<p>११ जेठ, काठमाडौं ।<br>नेपाली काँग्रेसका वरिष्ठ नेता रामचन्द्र पौडेलले राजनीतिलाई सम्मानित गराउन गाउँदेखिका नेता–कार्यकर्ता जनसेवी र चरित्रवान हुनुपर्ने बताउनुभएको छ ।</p><p>सामाजिक लोकतन्त्र अध्ययन केन्द्रद्वारा राजधानीमा आयोजित ‘राजनीतिलाई कसरी सम्मानित क्षेत्र बनाउन सकिन्छ’ विषयक गोष्ठीमा वरिष्ठ नेता पौडेलले जनताले आफ्नो नजिकको नेतालाई राम्रोसँग चिन्ने भएकाले उनीहरु जिम्मेवार हुनुपर्ने बताउनुभयो ।</p><p>अहिले नेपालको राजनीति भनेकै सत्ताको लुछाचुँडी, ढाँटछल, गण्डागर्दी र झुटा आश्वासन बाँड्ने कार्यका रुपमा बुझ्न लागिएकोप्रति चिन्ता व्यक्त गर्दै उहाँले राजनीतिलाई मर्यादाको सीमाभित्र राख्नुपर्नेमा जोड दिनुभयो ।</p><p>कार्यक्रममा पार्टीका पूर्वमहामन्त्री प्रकाशमान सिंहले नेता तथा कार्यकर्ताको जीवनशैली र व्यवहार जनमैत्री भएमा राजनीतिक क्षेत्रको सम्मान आफैँ बढ्ने बताउनुभयो ।</p><p>
कार्यक्रममा काँग्रेसका नेता प्रदीप गिरी, मानबहादुर विश्वकर्मा, कोषाध्यक्ष सीतादेवी यादव, जीवन परियार, राजनीतिज्ञद्वय नीलाम्वर आचार्य र प्रा कृष्ण खनाल, मधु आचार्यलगायतले राजनीतिलाई सम्मानित बनाउने उपायका बारेमा धारणा राख्नुभएको थियो । <br><br></p>

<p>११ जेठ, काठमाडौं ।<br>सरकारले आन्दोलनरत मधेशी मोर्चासंग भइरहेका संवाद र अनौपचारिक छलफलका बारेमा दलहरुलाई जानकारी गराएको छ ।<br><br>प्रधानमन्त्री केपी शर्मा ओलीको आव्हानमा आज भएको सर्वदलीय बैठकमा मधेशी मोर्चा उपस्थित नभए पछि प्रमुख प्रतिपक्षि काँग्रेसलगायतका दलहरुलाई वार्ताका लागि भइरहेका प्रयाशकाबारेमा प्रधानमन्त्रीले जानकारी गराउनु भएको हो । <br><br>बैठक पछि नेकपा एमालेका नेता एवं कानून मन्त्री अग्नी खरेलले मधेशी मोर्चासंग छलफल गरेरै आजको बैठक राखिएको भए पनि पछिल्लो समयमा मोर्चाले बैठकमा उपस्थित हुन नसक्ने जानकारी गराएकाले वार्ता र संवादबाट समस्या समाधान गर्नका लागि फेरि छिट्टै बैठक गरिने सहमति भएको बताउनुभयो ।<br><br>नेपाली काँग्रेसका नेता महेश आर्चायले मोर्चाका मागका विषयमा अनावश्यक टिकाटिप्पणी गर्नु भन्दा पनि परिणाममुखी वार्ताका लागि सरकारले पहल गर्नुपर्ने र त्यसका लागि सहयोग गर्न काँग्रेस तयार रहेको जानकारी गराएको बताउनुभयो । <br><br>मधेशी जनअधिकार फोरम लोकतान्त्रिकका अध्यक्ष एवं उपप्रधानमन्त्री विजयकुमार गच्छदारले सरकारले वार्तालाई गम्भिरता पूर्वक अघि बढाएकाले आन्दोलनरत मोर्चा वार्तामा आउनु पर्ने बताउनुभयो । <br><br>नेकपा माओवादी केन्द्रका नेता रामबहादुर थापाले समस्यालाई वार्ताबाटै समाधान गर्ने विषयमा प्रमुख प्रतिपक्षिलगायत दलहरुसंग छलफल भएको बताउनुभयो ।<br><br>प्रधानमन्त्री ओलीले वार्ताका लागि हिजो मोर्चाका नेताहरुलाई पत्राचार गर्नुभएको थियो ।<br><br><br></p>

<p>११ जेठ, भक्तपुर । <br>आन्दोलनरत २९ दलीय संघीय गठबन्धनले आज भक्तपुरमा बिरोध सभाको आयोजना गरेको छ ।</p><p>बिरोधसभामा बोल्दै राष्ट्रिय मधेश समाजवादी पार्टीका अध्यक्ष शरदसिंह भण्डारीले संघीय गठबन्धनको अस्तित्व स्वीकार नगरेसम्म सरकारसंग वार्तामा नबस्ने बताउनु भएको छ ।</p><p>उहाँले संघीय गठबन्धन भित्रै मधेशी मोर्चा पनि भएकाले यो अस्तित्वलाई सरकारले स्वीकार गरेर मात्रै वार्तामा बोलाउनु पर्ने बताउनुभयो ।उहाँले सरकारले संघीय गठबन्धनलाई फुटाउने षडयन्त्र गरेको आरोप लगाउनुभयो ।</p><p>कार्यक्रममा तराई मधेश सद्भावना पार्टीका अध्यक्ष महेन्द्र राय यादवले सार्थक वार्ताको पक्षमा गठबन्धन रहेको बताउँदै सरकारले सार्थक वार्ता नचाही आन्दोलन दबाउन खोजेकाले वार्ता सफल हुन नसकेको जिकिर गर्नुभयो ।</p><p>त्यस अवसरमा संघीय समाजवादी फोरमका उपाध्यक्ष रकम चेम्जोङ्गले गठबन्धनको अहिलेको आन्दोलन निर्णायक आन्दोलन भएको दाबी गर्दै जातीय समानुपातिक प्रतिनिधित्व र अधिकारको सुनिश्चितता नभएसम्म आन्दोलन जारी रहने बताउनुभयो ।</p><p>कार्यक्रममा गठबन्धनमा आबद्ध बिभिन्न दलका नेताहरुले देशभरका विभेदमा परेका जनताको अधिकारका लागि अहिलेको आन्दोलन भएकाले सबैलाई साथ दिन आग्रह गर्नुभएको थियो । <br><br></p>