उपत्यकामा आजदेखि निषेधाज्ञा खुकुलो के खोल्न पाइने के नपाइने ?

<p>काठमाडौ । काठमाण्डौ उपत्यकामा तीन हप्तादेखि लगाइएको निषेधाज्ञा खुकुलो बनाइएको छ ।&nbsp;<br></p><p>स्वास्थ्य तथा जनसङ्ख्या मन्त्रालयबाट र गृह-मन्त्रालयबाट जारी सुरक्षा मापदण्ड तथा भौतिक दूरीको पूर्ण पालना गर्न आग्रह गर्दै उपत्यकाका तीनवटै जिल्ला प्रशासन कार्यालयले नयाँ व्यवस्था गरेका हुन्।<br></p><p>नागरिकको जीविका सहज बनाउन भन्दै आवश्यक मापदण्ड तयार पारेर उद्योग, कलकारखाना, व्यापार व्यवसायदेखि निजी तथा सार्वजनिक गाडी सञ्चालन गर्न दिने निर्णय भएको हो । आज बिहीबारदेखि स्वास्थ्य मापदण्डको पालनासँगै भौतिक दूरी कायम राखी जोर-बिजोर प्रणालीबाट निजी तथा सार्वजनिक गाडी सञ्चालन गर्न पाइनेछ ।&nbsp;<br></p><p>१६ सिटभन्दा बढी क्षमता भएका सार्वजनिक गाडीमा कुल सिट क्षमताको आधा मात्र यात्रु राख्न पाइनेछ भने गाडीको ढोकामा स्यानिटाइजरको व्यवस्था गर्नुपर्ने छ । त्यस्तै भाडाका ट्याक्सीमा चालकसहित बढीमा तीन जना र परिवार भित्रकै बालबालिका भएमा थप दुई जनासम्म लैजान सकिनेछ ।<br></p><p>अत्यावश्यक तथा खाद्यान्न, तरकारी, फलफूल र माछामासु लगायत मालबाहक तथा ढुवानीका गाडीलाई जोर-बिजोर प्रणाली लागू हुनेछैन । यस्ता गाडीले चालक र सहयोगी सहचालक बाहेक अन्य व्यक्तिलाई बोक्न पाउने छैनन् । उपत्यकामा सञ्चालित खाद्यान्न थोक तथा किराना, दूधजन्य पदार्थ, फलफूल, तरकारी, माछा-मासुलगायत पसल बिहान ५-११ बजेसम्म र साँझ ५-७ बजेसम्म खोल्न पाउने व्यवस्था लागू गरिएको छ ।<br></p><p>भौतिक पूर्वाधार तथा विकास निर्माण सामग्री, पसल तथा व्यवसायलगायत ढुवानीका गाडी दिउँसो २ देखि साँझ ७ बजेसम्म सञ्चालन गर्न पाइनेछ । त्यस्तै अनलाइन सेवामार्फत वस्तु, परिकार तथा अरु सेवाको लागि १२ देखि साँझ ७ बजेको समय निर्धारण गरिएको छ ।&nbsp;<br></p><p>बैंक तथा वित्तीय संस्था सञ्चालन गर्न बिहान ११ देखि ३ बजेसम्मको समय तोकिएको छ । विभिन्न सेवामा आबद्ध कर्मचारीका लागि बिहान ९ देखि १० : ३० सम्म कार्यालय र दिउँसो ३ : ३० देखि बेलुकी ५ बजेसम्म घर फर्किसक्नुपर्ने व्यवस्था छ ।</p><p>उद्योग कलकारखाना सञ्चालन गर्दा कामदारको खाने बस्ने व्यवस्था अनिवार्य रूपमा उद्योग परिसरमा नै क्याम्प स्थापना गर्नुपर्ने छ ।&nbsp; घर तथा भवन निर्माण कम्पनीले मजदुरको सबै व्यवस्था निर्माणस्थल परिसरमा नै मिलाउनुपर्ने छ।<br></p><p><b>भीडभाड हुने क्षेत्र अझै बन्द<br></b></p><p>गाडी, पसल, व्यवसाय आलोपालो गरेर सञ्चालन गर्न पाइने भए पनि भीडभाड हुने ठाउँ अझै बन्द हुनेछन् । चलचित्र भवन, उद्यान पार्क, पार्टी प्यालेस, मठ मन्दिर, लामो दूरीका गाडी, सामूहिक भोज, पार्टी, जात्रा-मेला, सभा-जुलुस तथा भेलालगायतका कार्यक्रम निषेध गरिएको छ ।<br></p><p>मठमन्दिर, मस्जिद र चर्चलगायतका धार्मिक तथा सांस्कृतिक स्थलमा दैनिक नित्य पूजाबाहेक अन्य गतिविधिमा रोक लगाइएको छ । धार्मिक तथा सांस्कृतिक चाडवाडका नाममा जमघट, भेला गर्न पाइने छैन।&nbsp;<br></p><p>खेलकुद, जिमखाना, स्विमिङ पुल, मसाज पार्लर, सैलुन, स्पा, प्रदर्शनी चिडियाखानालगायत नागरिकको बाक्लो उपस्थिति रहने स्थान बन्द गरिएका छन् । शिक्षण संस्था पनि खोल्न पाइने छैन ।<br></p>