चुनावबारे प्रधानमन्त्रीसँग आयोग पदाधिकारीको भेट

<p>काठमाडौं ।<br>प्रधानम्रन्त्री पुष्पकमल दाहलसंग निर्वाचन आयोगका पदाधिकारीहरुले आज भेट गरी आगामी वैशाख ३१ गतेहुने स्थानीय तह निर्वाचनको तयारीका बारेमा जानकारी गराएका छन् ।<br><br>प्रधानमन्त्री निवास बालुवाटारमा भएको भेटमा प्रमुख निर्वाचन आयुक्त डा. अयोधीप्रसाद यादवले हालसम्म ५१ जिल्लाका लागि आवश्यक मतपत्रको छपाई पूरा भएको र मतदान केन्द्र पुनरावलोकन, मतदाता नामावली तयारी, निर्वाचन सामग्री खरीद तथा प्राप्ति, मतदाता शिक्षा, जनशक्ति व्यवस्थापन तथा विभिन्न नियम एवं निर्देशिकाहरु तयारीका बारेमा प्रधानमन्त्रीलाई जानकारी गराइएको बताए ।<br><br>त्यस अवसरमा प्रधानमन्त्री दाहालले स्थानीय तह निर्वाचनका लागि निर्वाचन आयोगले गरिरहेको कार्य प्रति धन्यवाद दिंदै निर्वाचनको सबै पक्षमा सरकारले आवश्यक सुरक्षा प्रदान गर्ने भएकाले ढुक्क भएर काम गर्न आग्रह गरे ।<br><br>प्रधानमन्त्रीले आयोगले निर्वाचन आचार संहिता पालनामा गरेको कडाईलाई आफूले सकारात्मक रुपमा लिएको बताएका थिए ।<br><br>निर्बाचन आयोगले बैशाख ३१ गते देशका ७ सय ४४ वटै स्थानिय तहमा निर्बाचन सम्पन्न गर्ने गरी सबै आवश्यक तयारी अन्तिम चरणमा पुर्याइएको डा. यादबले प्रधानमन्त्रीलाई जानकारी गराएका थिए ।<br><br>भेटमा प्रमुख निर्वाचन आयुक्त डा. यादव, आयुक्तहरु इला शर्मा, नरेन्द्र दाहाल, इश्वरीप्रसाद पौड्याल र सुधीरकुमार शाह तथा आयोगका सचिव गोपीनाथ मैनालीको सहभागिता थियो ।<br><br><br></p>