27.29¡ÆC
काठमाडौँ । कोरोना भाइरस सङ्क्रमणको जोखिम बढ्दै गएपछि काभ्रेमा प्रशासन र मालपोतले आजदेखि वार अनुसार सेवा दिने भएका छन् ।
जिल्ला प्रशासन कार्यालय र जिल्ला मालपोत कार्यालयले पालिका तोकेर आजदेखि वारअनुसारको सेवा दिने निर्णय गरेका हुन् । सेवाग्राहीको भीडभाड हुने भएकाले स्वास्थ्य–सुरक्षाका मापदण्ड अपनाइ वार अनुसार सेवा तोकिएको प्रशासनले जनाएको छ ।
अर्को व्यवस्था नभएसम्मका लागि धुलिखेल, पाँचखाल र पनौती नगरपालिकामा आइतवार, मङ्गलवार र बिहीवार तथा बनेपा, मण्डनदेउपुर र नमोबुद्ध नगरपालिकामा सोमवार, बुधवार र शुक्रवार सेवा प्रवाह हुनेछ । यस्तै जिल्ला मालपोत कार्यालय धुलिखेलले पनि आजदेखि वारअनुसार नै सेवा प्रवाह गर्ने जनाएको छ ।
कार्यालयले अर्को सूचना नआएसम्मका लागि बनेपा र नमोबुद्ध नगरलाई आइतवार र बुधवार, धुलिखेल र मण्डनदेउपुर नगरलाई सोमवार र बिहीवार तथा पाँचखाल र पनौती नगरलाई मङ्गलवार र शुक्रवार सेवा उपलब्ध गराउने जनाएको हो ।
गाउँपालिकामा हरेक दिन सेवा उपलब्ध रहेको प्रमुख जिल्ला अधिकारी शिवराम पोखरेलले जानकारी दिनुभयो ।
