<p>काठमाडौं । संघीय संसदअन्तर्गतको बिहीबार बसेको प्रतिनिधी सभाको बैठकमा सत्तापक्ष र प्रतिपक्षबीच अनौठो घटना देखा पर्‍यो । गृहमन्त्री रामबहादुर थापा बादललाई प्रश्न गर्न नपाएको भन्दै झोक्किएका प्रमुख प्रतिपक्षी दल कांग्रेसका सांसदहरूले चालू अवस्थामा रहेको बैठक बहिस्कार गरेर बाहिरिए । नयाँ पत्रिका दैनिकले समाचार छापेको छ ।<br><br>संसद बैठकको शुन्य र विशेष समयमा सांसदहरुले उठाएका विभिन्न प्रश्नहरुको सरकारका तर्फबाट गृहमन्त्री बादलले जवाफ दिए ।<br><br>गृहमन्त्री बादलले कञ्चनपुरमा बालिका बलात्कारपछि भएको हत्या प्रकरण र सांसद निरुदेवी पालमाथि भएको धम्कीलागायतका विषय समेटेर जवाफ दिए ।<br><br>उनको जवाफ सकिएपछि कांग्रेसका सांसदहरुले असन्तुष्टि जनाउँदै प्रतिप्रश्न गर्न सभामुख कृष्णबहादुर महरासँग समय माग गरे । तर, सभामुख महराले प्रतिपक्षीलाई बेवास्ता गर्दै परराष्ट्रमन्त्री प्रदीप ज्ञवालीलाई बोल्न समय दिए ।<br><br>मन्त्री ज्ञवालीले बोलेपछि कांग्रेसका सांसद डा. मिनेन्द्र रिजालले सभामुखसँग पटकपटक बोल्न समय माग गरिरहे । तर, सभामुख महराले सांसद रिजाललाई शुन्य र विशेष समयमा उठेका प्रश्नको मात्रै मन्त्रीले जवाफ दिएको भन्दै समय उपलब्ध गराउन मानेनन् ।<br><br>पुनः रिजालले प्रतिनिधी सभा नियामावली २१९ को ९२० अनुसार मन्त्रीसँग प्रश्नोत्तर गर्न पाउनु पर्ने भन्दै सभामुखसँग अडान कसिरहे ।<br><br>महराले उनलाई नियमावालीको नियम १५ अनुसार मन्त्रीसँग प्रश्नोत्तर गर्न पाउने व्यवस्था नभएको र अर्को बैठकमा बोल्ने समय उपलब्ध गराउने भन्दै बैठकअघि बढाइ नै रहे ।<br><br>कार्यसूचीअनुसार सभामुख महराले संसदीय समितिमा रहने सदस्यहरूको नाम पढेर सुनाए । त्यतिञ्जेल कांग्रेसका सांसदहरू उभिएर सभामुखले वाचन गरेका समितिमा रहने सदस्यहरुको नाम सुनिरहे ।<br><br>त्यसपछि पनि सांसद रिजालले सभामुखसँग प्रतिप्रश्न गर्न पाउनु पर्ने माग दोहोर्‍याइरहे । तर, सभामुख महराले समय उपलब्ध नगराई अर्थमन्त्री डा.युवराज खतिवडालाई बीमासम्बन्धी विधेयक प्रस्तुत गर्न समय दिए । यति भएपछि थप रुष्ट भएका कांग्रेसका सांसदहरु बैठक नै बहिस्कार गरेर बाहिरिए ।<br><br>प्रमुख प्रतिपक्षी दल बाहिरिए पनि सभामुख महराले बैठकको काम कारबाही रोकेनन् । उनले गृहमन्त्री बादललाई अन्तराष्ट्रिय आतंकवाद अन्तरदेशीय संगठित अपराध र अवैध लागूऔषध कारोबारविरूद्ध सहयोगसम्बन्धी विमस्टेक महासन्धि विधेक प्रस्तुत गर्न समय दिए ।<br><br>सो विधेयक संसदमा दर्ता भएपछि महराले शुक्रबारसम्मका लागि प्रतिनिधी सभाको बैठक स्थगन भएको घोषणा गरे ।<br><br>संसदमा भएको यस्तो दुर्लभ घटनाका बारेमा सत्तापक्ष, प्रतिपक्षी र कानुनका जानकारको आ–आफ्नै धारणा छ ।<br></p>

