28.12¡ÆC
काठमाडौँ । नेपाल टेलिकमले बाढी प्रभावित क्षेत्र र आसपासका सेवाग्राहीलाई उपलब्ध गराउँदै आएको निःशुल्क भ्वाइस, डाटा र एसएमएस सेवा अर्को व्यवस्था नभएसम्म निरन्तर उपलब्ध गराउने भएको छ ।
यसअघि भदौ १४ गतेसम्मका लागि निःशुल्क भ्वाइस कल, प्रतिदिन २ जीबी डाटा र ५० वटा एसएमएस सुविधा उपलब्ध गराइएको थियो। अब उक्त सुविधा थप समयका लागि निरन्तर रहने भएको हो ।
नेपाल टेलिकमले बाढी प्रभावित क्षेत्रका बासिन्दालाई आवश्यकता अनुसार निःशुल्क सेवा प्रयोग गर्न अनुरोध गरेको छ ।
बाढीका कारण कम्पनीका विभिन्न भौतिक संरचनामा क्षति पुगे पनि दूरसञ्चार सेवा यथासम्भव नियमित राख्न तथा क्षतिग्रस्त संरचनाको मर्मत–सम्भारका लागि प्राविधिक टोली निरन्तर परिचालन भइरहेको टेलिकमले जनाएको छ ।
कम्पनीका अनुसार अधिकांश संरचना सुचारु भइसकेका छन् भने बाँकी संरचना पनि सञ्चालनमा ल्याउने काम भइरहेको छ ।
विपद्को अवस्थामा निःशुल्क दूरसञ्चार सेवाले प्रभावित क्षेत्रका नागरिकलाई आफन्तजनसँग सञ्चार सम्पर्क कायम गर्न तथा राहत र उद्धार कार्यमा समेत सहयोग पुग्ने नेपाल टेलिकमले जनाएको छ ।
