२० चैत, बेइजिङ ।
चीनले संयुक्त राष्ट्रसंघमा आतंकवाद मुद्दा लैजाने भारतीय चाहनाको विपक्षमा आफूलाई उभ्याएको छ।
 
पञ्जावको पठानकोट एयरबेसमा भएको आतंकवादी आक्रमणको मुद्दालाई भारतले संयुक्त राष्ट्रसंघमा उठाउँदै जैस ए मोहम्मद प्रमुख मौलान मसुद अजहरमाथि प्रतिवन्ध लगाउनुपर्ने माग गरेको थियो। अन्नपूर्ण पोस्ट दैनिकमा समाचार छ।
 
भारतले अल कायदा सेक्सन कमिटीमा रहेका मौलाना मसुद अजहरमाथि राष्ट्रसंघ मार्फत कारबाही चलाउन खोजेको थियो।
 
समाचारअनुसार संयुक्त राष्ट्रसंघमा १५ देशमध्ये १४ देश मोलानामाथि प्रतिवन्ध लगाउने पक्षमा थिए। तर पनि चीन एक्लै अर्कातर्फ उभिएपछि आतंकबादी संगठनका पक्षमा निर्णय गएको आरोप भारतीय सञ्चारमाध्यमहरुको छ। चीनले भारतीय मागका पक्षमा जान नसक्ने बताएको छ।
 
चीनको विदेश मन्त्रालयका प्रवक्ता होङलीले कुटनीतिक जवाफ दिँदै आफ्नो मुलुक सवैखालको आतंकबादको विपक्षमा रहेको बताएका छन्। आतंकवादका विरुद्धमा राष्ट्रसंघले निर्वाह गर्ने केन्द्रीय तथा समन्वयकारी भूमिकामा चीनको सधै साथ रहने उनले स्पष्ट पारे।
 
मौलानामाथि प्रतिबन्ध लगाउने भारतको प्रस्तावमाथि अमेरिका, बेलायत र फ्रान्सले पनि समर्थन गरेका थिए। संयुक्त राष्ट्रसंघका पाँच स्थायी सदस्य राष्ट्रमध्ये चीन पनि एक हो। चीन्ले आफ्नो भिटो शक्तिको प्रयोग गर्दै भारतको यस प्रस्तावलाई रोकिदिएको हो।
 
पाकिस्तानसहित चीन पनि अब मौलानासँगै अभिएकोमा भारतीय पक्ष भने रुष्ट छ।

२१ चैत, काठमाडौं ।
मोटरसाईकल दुर्घटनामा परि काठमाडौंको स्वयम्भूमा दुई जनाको मृत्यु भएको छ । दुर्घटनामा परि अर्का एक गम्भिर घाईते भएका छन् ।

प्रहरीका अुनसार गएराति बा ३० प ४५५० नम्बरको मोटरसाइकल अनियन्त्रित भएर सडकपेटीमा ठोक्किँदा मोटरसाइकल चालक काठमाडौं कलंकीका २८ वर्षीय शैलेन्द्र रिसाल र मोटरसाइकलमा पछाडि बसेका २९ वर्षीय सोनु रिसालको मृत्यु भएको हो ।

दुर्घटनामा परी गम्भीर घाइते भएका उनीहरुको उपचारका क्रममा वीर अस्पतालमा मृत्यु भएको हो ।

मोटरसाईकलमा तीन जना चढेको र एकको भने उपचार भइरहेको प्रहरीले जानकारी दिएको छ ।

काठमाडौं,चैत १९ । राष्ट्रिय प्रजातन्त्र पार्टी केन्द्रीय सदस्य एवम् उच्चस्तरीय कार्यसम्पादन समिति सदस्य पर्शुराम खापुङ्ग पार्टी परित्याग गरी नयाँ शक्ति अभियानमा जोडिएका छन्।  खापुङ्गले शुक्रवार रिपोर्टर्स क्लब नेपालमा पत्रकार सम्मेलन गरी राप्रपा छलछाम, जालझेल, चाकडी चाप्लुसी, चुक्ली, अवसरवाद हावी भएकोले त्यसबाट देश र जनताको सेवा सम्भव नदेखेकोले आफूले आजैको मिति देखि पार्टी परित्याग गरेर नयाँ पार्टी निर्माणकोलागि पूर्वप्रधानमन्त्री बाबुराम भट्टराई संयोजक रहेको नयाँ शक्ति अभियानसँग मिलेर काम गर्ने बताए। 
 
उनले भने,'ठूलो आन्दोलनपछि पनि जनता सन्तुष्ट छैनन। सरकार गफाडीको जत्था जस्तो भयो, भूकम्पपीडितले राहत पाएनन्। जनताले अहिलेसम्म परिवर्तनको महसुस गर्न पाएका छैनन। राप्रपा, एमाले, काग्रेस, माओवादी मधेसवादी र जनजाति पार्टी कोहीबाट पनि अब देशको सेवा सम्भव नदेखेर नयाँ शक्तिसँग मिलेर नयाँ पार्टी निर्माण अभियानमा लाग्ने गरी राप्रपा परित्याग गरेको हुँ।'
 
