मोरक्कोलाई हराउँदै फ्रान्स विश्वकप फुटबलको सेमिफाइनलमा

काठमाडौँ । साविक विजेता फ्रान्स फिफा विश्वकप २०२६ को सेमिफाइनलमा प्रवेश गरेको छ । अमेरिकाको बोस्टन स्टेडियममा आज बिहान सम्पन्न पहिलो क्वाटरफाइनलमा फ्रान्सले अफ्रिकी देश मोरक्कोलाई २–० ले पराजित गर्दै अन्तिम चारमा स्थान सुरक्षित गरेको हो ।

फ्रान्सको जितमा कप्तान किलियन एमबाप्पे र उसमान डेम्बेलेले एक–एक गोल गरे । खेलको सुरुआतमै गोल गर्ने अवसर पाए पनि एमबाप्पे पेनाल्टीमा चुकेका थिए ।

पहिलो हाफको २८ औँ मिनेटमा मोरक्कोका नौसइर मजराउईले पेनाल्टी क्षेत्रभित्र फाउल गरेपछि फ्रान्सले पेनाल्टीको अवसर पाएको थियो । तर एमबाप्पेको प्रहारलाई मोरक्कोका गोलरक्षक यासिन बुनुले उत्कृष्ट बचाउ गर्दै टोलीलाई तत्काल संकटबाट जोगाएका थिए ।

दोस्रो हाफमा भने फ्रान्सले खेलमा पूर्ण नियन्त्रण जमायो । खेलको ६० औँ मिनेटमा एमबाप्पेले गोल गर्दै फ्रान्सलाई अग्रता दिलाए । त्यसको पाँच मिनेटपछि अर्थात् ६५औँ मिनेटमा उसमान डेम्बेलेले अर्को गोल थप्दै फ्रान्सको अग्रता २–० पुगेकाे हाे ।

त्यसपछि मोरक्कोले खेलमा फर्कने प्रयास गरे पनि फ्रान्सको बलियो रक्षापङ्क्ति र गोलरक्षकको उत्कृष्ट प्रदर्शनका कारण गोल फर्काउन सकेन । निर्धारित समयसम्म थप गोल हुन नसकेपछि फ्रान्स सहज जितसहित सेमिफाइनलमा पुग्यो ।

यस जितसँगै सन् २०१८ को विश्वविजेता तथा साविक उपविजेता फ्रान्सले अब फाइनल प्रवेशका लागि स्पेन र बेल्जियमबीचको दोस्रो क्वाटरफाइनलको विजेतासँग प्रतिस्पर्धा गर्नेछ ।

पराजित मोरक्कोको यसपटकको विश्वकप यात्रा क्वाटरफाइनलमै समाप्त भएको छ ।