19.12¡ÆC
महोत्तरी ।
महोत्तरीको बर्दिवासस्थित बर्दिवास जनता बहुमुखी क्याम्पसको भवन निर्माणार्थ श्रीमद्भागवत महायज्ञ आयोजना गरिने भएको छ । बर्दिवासमा शिक्षाको विकासको निम्ती भौतिक र शैक्षिक विकासमा सहयोगार्थ श्रीमद्भागवत महायज्ञ आयोजना गर्न लागिएको क्याम्पस व्यवस्थापन समितिका अध्यक्ष गुञ्ज खड्काले जानकारी दिनुभयो । क्याम्पसले महायज्ञ आयोजन गर्ने क्याम्पस व्यवस्थापन समितिको पूर्वनिर्णय अनुमोदन गर्दै महायज्ञ आयोजक मूल समारोह समिति नै चयन गरेर तयारी अघि बढाउने निर्णय भएको क्याम्पसका प्रमुख तोपबहादुर ठकुरीले जानकारी दिनुभयो ।
वाचन प्रवीण पण्डित पोखरेलले भागवत पाठपारायण र कथा वाचन गर्ने महायज्ञ यही कात्तिक २७ गतेदेखि मंसिर ४ गतेसम्म सञ्चालन हुने तय भएको छ ।
विसं २०६४ मा स्थापित बर्दिवास जनता बहुमुखी क्याम्पस बर्दिवासमा शिक्षा शास्त्र र वाणिज्य संकायमा स्नातक तहको पठनपाठन हुँदै आएको छ । क्याम्पसमा अहिले स्नातक तहमा ५०० विद्यार्थी रहेका छन् । क्याम्पस स्थापनायताका १० वर्षमा यस क्याम्पसबाट ४५० जनाले स्नातक तह उत्तीर्ण गरिसकेका क्याम्पस प्रमुख ठकुरीले बताउनुभयो । बर्दिवास जनता बहुमुखी क्याम्पसले स्नातकोत्तर तहको पठनपाठन सञ्चालन गर्ने सम्बन्धनमा समेत प्रक्रिया अघि बढाएको र महायज्ञबाट संकलन भएको सहयोग रकमबाट समेत सहयोग पुग्ने अध्यक्ष गुन्ज खड्काले बताउनुभयो ।