खापुङले नयाँ शक्तिका संयोजक डा. भट्टराई बामपन्थी सोचबाट आए पनि अहिले प्रजातन्त्र र लोकतन्त्र बाटो हुँदै समृद्ध मुलुक निर्माणमा लागेकोले नयाँ पार्टी निर्माणको लागि अभियानमा लागेको स्पष्ट पारे। 
 
उनले राप्रपाले नयाँ संविधान जारी भएपछि सोही अनुसार पार्टीलाई अगाडि बढाउनु पर्नेमा त्यस विपरित कार्य गरेको भन्दै आफूले सक्दो सुधारको प्रयास गरे पनि त्यहाँबाट अब देशले निकास पाउन सम्भव नरहेको देखेर पार्टी परित्यागको निर्णयमा पुगेको बताए। 

काठमाडौं,चैत २७ । क्रान्तिकारी ध्रुविकरणले तीव्रता पाइरहेको बेला एकीकृत नेकपा माओवादीका क्षेत्रीय इन्चार्ज नेत्रविक्रम चन्द ‘विप्लव’ नेतृत्वको नेकपा माओेवादीमा प्रवेश गरेका छन् । शनिबार संवाद डबलीमा माओवादी पार्टीले आयोजना गरेको ‘क्रान्तिकारी धु्रविकरण कार्यक्रम’मा एमाओवादीका काठमाडौं क्षेत्र नं. ४ का इन्चार्ज सन्तोष सुवेदी ‘प्रयास’ नेकपा माओवादीमा प्रवेश गरेका हुन् ।
पार्टी प्रवेशी प्रयासलाई कार्यक्रमका प्रमुख अतिथि तथा नेकपा माओवादीका पोलिट ब्युरो सदस्य तथा उपत्यका ब्युरो इन्चार्ज सन्तोष बुढाले खादा–टीका लगाएर स्वागत गरेका थिए ।
ध्रुविकरण कार्यक्रममा बोल्दै उपत्यका इन्चार्ज सन्तोष बुढाले हालै सम्पन्न नेकपा माओवादीको केन्द्रीय समितिको बैठकले लिएको निर्णयअनुरुप क्रान्तिकारी साथीहरुलाई क्रान्तिको महायात्रामा गोलबन्द हुन आह्वान गरिएको र सोही अनुरुप क्रान्तिकारी साथीहरु माओवादीमा प्रवेश गरेकोमा खुशी व्यक्त गरे । उनले यो क्रम देशभर तीव्र रुपमा चलिरहेको बताए ।
सोही क्रममा विभिन्न पार्टीहरु छरिएर रहेका क्रान्तिकारीहरु राष्ट्रिय स्वाधीनताको रक्षा र अधुरो नेपाली क्रान्तिलाई पूर्णता दिन माओवादीमा गोलबन्द आह्वान पनि गरेका थिए ।
नेता बुढाले माओवादीहरुबीच एकता हुने चर्चा आत्मसमर्पणवादी र विसर्जनवादीहरुले चलाएको र एकताको विषयलाई नेकपा माओवादीले एजेण्डा नबनाएको समेत स्पष्ट पारेका छन् ।
एमाओवादी संसदीय माओवादी बन्न पुगेको र वैद्य माओवादी अकर्मण्यताको खाडलमा पुगेको बताए । एमाओवादी र वैद्य माओवादीभित्र रहेका सच्चा क्रान्तिकारीहरुलाई क्रान्तिकारी पार्टी नेकपा माओवादीको एकीकृत जनक्रान्तिकारीको कार्यदिशमा एकजुट हुन पनि उनले आह्वान गरे । क्रान्तिकारी शक्तिलाई दबाल संसदवादी शक्तिहरु विदेशीसँग गठजोड गरेर लागिरहेको त्यसलाई विफल पार्न नेकपा माओवादी पनि दृढताका साथ अघि बढिरहेको उनले बताए ।
त्यस्तै पार्टी नवप्रवेशी सन्तोष सुवेदीले एमाओवादी संसदीय भासमा फसेको र यसले राष्ट्रिय स्वाधीनताको पक्षमा कहिल्यै काम नगर्ने निष्कर्ष आफू पुगेपछि क्रान्तिकारी पार्टी विप्लव नेतृत्वको नेकपा माओवादी पार्टीमा आवद्ध हुन भएको बताए ।
‘एमाओवादी नेतृत्वमा चित्र र चरित्र कतैकही मेल नखाएको र यसबाट महान जनयुद्धले लिएको लक्ष्यमाथि धोका दिएकोले आज म एमाओवादी पार्टी त्यागेर क्रान्तिकारी पार्टी नेकपा माओवादीमा आएको छु’ सुवेदीले भने ।
उनले एमाओवादीका क्रान्तिकारी साथीहरु छिट्टै पार्टी छाडेर समयमै क्रान्तिकारी पार्टीमा सामेल हुन आग्रह गरेका छन् । एमाओवादी क्रमशः एमालेकरण हुँदै गएको र यसले सधैं जनतालाई धोका मात्र दिने गरेको बताए । सुवेदी एकीकृत नेकपा माओवादीका नेता झक्कु सुवेदीका जेठा छोरा हुन् । कार्यक्रमा माओवादी केन्द्रीय सदस्य माईला लामा,गुणराज लोहनी, आदर्श लगायतका नेताहरुको पनि उपस्थिति थियो ।