आईजीपी प्रकरण : फरक पर्‍यो सरकार र सर्वोच्चको जोडघटाउ,हिसाब गर्न कसले जानेन?

<p>काठमाडौं,चैत २९ । डीआईजी नवराज सिलवाल र जयबहादुर चन्दबीचको करिब २ महिना लामो संघर्षपछि प्रकाश अर्याल नेपाल प्रहरीको महानिरीक्षक भएका छन्। यसअघि नै भइसकेको कार्यसम्पादन मूल्यांकनको अध्ययन गरी प्रतिवेदन पेस गर्न बनेको समितिले दिएको प्रतिवेदनका आधारमा मन्त्रिपरिषद्ले अर्याललाई प्रहरी प्रमुख बनाएको हो।&nbsp;<br></p><p>सर्वोच्च अदालतले भने कार्यसम्पादन मूल्याङ्कनमा डीआईजी नवराज सिलवाललाई अगाडि देखाएको थियो। गत ८ चैतको सर्वाेच्चको फैसलामा भनिएको छ, ‘कार्यसम्पादन मूल्यांकनअनुसार आर्थिक वर्ष २०६९/०७० देखि २०७२/०७३ सम्म चार वर्षको कुल औसत अंक हेर्दा सबैभन्दा बढी अंक प्राप्त गर्ने नवराज सिलवाल, दोस्रोमा प्रकाश अर्याल, तेस्रोमा बमबहादुर भण्डारी र चौथोमा जयबहादुर चन्द रहेको देखियो ।’ तर, सरकारले गठन गरेको समितिले गरेको अध्ययनअनुसार कार्यसम्पादन मूल्याङ्कनमा १५४.२ नम्बरसहित अर्याल पहिलो स्थानमा र १५२.६७ सहित सिलवाल दोस्रो नम्बर छन्। त्यस्तै, बमबहादुर भण्डारीको १५०.०२ र जयबहादुर चन्दको १४७.३३ नम्बर छ।&nbsp;<br></p><p>मन्त्रिपरिषद्ले महान्यायाधिवक्ता रमणकुमार श्रेष्ठको संयोजकत्वमा समिति बनाई प्रतिस्पर्धीको नम्बर जोड्न लगाएर धेरै नम्बर भएका अर्याललाई आईजीपी बनाएको हो। कार्यसम्पादन मूल्यांकनका प्रतिस्पर्धीमध्ये औसत उच्चतम अंक प्राप्त गरेको व्यक्तिलाई आईजीपी तत्काल नियुक्त गर्न सर्वाेच्चले परमादेश दिएको थियो। प्रधानन्यायाधीश सुशीला कार्कीसहित न्यायाधीशहरू हरिकृष्ण कार्की, ईश्वरप्रसाद खतिवडा, आनन्दमोहन भट्टराई र अनिलकुमार सिन्हाको पूर्ण इजलासले परमादेश दिएको हो। नयाँ पत्रिका दैनिकमा समाचार छ ।&nbsp;<br></p>