काठमाडौं,चैत १६ । नेपाल बास्केटबल संघको आयोजनामा हुने प्रथम दक्षिण एसियाली महिला बास्केटबल च्याम्पियनसिप आजबाट काठमाडौँमा सुरु हुदैछ । प्रतियोगिता अन्तर्गत आज दुई खेल हुने छ । पहिलो खेल श्रीलंकाले माल्दिभ्ससंग खेल्ने छ भने दोस्रो खेलमा आयोजक नेपालले बंगलादेशसंग प्रतिस्पर्धा गर्ने छन् । त्रिपुरेश्वरस्थित राष्ट्रिय खेलकुद परिषद्को कभर्डहलमा हुने प्रतियोगितामा ५ राष्ट्र सहभागी हुनेछन् ।
चार दिनेसम्म चल्ने प्रतियोगिता राउन्ड रोविन लिगका आधारमा हुने भने प्रतियोगिताको शिर्ष टिमले उपाधि जित्ने छ । प्रतियोगितामा आयोजक नेपालसहित बंगलादेश, भुटान, माल्दिभ्स र श्रीलंका सहभागी छन् । प्रतियोगितामा जम्मा १० खेल खेलाइने छ । दक्षिण एसियाली महिला बास्केटबल नेपालमै पहिलो पटक हुन लागेको हो । प्रतियोगिता सञ्चालन गर्न ७२ लाख ९८ हजार रुपैयाँ खर्च हुने अनुमान गरिएको आयोजकले जनाएको छ ।