26.12¡ÆC
<p>काठमाडौं,पुस २९ । प्रधानमन्त्री पुष्पकमल दाहाल ‘प्रचण्ड’ले जेठ पहिलो साता स्थानीय तहको चुनावको मिति घोषणा हुने बताउनुभएको छ। उहाँले अब हुने स्थानीय चुनावमा माओवादी पहिलो पार्टी बन्ने बताउनुहुँदै स्थानीय तहको निर्वाचन गर्ने तयारीमा सरकार लागेको बताउनुभएको हो। <br></p><p>अखिल क्रान्तिकारीको केन्द्रीय पदाधिकारी बैठकलाई बिहीबार पेरिसडाँडामा सम्बोधन गर्नुहुँदै नेकपा माओवादीका अध्यक्षसमेत रहनुभएका प्रधानमन्त्री प्रचण्डले उपलब्धी रक्षाका लागि माओवादी पहिलो पार्टी बन्नुपर्ने बताउनुभयो। ‘परिवर्तनका लागि माओवादीले धेरै लगानी गरेको छ। हतियारबद्ध लडाईं लडेर आएको पार्टीले देशको नेतृत्व गर्छ’, उहाँले भन्नुभयो, ‘अहिलेका परिवर्तनमा उनीहरूले भन्दा हामीले बढी रगत बगाएका छौँ, अब पनि माओवादीले नै देशको नेतृत्व गर्छ।’ अहिलेको परिवर्तनमा कांग्रेस र एमालेको कम लगानी गरेकाले परिवर्तन संस्थागत नभए पनि दुई पार्टीलाई केही चिन्ता नभएको बताउँदै उहाँले परिवर्तन संस्थागत गर्न माओवादी नै लाग्नुपर्नेमा जोड दिनुभयो।<br></p><p>प्रधानमन्त्री प्रचण्डले जनयुद्ध र जनआन्दोलनको बलमा प्राप्त उपलब्धीहरू उल्टाउन ठूलै शक्ति क्रियाशील भइरहेको बताउँदै भरपर्दा सूचनाहरू आफूसँग रहेकाले पार्टी चनाखो हुनुपर्ने बताउनुभयो।गणतन्त्र, संघीयता, धर्मनिरपेक्षता, समावेशी समानुपातिकलगायतका एजेन्डाहरू माओवादी जनयुद्ध र त्यसको बलमा भएको दोस्रो जनआन्दोलनको उपलब्धी हो, उपलब्धी रक्षा गर्नुपर्ने चुनौतिपूर्ण घडीमा माओवादी छ, उहाँले भन्नुभयो।<br></p><p>आगामी चुनावमा पहिलो पार्टी बन्ने लक्ष्यसहित लाग्न निर्देशन दिनुहुँदै विद्यार्थी नेताहरूलाई स्ववियु चुनावमा लाग्न र पहिलो बन्न कोसिस गर्नुपर्ने बताउनुभयो। प्रधानमन्त्री प्रचण्डले माओवादी पार्टीहरूबीच एकता हुने दाबी गर्नुहुँदै नेत्रविक्रम चन्दसँग पनि एकता नजिक रहेको बताउनुभयो। आजको नेपाल समाचार पत्रमा खबर छापिएको छ ।<br></p><p><br></p>
