मुश्लिम देशका नागरिक छिर्न नदिने ट्रम्पको निर्णय अदालतद्धारा रोक, क्यानडाले गर्यो अर्को घोषणा

<p>एजेन्सी ।<br>राष्ट्रपतिमा निर्वाचीत भएसँगै मुश्लिम देश र धर्ममा आस्थाराख्नेप्रति कडा रवैया अपनाउन थालेका डोनाल्ड ट्रम्पको पहिलो ठूलो निर्णयमाथि अदालतले नै अवरोध खडा गरिदिएको छ ।<br><br>अमेरिकी अदालतले अमेरिका प्रवेश गर्ने क्रममा विभिन्न विमानस्थलमा हिरासतमा लिइएका सात मुस्लिम बाहुल्य देशका नागरिकलाई डिपोर्ट नगर्न आदेश दिएको छ ।<br><br>राष्ट्रपति ट्रम्पले ती देशका नागरिकलाई ९० दिनका लागि अमेरिका प्रवेशमा रोक लगाउने निर्णय कार्यान्वयन गरेर हिरासतमा लिन थालेको २४ घण्टा नबित्दै अदालतको यस्तो आदेश आएको हो ।<br><br>राष्ट्रपति ट्रम्पले शुक्रबार गरेको उक्त निर्णयविरुद्ध अमेरिकन सिभिल लिबर्टिज युनियन 'एसिएलयु' शनिबार अदालत पुगेको थियो ।<br>उक्त मुद्धामाथि सुनुवाई गर्दै न्यूयोर्कस्थित अदालतकी न्यायाधीश एन डनेल्लीले शरणार्थी आवेदन स्वीकृत भइसकेका, वैध भिसा भएका र अमेरिका प्रवेशमा कानुनी अधिकारप्राप्त व्यक्तिहरुलाई निकाला गर्ने काम रोक्न आदेश दिएकी हुन् । <br><br>ट्रम्पले इरान, इराक, सिरिया, लिबिया, यमन, सुडान र सोमालियाका नागरिकलाई ९० दिनसम्म अमेरिका प्रवेशमा रोक लगाउनेसम्बन्धी आदेशमा हस्ताक्षर गरेका थिए । यसका साथै संसारभरबाट अमेरिका प्रवेश गर्ने शरणार्थीलाई १ सय २० दिनका लागि अमेरिका प्रवेशमा रोक लगाउने निर्णय उनले गरेका छन् ।<br><br>अमेरिकी गृह मन्त्रालयले अदालतको आदेशलाई पालना गर्ने जनाएको छ । न्यूयोर्कपछि भर्जिनिया, म्यासाचुसेट्स र वाशिङगटनमा पनि यस्तै खालका आदेशहरु दिइएका छन् । <br><br>एसिएलयुका कार्यकारी निर्देशक एन्थोनी डी रोमियोले अदालतको आदेशको प्रशंसा गर्दै&nbsp; भने, ‘सरकारी दुरुपयोग अथवा असंवैधानिक नीति तथा आदेशविरुद्ध हाम्रो अदालतले जस्तो हुनुपथ्र्यो त्यस्तै काम गरेर बचाउ गरेको छ, एक सातामै डोनाल्ड ट्रम्पले अदालतबाट पहिलो हार बेहोरेका छन् ।’ मुद्धाको अन्तिम सुनुवाई भने आगामी फेब्रुवरीमा हुने बताइएको छ ।<br><br>ट्रम्पको आप्रवासीसम्बन्धी निर्णयको विरोध गर्दै विभिन्न विमानस्थलमा हजारौं मानिसले प्रदर्शन गरिरहेका छन् ।<br><br>यसैबिच क्यानडाका प्रधानमन्त्री जस्टीन त्रुदेउले अमेरिकाले बन्देज गरेका शरणार्थी तथा आप्रवासीहरुलाई क्यानाडाले स्वागत गर्ने बताएका छन् । </p><p>ट्विटरमा उनले लेखका छन् -जसले हिंसा, आतंक र युद्ध भोगिरहेको छ, ती सबैलाई क्यानडा स्वागत गर्न चाहान्छ । विविधता हाम्रो शक्ती हो, क्यानडामा स्वागत छ ।'<br></p>