निर्वाचन आयोगलाई नै चुनावको मिति तोक्न दिए समयमै चुनाव हुन्छ-प्रमूख आयुक्त

<p>६ असोज, नेपालगञ्ज ।<br>प्रमुख निर्वाचन आयुक्त अयोधिप्रसाद यादवले राजनीतिक दलहरुबीच सहमति भए चैतमा स्थानीय निर्वाचन गराउन आयोग तयार रहेको बताउनुभएको छ ।</p><p>स्थानीय तहको निर्वाचनका लागि आयोग आन्तरिक र प्राविधिक हिसाबले तयार रहेको उहाँले बताउनुभयो । नेपालगञ्जमा आज आयोजित पत्रकार सम्मेलनमा प्रमुख निर्वाचन आयुक्त यादवले त्यसका लागि आयोग ‘इलेक्सन एक्सन प्लान’ बनाएर निर्वाचनको तयारीमा जुटिसकेको जानकारी दिनुभयो ।</p><p>निर्वाचन गर्न आवश्यक पर्ने पाँच वटा कानुनको मस्यौदा सरकारलाई पठाइसकेको बताउँदै उहाँले राजनीतिक सहमति जुटे चैतमा स्थानीय निर्वाचन गराउन गाह्रो नहुने बताउनुभयो ।</p><p>“राजनीतिक प्रतिबद्धता भए २०७४ माघ ७ भित्र सबै तहका निर्वाचन गर्न सक्छौं’, यादवले भन्नुभयो”, “राजनीतिक निर्णय गरेमा ९० देखि १ सय २० दिनमा अयोगले निर्वाचन गर्न सक्छ ।” उहाँले राजनीतिक दलहरुले सहमति कायम गरेर निर्वाचनको मिति तोक्ने अधिकार आयोगलाई नै दिनुपर्नेमा जोड दिनुभयो ।</p><p>यसअघि सरकारले नै निर्वाचनको मिति तोक्दै आएकोमा अब देखि भने आयोगलाई नै त्यो अधिकार दिँदा निर्वाचन गर्न सहज हुने उहाँको भनाई छ ।</p><p>प्रमुख निर्वाचन आयुक्त यादवले यसअघिका निर्वाचनमा खर्च विवरण नबुझाउने राजनीतिक दल तथा उम्मेदवारहरु विरुद्ध आयोग कडा रुपमा प्रस्तुत हुने तयारीमा रहेको जानकारी समेत दिनुभयो । <br></p>