको बताइएको छ ।<br><br></p>