दशैं मान्न काठमाडौंबाट २२ लाख घर लागे, अझै दुई लाख यात्रु बाहिरिने

<p>२२ असोज, काठमाडौँ ।<br>बडा दशैं मान्नका लागि राजधानीमा अध्ययन, पेशा व्यवसाय गरेर बस्दै आएका करिव २२ लाख नेपालीहरु जन्मथलो र आफन्तकोमा हिँडेका छन् ।<br><br>काठमाडौँ उपत्यकाबाट आजसम्म २२ लाख यात्रु बाहिरिएको बताइएको छ ।<br><br>उपत्यकाका विभिन्न नाकाबाट देशका विभिन्न गन्तव्यमा २२ लाखभन्दा बढी यात्रु गएको नेपाल यातायात व्यवसायी राष्ट्रिय महासङ्घले दाबी गरेको छ ।<br><br>बिहीबार, शुक्रबार र शनिबार सबैभन्दा बढी यात्रुले काठमाडौं छाडेका छन् । यो क्रम केही कम भएर आज र भोली समेत जारी रहने देखिएको छ । ।<br><br>शुक्रबार करिव ३ लाख यात्रुले काठमाडौं छाडेकोमा आज पनि सोही संख्यामा यात्रुहरु काठमाडौंबाट बाहिरिने क्रम रहेको प्रहरीले जानकारी दिएको छ ।<br><br>उपत्यकाका नागढुङ्गा, बल्खु, अरनिको राजमार्ग, बिपी राजमार्ग, साँखु, पासाङलामु मार्ग र टोखा—छहरे राजमार्गबाट यात्रु देशका विभिन्न गन्तव्यतर्फ लागेका छन् ।<br><br>दशैंमा काठमाडौंबाट साना ठूला गरी दैनिक पाँच हजारको हाराहारीमा सवारी आवतजावत भइरहेको छ ।<br>सामान्य अवस्थामा दैनिक एक हजार देखि एक हजार २ सय सम्म सवारी आवतजावत गर्थे ।<br><br>अहिले दशैंको लागि काठमाडौंबाट घर लागेका यात्रुहरु दशैंको भोलिपल्टबाटै काठमाडौं फर्कन सुरु गर्छन् । यो क्रम पुर्णिमाको दिनदेखी बढेर करिव १ हप्ता सम्म रहनेगर्छ ।<br><br>काठमाडौंबाट लाखौं यात्रु बाहिरिएपछि काठमाडौंको सडकहरु भने सुनसान देखिन थालेका छन् । सडकमा छिटफुट सवारीका साधन गुडेको देखिन्छ भने काठमाडौंबाट बाहिरिने नाकाहरुमा भने अझै यात्रुहरुको चाप लाग्ने गरेको छ ।<br>यात्रुहरुले सहज रुपमा टिकट नपाएको तथा सामान्य भन्दा बढी रकम तिर्नुपरेको गुनासो गरेका छन् ।<br></p>