लागु औषधबाट छुटेको ६ महिना नपुग्दै किशोरी समाउन पुगेपछि…

<p>८ कार्तिक, नुवाकोट । यहाँको एक किशोरीलाई जबरजस्ती करणी गर्न खोजेको अभियोगमा नुवाकोट प्रहरीले विदुर नगरपालिका वडा नं. ९ का प्रदिप बिसुन्केलाई पक्राउ गरेको छ । </p><p><br>यही कार्तिक १ गते साथीको घरमा गएर फर्कदै गरेकी किशोरीलाई बाटोमा दुब्र्यबहार गरी जबरजस्ती करणीको प्रयास गरेको अभियोगमा २२ वर्षका बिसुन्केलाई बिहीबार जिल्ला अदालतमा मुद्धा दर्ता गरी थुनामा राख्न तीन दिनको म्याद लिएको छ ।</p><p><br>दशै पर्वको समयमा अदालत बिदा भएकाले ‘तत्काल पक्राउ पूर्जी’ दिएर नियन्त्रणमा लिएको उनलाई कारबाहीको लागी अदालतबाट म्याद लिएर अनुसन्धान अघि बढाइएको जिल्ला प्रहरी प्रमुख प्रहरी उपरीक्षक बसन्तबहादुर कुंवरले जानकारी दिनुभएको छ । </p><p><br>स्थानीयबासीको सहयोगमा करणी हुनबाट उम्किएकी पीडित किशोरीले दिएको उजुरीको आधारमा बिसुन्केलाई जबरजस्ती करणी उद्योग अभियोगमा घटनाभए लगत्तै नियन्त्रणमा लिएको प्रहरीले जनाएको छ ।</p><p><br>प्रहरीको अनुसार बिसुन्के छ महिना अघिमात्रै लागु औषध ओसारपसार अभियोगमा संलग्न रहेको अभियोगमा पक्राउ परेका थिए । उक्त अभियोगको मुद्धामा उनी जिल्ला अदालत नुवाकोटबाट धरौटीमा छुटेर तारिख धाउदै आएका थिए ।<br><br><br></p>