अनलाइन भोटर ! -भानुभक्त आचार्य

<p>भर्खरै,<br>धाविका मीरा राइले<br>‘साहसी व्यक्ति’को उपाधी जितिन्,<br>टेरिया फौजा मगरले<br>इन्डियाबाट ट्रफी ल्याइन,<br>पुष्पा बस्नेत<br>सिएनएन सुपर हिरो बनिन् ।<br>गायकी ठिकैठिकै भएका<br>प्रशान्त तामाङ पनि<br>इन्डियन आइडल बने ।<br><br>बुझ्नु भो,<br>यो सबै हाम्रो भोटको कमाल हो<br>हाम्रा मान्छेहरु जितेका जितै छन्,<br>अहोरात्र खटेर<br>हामी दिएको दियै छौं ।<br>तपाइँलाई थाहै होला,<br>कुनै बेला,<br>चन्दा उठाएर<br>दार्जिलिङ पुगेर<br>प्रशान्तलाई भोट हाल्ने<br>हामी नै हौं ।<br>भोट हालेर जित्ने ठाउँमा<br>हामीले गोर्खाली वीरता,<br>राष्ट्रिय एकता<br>र नेपालीपन<br>सबै देखाएका छौं ।<br><br>अझ फेसबुकमा<br>‘डिसलाइक’ बटन छैन र पो,<br>डिसलाइक गरेर मोदीलाई<br>प्रधानमन्त्रीबाट हटाउन मिल्ने भए<br>हामी के–के गर्थिम् होला,<br>राजदूत रेलाई २४घन्टामै<br>बोर्डर कटाउथिम् होला,<br>साच्ची, फेसबुकबाटै<br>कालोमोसो पोत्न मिल्ने भए<br>कसलाई पहिले दल्थिम होला<br>हँ ?<br><br>बुझ्नुभो प्रधानमन्त्रीज्यू,<br>तपाइँले हैसियत नभाको भनेपनि<br>हामीले आफ्नो हैसियत बनाएकै छौं,<br>कम्तीमा अहोरात्र अनलाइन बसेको<br>उसै खेर गएको छैन ।<br>त्यसैले गर्वसाथ भन्छु<br>जहाँ भए पनि<br>म नेपालीका लागि<br>अनलाइन भोटर हुँ ।<br><br>सम्झिन्छु,<br>फेसबुकमा<br>लाइक गरेर, भोट दिएर,<br>मोबाइलबाट म्यासेज पठाएर<br>इमेल गरेर, क्लिक गरेर,<br>काठमाण्डु–हेटौडा फास्ट ट्रयाक बन्ने भैदिए,<br>पूर्व–पश्चिम रेल सरर चल्ने भए,<br>मेलम्चीको पानी धारामा तु–आउने भए,<br>अरुण तेस्रो तुरुन्तै बन्ने भए,<br>स्थानीय चुनाव गर्न सकिने भए<br>कसैका मृगौला र्फेन सकिने भए,<br>मृत्युशैयाबाट फर्काउन सकिने भए<br>हामी कति गर्दा हौं ।<br><br>नेताज्यू,<br>नेपाली भोट पाउनेहरु<br>सबैले जितेका छन्<br>तपाइँ बाहेक ।<br>हाम्रो भोट पाएर पनि<br>तपाइँ हारिरहनु भएको छ ।<br>तपाइँकै नालायकीले<br>बेरोजगार बनेका हामी<br>सधैं अनलाइन बस्न बाध्य छौं ।<br>यही पारा भइरह्यो भने,<br>अनलाइनमा भोट हाल्ने बाहेक<br>केही गर्न नसक्ने हुनसक्छौं ।<br>त्यसैले, खबरदार,<br>अनलाइनबाटै तपाइँलाई<br>महाभियोग लगाउनु नपरोस् ।<br><br>© भानुभक्त आचार्य, २०७३ माघ १४<br></p>