तिलकेस्वर आधारभूत बिद्यालयको नयाँ भवनको नगरप्रमुख खनालबाट उद्घाटन

बाघखोर । बेलकोटगढी नगरपालिकाको नगरप्रमुख राजेन्द्ररमण खनालले कोरोना रोगको कारण प्रभावित भएर सञ्चालनमा आएका शैक्षिक गतिविधिलाई सुचारु गराउनको लागी आवश्यक सहयोगको प्रतिबद्धता जनाउनुभएको छ । बेलकोटगढी नगरपालिकाको वडा नं. ४ कथुरानीमा रहेको तिलकेस्वर आधारभूत बिद्यालयमा बनाइएको नयाँ भवनको सोमबार उद्घाटन समारोह तथा अभिभावक भेलालाई सम्बोधन गर्दै नगरप्रमुख राजेन्द्ररमण खनालले विद्यालयको शिक्षक दरबन्दी बढाउन र बिसौले खोलामा पुल हालेर विद्यालय आउजाउ गर्नको लागी विद्यार्थीलाई सहज बनाउनको लागी रोखेको माग पूरा गर्ने प्रतिबद्धता जनाउनुभएको हो । 

वडा नं ४ को कथुरनीमा रहेको विद्यालयको सुधारको लागी सरोकार राख्ने पक्षहरुबाट सहयोग र चासो देखाउनुपर्ने भएपनि जापानी सहयोग नियोग जाइकाको सहुलियतपूर्ण ऋण सहयोगमा ६ करोड रुपैयाँमा बनाइएको भव्य भवन उद्घाटनमा सम्बन्धित वडाको वडाध्यक्ष लगायतको अनुपश्थित हुनु राम्रो नभएको भन्दै विद्यालयको लागी शिक्षक र खोलामा पुल उपलब्ध गराउने उहाँले उद्घोष गर्नुभएको हो ।
बेलकोटगढी नगरपालिकाको नगरप्रमुख राजेन्द्ररमण खनालले नगरपालिका र वडा मार्फत खर्च गर्ने गरेर करोड भन्दाबढी बजेट बिनियोजित गरेकाले त्यसको सही कार्यान्वयनको लागी ध्यान दिन अभिभावक तथा ४ नं .वडाबासीलाई आग्रह गर्नुभएको छ । वडामा थप सञ्चालन गर्नुपर्ने योजना तथा कार्यक्रमको रुपमा सिचाई, विद्युत सेवा, खानेपानी, सडकको स्तरउन्नती लगायतको अत्यावश्यक देखिएका योजना नगरपालिका समक्ष माग गर्न उहाँले आग्रह गनुभएको छ ।

कार्यक्रममा बेलकोटगढी नगरपालिकाको शिक्षा शाखाका श्रोतव्यक्ति बद्री शर्मा सहित अहिलेको विद्यालय व्यवस्थापन समितिका अध्यक्ष केदारनाथ सापकोटा लगायतले विद्यालय सुधारको लागी देखिएको समस्याको उठान तथा समाधानको पहलका सम्बन्धमा सम्बोधन गर्नुभएको छ ।

जाइकाले बनाएको ६ करोड रुपैयाँ लगानीको १२ कोठे पक्कि भवनको हिजो उद्घाटन सहित विद्यालय व्यवस्थापन समितिलाई हस्तान्तरण गरिएको छ । कक्षा ८ सम्म अध्यापन गराउदै आएको विद्यालयमा अहिले १५६ जना बिद्यार्थी रहेकाले विद्याथी सङ्ख्या बढाउन र मावितहसम्म अध्ययन गराउनको लागी जोड दिन अभिभावकहरुबाट माग उठाइएको छ । नयाँ व्यवस्थापन समिति गठनको लागी अभिभावकहरुबीच छलफल अघि बढेपनि सहमति जुट्न बाँकी रहेको विद्यालयका प्रअ शिवराम थापाले जानकारी दिनुभयो ।