<p>काठमाडौं ।&nbsp; काठमाडौं महानगरपालिकाले विदेशी र स्वदेशी पाहुनाका लागि उपहार किन्न चालु आर्थिक वर्षमा ७५ लाख रुपैयाँ विनियोजन गरेको छ । कामपाका प्रवक्ता ज्ञानेन्द्र कार्कीले मेयर, उपमेयर, प्रमुख प्रशासकीय अधिकृत (सचिव), अन्य जनप्रतिनिधिहरू विदेश भ्रमण जाँदा र विदेशी पाहुना नेपाल आउँदा किन्नुपर्ने उपहारका लागि उक्त रकम विनियोजन गरिएको जानकारी दिए । नेपाल समाचार पत्र दैनिकले खबर छापेको छ ।<br><br>कामनपाले स्वागत तथा अतिथि सत्कारमा २ करोड २५ लाख, अतिथि सत्कार तथा जलपानमा १ करोड ५० लाख, पूजामा ८ लाख, विविधमा ३ करोड रुपियाँ विनियोजन गरेको छ ।<br><br>यस्तै मसलन्द र छपाईमा २ करोड २५ लाख, जनशक्ति तालिममा २ करोड, बैठक तथा समिति भत्तामा १ करोड ५३ लाख, बैठक तथा समिति खर्चतर्फ ३५ लाख, परामर्श शुल्क तर्फ ३० लाख, भ्रमण र दैनिक भत्तातर्फ १ करोड ६० हजार रुपियाँ विनियोजन गरिएको छ । जनप्रतिनिधिले स्थानीय निकाय संचालन गरेपछि यो वर्ष अधिकांस शीर्षकमा रकम बढाइएको हो ।<br></p>

<p>काठमाडौं । प्रधानमन्त्री केपी ओलीले मन्त्रिपरिषद् पुनर्गठनको तयारी गरेका छन् । सत्तारुढ दलबीच चित्त बुझाउन प्रधानमन्त्रीले मन्त्रिपरिषद् पुनर्गठन गर्न लागेका हुन् । नेपाल कम्युनिस्ट पार्टीका महासचिव विष्णु पौडेलले यसै साताभित्र मन्त्रिपरिषद् पुनर्गठन हुने जानकारी दिए । नयाँ पत्रिका दैनिकले समाचार छापेको छ ।<br><br>कानून न्याय तथा संसदीय मामिला मन्त्रीको नियुक्ति, भूमि व्यवस्था तथा गरिबी निवारकमन्त्रीको बढुवा र स्वास्थ्य तथा जनसंख्या राज्यमन्त्रीको शपथ एकैपटक हुने महासचिव पौडेलले बताए । विवादास्पद अभिव्यक्तिका कारण शेरबहादुर तामाङले कानुनमन्त्रीबाट राजीनामा दिएपछि सो मन्त्रालय खाली छ ।<br><br>‘मन्त्रालयको जिम्मेवारी कसलाई के दिने भन्ने विषयमा छलफल भइरहेको छ,’ उनले भने, ‘तर टुंगो लाग्ने गरी पार्टीभित्र छलफल हुनसकेको छैन ।’ प्रधानमन्त्री एवं नेकपा अध्यक्षद्वय केपी ओली र पुष्पकमल दाहाल प्रचण्डले छिट्टै टुंगो लगाउने पौडेलले बताए ।<br><br>कृषि विकास, पशुपक्षी विकास, भूमिसुधार तथा व्यवस्था र सहकारी तथा गरिबी निवारण मन्त्रालय गरी चार मन्त्रालयलाई गाभेर कृषि, भूमि व्यवस्था तथा सहकारी मन्त्रालय बनाइएको थियो । प्रधानमन्त्री ओलीले १० साउनमा साबिकको कृषि, भूमि व्यवस्था तथा सहकारी मन्त्रालयलाई फुटाएर दुई मन्त्रालय बनाएका थिए ।<br><br>अब चक्रपाणि खनाल कृषि तथा पशुपक्षी मन्त्री मात्र हुने भएका छन् । स्वास्थ्य तथा जनसंख्या राज्यमन्त्री पद्मा अर्याललाई नयाँ गठन गरिएको भूमि व्यवस्था तथा गरिबी निवारणमन्त्री बनाउने तयारी गरिएको छ । अर्याललाई राज्यमन्त्रीबाट मन्त्रीमा बढुवा गर्न लागिएको हो । संघीय समाजवादी फोरमका अध्यक्ष उपेन्द्र यादव स्वास्थ्यमन्त्री बनेपछि अर्याललाई नयाँ मन्त्रालयको जिम्मेवारी दिने तयारी गरिएको हो ।