22.12¡ÆC
काठमाडौँ । नेपालमा पहिलो पटक भएको पुरुष फ्रेन्चाइज नेपाल भलिबल लिग (एनभीएल)को उपाधि अन्नपूर्ण स्पाइकर किंग्सले जितेको छ ।
हिजो बेलुका भएको फाइनल खेलमा कर्णाली शिवराजलाई ३–० को सोझो सेटमा हराउँदै अन्नपूर्णले उपाधि जितेको हो । उपाधिसँगै अन्नपूर्णले २० लाख रुपैयाँ पुरस्कार प्राप्त गरेको छ ।
अन्नपूर्णले २५–१५, २५–२० र २५–१८ को सेटमा जित निकाल्यो । अन्नपूर्ण लिग चरणमा शीर्ष स्थानमा रहँदै फाइनलमा पुगेको थियो । कर्णालीले भने प्लेअफमा काठमाण्डौ रेड्सलाई पराजित गर्दै फाइनलमा स्थान बनाएको थियो ।
लिग चरणमा कर्णालीले अन्नपूर्णलाई ३–१ को सेटमा पराजित गरेको थियो । तर, फाइनलमा अन्नपूर्णले त्यसको बदला लिँदै कर्णालीलाई सोझो सेटमा हराएर ऐतिहासिक उपाधि जित्न सफल भएको हो ।
पहिलो संस्करणको फ्रेन्चाइज नेपाल भलिबल लिगमा कुल ६ टोलीको सहभागिता रहेको थियो । प्रतियोगिताको कुल पुरस्कार राशि ३२ लाख रुपैयाँ रहेको थियो ।
