फलाखु खोला जलविद्युत् आयोजनाको काम तिहारपछि सुरु हुने

<p>बेत्रावती । नौकुण्ड गाउँपालिका–१, थाङदोरमा निर्माण भइरहेको फलाखुखोला जलविद्युत् आयोजनाको कामले तिहारपछि निरन्तरता पाउने भएको छ ।<br><br>वर्षाको कारण असार अन्तिमदेखि आयोजनाको निर्माण कार्य रोकिएको थियो । वर्षाको समयमा काम गर्न नसकिने भन्दै चिनियाँ कामदार फर्किएपछि आयोजनाको काम रोकिएको हो ।<br><br>१४.७ मेगावटको आयोजनाको ३० प्रतिशत काम सकिएको छ । डेड वर्षभित्र निर्माण कार्य सकाउने आयोजनाले जनाएको छ । यो आयोजना चिनियाँ ठेकेदार चोङकिङ वाटर टर्वाइन वक्र्स कम्पनी लिमिटेड (सीडब्लूटीडब्लू) ले निर्माण गरिरहेको छ ।<br><br>आयोजनाले जग्गा अधिग्रहण, लाइन निर्माण, बाटो निर्माण र क्याम्प निर्माण सम्पन्न गरेसँगै संरचना निर्माणको काम अघि बढाएको बेत्रावती हाइड्रो इलेक्ट्रिक कम्पनीले जनाएको छ ।<br><br>यार्सामा हेडवक्स रहने आयोजनाको घिचेतमा पावर हाउस रहनेछ । आयोजनाको लागत दुई अर्ब ४० करोड रुपैयाँ रहेको छ । दुई हजार तीन सय मिटर टनेल र एक हजार आठ सय मिटर पेनस्टक रहने आयोजनाले जनाएको छ । जसमा तीन सय मिटर टनेल निर्माण भइसकेको छ ।<br><br>आयोजनाको सुरक्षाको लागि नेपाली सेनाको कालीजंग गणको क्याम्प राखिएको छ ।<br></p>