<br><br>संघीय समाजवादी फोरमबाट एक राज्यमन्त्री बन्ने भएका छन् । स्वास्थ्य तथा जनसंख्या राज्यमन्त्री अर्याललाई अर्कै मन्त्रालयको जिम्मेवारी दिन लागिएपछि अब फोरमबाट राज्यमन्त्री थपिने भएको छ । फोरमलाई दुई मन्त्री र एक राज्यमन्त्री दिने सहमति भएको थियो ।<br><br>फोरमबाट उपेन्द्र यादव स्वास्थ्यमन्त्री र सहकारी विकास मन्त्रीमा मोहमद इस्तियाक राई छन् । एक राज्यमन्त्रीका लागि तीनजना नेता दौडधुपमा लागेको फोरमका एक नेताले बताए । राज्यमन्त्रीका लागि प्रमिला यादव, डा. सुरेन्द्र यादव र प्रदीप यादव लबिङमा लागेका छन् । फोरममा मधेसी समुदायबाट मन्त्री भइसकेकाले जनजाति समुदायबाट राज्यमन्त्री बनाइनुपर्ने दबाब छ ।<br><br>नेकपामा कानुन, न्याय तथा संसदीय मामिलामन्त्रीका लागि सांसदहरू भानुभक्त ढकाल, कृष्णभक्त पोखरेल र वसन्त नेम्वाङको नाम चर्चामा छ । उनीहरूमध्येबाटै एकजना मन्त्री हुने सम्भावना देखिएको प्रधानमन्त्री सचिवालय स्रोतले जनाएको छ ।<br><br>ढकाल, पोखरेल र नेम्वाङ तीनैजना प्रत्यक्ष निर्वाचित सांसद हुन् । ढकाल मोरङ ३, पोखरेल चितवन २ र नेम्वाङ पाँचथरबाट निर्वाचित भएका थिए । प्रधानमन्त्री ओलीसमक्ष जनजाति समुदायबाटै कानुनमन्त्रीमा बनाइनुपर्ने दबाब धेरै छ ।<br></p>

<p>काठमाडौं । नेपाल कम्युनिस्ट पार्टी (नेकपा)का सचिवालय सदस्य तथा पार्टी प्रवक्ता नारायणकाजी श्रेष्ठले प्रवक्ता पदबाट राजीनामा दिएका छन् । अध्यक्षद्वय केपी ओली र पुष्पकमल दाहाल प्रचण्डलाई सम्बोधन गर्दै उनले गत शनिबारको केन्द्रीय सचिवालय बैठकमा प्रवक्ता पदबाट राजीनामा दिएका हुन् । नयाँ पत्रिका दैनिकले समाचार छापेको छ ।<br><br>पार्टी नीतिविपरीत डा गोविन्द केसीलाई भेटेर नैतिक समर्थन जनाएको भन्दै प्रवक्ता श्रेष्ठसँग पछिल्लो सचिवालय बैठकमा अध्यक्ष ओलीले मौखिक स्पष्टीकरण लिएका थिए ।<br><br>‘पार्टीको जानकारीविना तपाईंले किन भेट्नुभो, कसको अनुमतिमा भेट्नुभो, सामाजिक सञ्जालमा भेटको प्रचार पनि गर्नुभएछ’ भन्दै बैठकमा ओलीले स्पष्टीकरण लिएका थिए । अर्का अध्यक्ष प्रचण्डले पनि ‘पार्टीको जानकारीविना भेटेर गलत काम गरेको र उनको नाममा कांग्रेसको आन्दोलनलाई मलजल गरेको’ भन्दै ओलीको भनाइलाई समर्थन जनाएपछि श्रेष्ठले तत्काल राजीनामाको घोषणा गरेको सचिवालयका एक नेताले बताए ।<br><br>दुवै अध्यक्षले पालैपालो स्पष्टीकरण सोधेपछि प्रवक्ता श्रेष्ठले ‘मैले किन भेट्न नपाउने रु’ भन्दै झोक्किएर राजीनामाको घोषणा गरेको र थोरै शब्दको राजीनामापत्र लेखेर बाहिरिएको एक नेताले बताए ।<br><br>‘त्यसो भए मलाई यो प्रवक्ता पद चाहिएन, मैले राजीनामा दिएँ भन्दै लिखित राजीनामापत्र बुझाएर उहाँ बैठकबाट बाहिरिनुभो,’ ती सचिवालय सदस्यले नयाँ पत्रिकासँग भने ।