नक्कली डाक्टर नै दुई हजार, एसपीका भाइदेखि नेताका बुहारीसम्म

<p>६ असार, काठमाडौं ।<br>प्रहरी र नेपाल मेडिकल काउन्सिलको हालसम्मको अनुसन्धानमा देशभरि करिब दुई हजार नक्कली चिकित्सक कार्यरत रहेको रहस्य खुलेको छ।&nbsp; नयाँ पत्रिका दैनिकमा समाचार छ।<br>&nbsp;<br>हालसम्म शैक्षिक प्रमाणपत्र अनुसन्धान गरी करिब एक हजार पाँच सयमध्ये डेढ सयजनाको प्रमाणपत्र नक्कली भएको पुष्टि भइसकेको छ। त्यसमध्ये ५३ जना पक्राउ परिसकेका छन्। प्रहरीको केन्द्रीय अनुसन्धान ब्युरो 'सिआइबी'ले शुक्रबार र शनिबार गरी ३६ जनालाई पक्राउ गरेको छ। <br>&nbsp;<br>एकैपटक १० वटा जिल्लामा अपरेसन चलाई सिआइबीले नक्कली प्रमाणपत्रधारीलाई पक्राउ गरेको हो। जसमा प्रतिष्ठित चिकित्सकसमेत छन्। उनीहरूलाई ठगी मुद्दामा सिआइबीले कारबाही अघि बढाएको छ ।</p><p>‘हाम्रो अनुसन्धानमा करिब १० प्रतिशत चिकित्सकको शैक्षिक प्रमाणपत्र नक्कली छ भन्ने छ,’ सिआइबीका निर्देशक डिआइजी नवराज सिलवाल भन्छन्,‘हामीले १७ हजार चिकित्सकको प्रमाणपत्रको आधिकारिकता जाँच गरिरहेका छौँ।’ <br>&nbsp;<br><b>पक्राउ पर्ने सबैको प्रमाणपत्र विदेशी </b><br>&nbsp;<br>पक्राउ परेका सबैले आइएस्सी र एमबिबिएस विदेशमा पढेका हुन्। केहीले बिहारका कलेजहरूमा आइएस्सी पढेको प्रमाणपत्रका आधारमा एमबिबिएस पढेका थिए। कतिपयले त एमबिबिएस पनि उत्तीर्ण नगरेको हुनसक्ने डिआइजी सिलवालको भनाइ छ। <br>&nbsp;<br><b>एसपीका भाइदेखि नेताका बुहारीसम्म</b><br>&nbsp;<br>प्रगति पोलिक्लिनिक चितवनमा कार्यरत सुनील आचार्य नेपाल प्रहरीका एसपी डा। सुवास आचार्यका भाइ हुन्। डा। सुवास नेपाल प्रहरीको अस्पतालमा कार्यरत छन्।<br>&nbsp;<br>त्यस्तै जोरपाटीको अम्दा नेपालमा कार्यरत निलिमा खड्का महत नुवाकोट कांग्रेस नेताहरूका बुहारी हुन्। प्रहरी अधिकारीका अनुसार श्रीमान्–श्रीमतीलाई पनि आफ्ना जीवनसाथीको शैक्षिक प्रमाणपत्र नक्कली छ भन्ने थाहा थिएन।<br>&nbsp;<br>‘यसको प्रमाणपत्र नक्कली हो भन्ने थाहा भएको भए बिहे नै गर्ने थिइनँ,’ आफ्नो श्रीमती पक्राउ परेपछि उनका श्रीमान् सिआइबीमा पुगेर यस्तो गुनासो गर्दै थिए। पक्राउ परेका ३६ मध्ये ६ जना महिला छन्।<br></p>