22.12¡ÆC
काठमाडौँ । प्रतिनिधिसभा नियमावलीको मस्यौदा समितिले आफ्नो प्रतिवेदन सभामुख डीपी अर्याललाई बुझाएको छ । प्रतिनिधिसभाको बैठकले गएको चैत २३ गते गठन गरेको रास्वपाका सांसद गणेश पराजुली नेतृत्वको मस्यौदा समितिले आज नियमावलीको मस्यौदा बुझाएको हो ।
मस्यौदामा बैठक कक्षमा फोन मौन अवस्थामा राख्नुपर्ने, फोनमा कुरा गर्न, फोटो खिच्न तथा अडियो र भिडियो रेकर्ड गर्न नहुने उल्लेख छ । यस्तै अशिष्ट, अश्लील, अपमानजनक शब्द वा कुनै जाति, धर्म, भाषा, वा लिङ्गलाई होच्याउने गरी बोल्न तथा बोल्न पाउने अधिकारलाई सदनको कार्यमा बाधा पार्ने मनसायले दुरुपयोग गर्न नहुने पनि मस्यौदामा भनिएको छ ।
यस्तै सभामुखले समय दिएपछि मात्र बोल्नुपर्ने र तोकिएको स्थानमा उभिएर बोल्नुपर्ने, सभामुखले बैठकलाई सम्बोधन गरिरहेको बेला कुनै पनि सदस्यले आफ्नो स्थान छाड्न नहुने र बोलेको कुरा ध्यानपूर्वक सुन्नुपर्ने जस्ता कुरा राखिएका छन् । यस्तै बैठकमा मन्त्री अनिवार्य उपस्थित हुनुपर्ने, आकस्मिक, शून्य र विशेष समयमा उठेका विषयको ७ दिनभित्र अनिवार्य जवाफ दिनुपर्नेलगायतको विषय समेटिएको छ ।
