इद उल फित्र सम्पन्न

<p>अरबी पात्रोअनुसार दसौँ महिनाको पहिलो दिन आज नेपालभरका मुसलमान समुदायले विशेष नमाज पाठ गरी ठूलाबडाबाट आशीर्वाद लिएर इद उल फित्र पर्व मनाएका छन् ।</p><p>दसौँ महिनाको पहिलो दिन आज विशेष नमाज पाठ गरेपछि तीन दिनसम्म आफूभन्दा ठूलाबडाकहाँ गएर आशीर्वाद लिइन्छ । आशीर्वाद लिन आउने आफन्तलाई सेबइ, खजुरलगायत मीठा खानेकुरा खान दिने चलन छ । </p><p>खुसीपूर्वक शरीरको दान गरेर दीनदुःखी एवम् गरिबलाई बाँडिने भएकाले यो पर्वलाई इद उल फित्र भनिएको हो । अरबी पात्रोअनुसार नवौँ महिनाको अन्तिम दिन बुधबार बेलुकी चन्द्रमा देखिएपछि आज इद उल फित्र मनाइएको नेपाली जामे मस्जिदका सचिव मन्सुर हुसेनले जानकारी दिनुभयो ।</p><p>मुस्लिम समुदायको बाक्लो बसोबास रहेको नेपालगञ्जमा इद उल फितरको विशेष चहलपहल देखिएको छ । नेपालगञ्जका मुस्लिम समुदायले आज विहान विपीचोकमा रहेको इदगाहमा सामूहिक नमाज पढेका छन् । त्यस अवसरमा अन्य समुदायका मानिसहरु पनि त्यहाँ पुगी शुभकामना साटासाट गरेका थिए । यस्ता पर्वले धार्मिक सद्भाव बढाउने उनीहरुको भनाई थियो ।</p><p>यस्तै बीरगंजको छपकैया इनरवा मुर्ली गण्डक गहवालगायतका ठाउंमा रहेको मस्जिदमा सामुहिक रुपमा नमाज पढिएको छ । तराई मधेबका सुनसरी कपिलबस्तु सहित धेरै स्थानमा इदको चहलपहल देखिएको हाम्रा समाचारदाताहरुले जनाएका छन् । <br><br></p>