तराई मधेश द्रूत मार्ग र निजगढ बिमानस्थल पाँचबर्षभित्र सम्पन्न गर्न निर्देशन

<p>११ जेठ, काठमाडौं ।<br>व्यवस्थापिका संसद्, अर्थ समितिले काठमाडौं तराई–मधेश द्रूत मार्ग र निजगढ दोस्रो अन्तर्राष्ट्रिय विमानस्थल निर्माणको कार्य पाँच वर्षभित्र सम्पन्न गर्ने गरी पर्याप्त बजेट विनियोजन गर्न सरकारलाई निर्देशन दिएको छ ।<br><br>अर्थ समितिका सभापति प्रकाश ज्वालाको अध्यक्षतामा मंगलबार सिंहदरबारमा बसेको समितिको बैठकले तराई–मधेश द्रूत मार्ग र निजगढ दोस्रो अन्तर्राष्ट्रिय विमानस्थल आयोजनाका लागि चालू आर्थिक वर्षमा १५ देखि २० अर्ब रुपियाँ बजेट विनियोजन गर्न सरकारलाई निर्देशन दिएको हो ।<br><br>समितिले यसअघि निर्देशन दिए अनुरुप तराई–मधेश द्रूत मार्ग र निजगढ दोस्रो अन्तर्राष्ट्रिय विमानस्थल निर्माण कार्य सरकार आफैले गर्ने गरी नीति तथा कार्यक्रममा समावेश गरिएकोमा सरकारलाई धन्यवाद समेत दिएको छ ।<br><br>यसैगरी, समितिले हुलाकी राजमार्ग निर्माणको काम समयमा नै सम्पन्न गर्नका लागि पर्याप्त बजेट विनियोजन गर्न समेत सरकारलाई निर्देशन दिएको छ ।<br><br></p>