<br><br>‘मैले डा। केसी मूलतः सत्याग्रही हुनुहुन्छ र उहाँले उठाउनुभएको मूल मुद्दा सही छ, माथेमा प्रतिवेदनको मूल पक्ष सकारात्मक छ, हाम्रो पार्टीका नेता–कार्यकर्ताले पनि विनापूर्वाग्रह यसलाई आत्मसात् गरी वार्ताद्वारा समस्याको समाधान गर्नुपर्छ भन्दा तीव्र विरोध गर्नेलाई पनि अहिले धन्यवाद छ,’ प्रवक्ता श्रेष्ठले डा केसीलाई भेटिसकेपछि १० साउनमा ट्विटरमा लेखेका थिए ।<br><br>उनले तत्कालीन कानुनमन्त्री शेरबहादुर तामाङको विवादित भिडियो सार्वजनिक भएपछि पनि ‘तामाङले गलत काम गरेकाले माफी माग्नुपर्ने र पार्टीको ध्यानाकर्षण हुनुपर्ने’ भन्दै सामाजिक सञ्जालमा धारणा राखेका थिए ।<br></p>

<p>काठमाडौं । नेकपा अध्यक्ष पुष्पकमल दाहाल प्रचण्डले चीन र भारतका राजनीतिक चासो र चलखेल गर्ने राजनीतिक र गुप्तचर निकायका प्रमुखसँग सम्बन्ध बढाएका छन् । कुनै बेला भारतीय र चिनियाँ एजेन्सीका अधिकारीबाट खतरामा रहेको भन्ने प्रचण्डले राजा महेन्द्र शाह पथीय राजनीतिलाई अगाडि बढाउन थालेका छन् ।<br><br>पार्टीका तर्फबाट सरकारको नेतृत्व अध्यक्ष ओलीले गरे पनि चिनियाँ तथा भारतीय अधिकारीले प्रचण्डलाई चलायमान बनाउन थालेका छन् । जनप्रहार साप्ताहिकले समाचार छापेको छ ।<br><br>सोमबार चिनियाँ उप विदेशमन्त्री वाङ वाजुङसँग भेट गरेका प्रचण्ड मंगलबार भारतको गुप्तचर संस्था रिसर्च एन्ड एनालाईसीस विङ (रअ)को प्रत्यक्ष आयोजनामा हुन लागेको कार्यक्रममा पनि पुग्दैछन् ।<br><br>चिनियाँ विदेशमन्त्रीले नेपालमा भारतको सक्रियताका विषयमा प्रचण्डसँग जानकारी लिएका थिए । उनले नेपालमा भारतीय अधिकारीहरू आउने गरेको बताए पनि नेपालको विकासको लक्ष्य चीनसँगको साझेदारीमा नै हुने बताएका थिए । तर चीन यत्तिमा आश्वस्त हुने अवस्था भने छैन ।<br><br>उच्च स्रोतका अनुसार नेपालले चीन र भारतसँग समदुरी राख्ने रणनीति अपनाएअनुसार नेकपाका नेतृत्वको भेट भइरहेको हो । तर प्रचण्ड भने महेन्द्र पथीय राजनीतिमा सक्रिय भएका छन् । उनले सरकार भन्दा पनि राजनीतिक नेतृत्व र तिनका प्रतिनिधिलाई पार्टी र सकारको नीतिका बारेमा बुझाउन थालेका छन् ।<br><br>‘उच्च अधिकारीसँग पार्टीको नीति र पार्टीले सरकारमा अख्तियार गरेको नीतिका विषयमा अध्यक्ष प्रचण्डले बुझाउने गर्नु भएको छ, दैनिकजसो उहाँको भेट दुवै देशका गुप्तचर अधिकारीसँग भइरहेको हुन्छ, उनीहरू जानकारी लिन आउँछन्’, उच्च स्रोतले भन्यो, ‘तर नेपालको नीति र आयोजनाका विषयभन्दा पर गएर कुराकानी हुने गरेको छैन ।’<br><br>चिनियाँ विदेशमन्त्रीसँग पुगेका चीनका उच्च अधिकारीहरूले नेपालमा कम्युनिस्ट सरकार गठन भए पनि भारतसँग राखेको झुकावले चीनलाई अप्ठेरोमा नपार्नका लागि आग्रह गरेका थिए ।<br><br>चिनियाँ अधिकारीले नेपालको एक चीन नीति भनिए पनि ललितपुरमा राजनीतिक दलका नेताको सहभागीतामा स्वतन्त्रत तिब्बतका विषयमा भएको कार्यक्रमबारे सोधेका थिए । प्रचण्डले त्यसमा सरकार र पार्टी अनभिज्ञ भएको भन्दै ढाँटेका थिए ।<br></p>