देवीघाटमा सामूहिक ब्रतबन्ध

<p style="text-align: justify; "><b>विदुर । हिन्दु सँस्कृतिको रक्षा, धार्मिक परम्परालाई निरन्तरता र सँस्कृत भाषाको संरक्षणको लागी सञ्चालनमा रहेको सहिद जगत–प्रकाशजंग शाह सस्कृति माध्यामिक विद्यालय चलाउन देवीघाटमा सामुहिक ब्रतवन्ध गरिएको छ । सामूहिक ब्रतबन्धबाट चार लाख रुपैयाँ भन्दा बढी रकम संकलन भएको छ । नुवाकोटको विदुर नगरपालिका वडा नं ५ देविघाटमा रहेको शहिद जगत प्रकाशजंग शाह संस्कृत माविको आर्थिक श्रोतको जुटाउने लक्ष्यको साथ आयोजना गरेको सामूहिक ब्रतवन्धमा १०८ जना बटुकहरूको कर्मकाण्ड गरिएको छ ।&nbsp;<br></b></p><p style="text-align: justify; "><b>सामूहिक ब्रतवन्धमा सहभागी बटुकबाट विद्यालयले प्रति बटुक चार हजार रुपैयाँ शुल्क लिएको विद्यालय व्यवस्थापन समितिका अध्यक्ष मानबहादुर डंगोलले जानकारी दिनुभयो ।&nbsp;</b></p><p style="text-align: justify; "><b>उहाँको अनुसार बटुकसंग लिएको शुल्क र भेटीबाट विद्यालयलाई आर्थिक अभावमा प्रभावकारी राहत मिलेको छ । सामूहिक व्रतबन्धले सस्कृतिको संरक्षण, परम्पराको निरन्तरता, कर्मकाण्ड गर्ने अभिभावकलाई आर्थिक मितव्ययिता र सामूहिक एकतालाई समेत सहयोग पुगको व्यवस्थापन समितिका अध्यक्ष डंगोलले बताउनुभयो ।&nbsp;</b></p><p style="text-align: justify; "><b>सामूहिक ब्रतबन्धबाट संकलन भएको रकमले विद्यालयको प्रशासनिक खर्च र निजीश्रोतमा रहेका आठ जना शिक्षकलाई तलब उपलब्ध गराउन श्रोत जुटाउने अभियान अन्तरगत बैकल्पिक श्रोतको रुपमा सामूहिक ब्रतबन्ध गरिएको प्रधानध्यापक मञ्जु चित्रकारले जानकारी दिनुभयो ।&nbsp;</b></p><p style="text-align: justify; "><b>विद्यालयले आयश्रोत संकलन गर्न सुरु गरेको अभियानले समाजमा बढ्दै गएको तडक–भडक नियन्त्रण र हिन्दु परम्पराको रक्षा गर्न समेत उलेख्य योगदान पुगेको उहाँले बताउनुभयो ।&nbsp;</b></p><p style="text-align: justify; "><b>२०५५ सालमा स्थापना भएर कक्षा १० सम्म पढाई हुदै आएको विद्यालयमा हाल १५ जना शिक्षक रहेकोमा सात जनामात्रै दरवन्दी रहेकाले बाँकी निजीश्रोतबाट संकलन हुने आर्थिक सहयोगमा उनीहरुलाई सुविधा उपलब्ध गराइदै आएको छ । विद्यालयले सामूहिक आयोजना गरेको ब्रतवन्धले अभिभावकमा पर्ने आर्थिक बोझ धेरै कम हुने ब्रतबन्ध गराउन सहभागी बटुकका अभिभावक विदुर नगरपालिका वडा नं. १० दारेगौडाका बलराम धमलाले बताउनुभयो ।</b></p><p style="text-align: justify; "><b>सामूहिक ब्रतबन्धमा नुवाकोट सहित रसुवा, धादिङ, गोरखा लगायतका जिल्लाबाट बटुकको सहभागिता भएको थियो । सामूहिक ब्रतबन्ध निलकण्ठ धामका मुख्य पूजारी रुपेश सापकोटाको नेतृत्वमा रहेको १४ जना पण्डितले सहभागी बटुकको कर्मकाण्ड गराएका थिए ।</b></p>