इतिहासको ब्याज खाएर बस्ने दलहरु समृद्धिको बाधक -डा.भट्टराई

Posted on: May 27, 2016 | views: 537

१४ जेठ, धादिङ ।
नयाँ शक्ति नेपालका संयोजक डा।बाबुराम भट्टराईले दलहरुले इतिहासको ब्याज खाएर बस्दा देश विकास र समृद्धिको यात्रामा अगाडि बढ्न नसकेको बताउनुभएको छ ।

शुक्रबार धादिङको सदरमुकाम धादिङबेसीमा नयाँ शक्ति अन्तरिम जिल्ला परिषदले आयोजना गरेको बृहत अन्तरक्रियामा बोल्दै उहाँले भन्नुभयो, 'दलहरु इतिहासको ब्याज खाएर मात्र बस्नुहुँदैन, सावाँ बढाउन लाग्नुपर्छ ।' नेपालमा दलहरु नयाँ काम नगरेर इतिहासको ब्याज मात्र खाएर बस्दा समृद्धिको यात्रा अगाडि नबढेको उहाँको तर्क थियो ।

'नेपाली कांग्रेस ००७ सालको ब्याज खाइरहेछ, एमाले ९ महिने सरकारको र माओवादी गणतन्त्रको,' उहाँले भन्नुभयो, 'नयाँ शक्ति इतिहासको ब्याज खाने होइन, विकास र समृद्धिको नेतृत्व गर्दै सावाँ बढाउनतिर लाग्दैछ ।'

उहाँले मनुस्मृतिले मानिसलाई जातको आधारमा बाँढेर जातवाद स्थापित गरेजस्तै पार्टीलाई पनि ब्राण्डको रुपमा स्थापित गरिँदा समाज अगाडि नबढ्ने बताउनुभयो । 'भौगोलिक एकीकरण र राजनीतिक एकीकरणको चरण सकियो, यसको लागि संयोग नै भन्नुपर्छ ८०-८० वर्ष लाग्यो,' उहाँले भन्नुभयो, 'अब भौतिक सभ्यता निर्माणको वा समृद्धिको चरणमा समाज अगाडि बढाउन आवश्यक छ ।' उहाँले पार्टीलाई विचारको रुपमा बुझ्न र परिवर्तन र युगको आवश्यकतालाई आत्मसाथ गर्न आव्हान गर्नुभयो ।

संयोजक भट्टराईले नयाँ शक्ति राजनीतिक नेतृत्वमा आएर १० वर्षमा वैदेशिक रोजगारीमा रहेका नेपाली युवा युवतीलाई स्वदेशमै रोजगारको अवसर सिर्जना गर्दै देश फर्काउने प्रतिवद्धता व्यक्त गर्नुभयो ।

पूर्वअर्थमन्त्री समेत रहनुभएका भट्टराईले भावनाले मात्रै आर्थिक विकास नहुने भन्दै ओलीले बाँढेको सपना भावना मात्रै भएको बताउनुभयो । 'सपना देख्नु राम्रो कुरा हो तर त्यसको आधार चाहिन्छ,' उहाँले भन्नुभयो, 'भावना बाँढेर देश विकास हुँदैन, नेतासँग प्राथमिकतासहित ठोस कार्यक्रम चाहिन्छ ।'

कार्यक्रममा नयाँ शक्ति नेपालका सल्लाहकार डा।योगी विकासानन्दले नयाँ शक्तिमा समाजका सबै प्रतिभाहरुको जमघट भएकाले यसलाई सिस्टममा ढालेर अगाडि बढ्न सके मुलुकमा अद्भूत परिवर्तन हुने विश्वास व्यक्त गर्नुभयो । कार्यक्रममा नयाँ शक्तिका सचिवालय सदस्यहरु कल्पना धमला, करिष्मा मानन्धर, कल्पना धमला, ऋषवदेव भट्टराईलगायतले सम्बोधन गर्नुभएको थियो ।