यस्तो छ संशोधनको विरोधमा आन्दोलन चर्काउने एमालेका चार रणनीति

काठमाडौं,मंसिर १६ । संविधान संशोधन विधेयकको विरोधमा प्रमुख प्रतिपक्षी एमालेले सदन र सडक आन्दोलन चर्काउने निर्णय गरेको छ । बुधबार बसेको संसदीय दलको बैठकले सरकारले संसद्मा दर्ता गरेको संशोधन प्रस्ताव असंवैधानिक र राष्ट्रघाती भएको निष्कर्ष पनि निकालेको छ । संशोधन प्रस्ताव संविधानको धारा २७४ विपरीत दर्ता भएकाले असंवैधानिक रहेको संसदीय दलका सचेतक गोकुल घर्तीले बताए । ‘त्यसैले असंवैधानिक प्रस्ताव बाझिएको हदसम्म फिर्ता लिनुबाहेक अरू विकल्प छैन ।’संविधानको धारा २७४ मा सीमांकन हेरफेरका लागि दर्ता भएको विधेयक सभामुखले ३० दिनभित्र प्रदेश संसद्मा पठाउनुपर्ने र त्यसपछि प्रदेश संसद्को सहमतिमा मात्रै संघीय संसद्ले दुईतिहाइबाट सिमाना हेरफेर गर्न सक्ने व्यवस्था छ । सोही व्यवस्थालाई आधार मानेर सर्वोच्च अदालतमा रिटसमेत परेकाले अदालतको अवहेलना हुने गरी प्रस्ताव आएको एमालेको निष्कर्ष छ । केन्द्रीय प्रचार विभागले पार्टी मुख्यालयमा बुधबार गरेको छलफलमा एमाले संसदीय दलका उपनेता सुवास नेम्वाङले राजनीतिक र संवैधानिक रूपमा अनुपयुक्त संविधान संशोधन प्रस्ताव एक इन्च पनि अगाडि बढ्न नसक्ने दाबी गरेका थिए आजको नयाँ पत्रिकामा खबर छ । आन्दोलन चर्काउने एमालेका चार रणनीति१. कार्यव्यवस्था परामर्शमै प्रतिवाद संसद्मा संविधान संशोधन विधेयक अघि बढाउन कार्यसूची निर्धारणलगायतका विषयमा छलफल गर्न कार्यव्यवस्था परामर्श समिति बैठक बस्छ । त्यही बैठकमा विधेयक असंवैधानिक भएकाले फिर्ता लिन तथ्यसहित प्रतिवाद गरिने एमालेका सचेतक गोकुल घर्तीले बताए । जबर्जस्ती गरिए संसद् अवरुद्ध गर्ने उनले जानकारी दिए । २. छलफलमा भाग लिएर संसदमा अवरोध कार्यव्यवस्था परामर्श समितिमा सुनुवाइ नभए संशोधन प्रस्तावमाथिको प्रारम्भिक छलफलमा आफ्ना भनाइ राखेर सदन अवरोध गर्ने एमालेको रणनीति छ । सुरुमै संसदीय दलको नेता वा उपनेताले विरोध गर्दै भनाइ राखेपछि सदन अवरुद्ध पार्ने एमाले संसदीय दलको निर्णय छ । विधेयक फिर्ता नलिएसम्म अवरोध जारी राख्ने निर्णय छ । दलको बैठकमा उपाध्यक्ष वामदेव गौतमले शालीनतापूर्वक सदन अवरोध गर्न सांसदहरूलाई निर्देशन दिएका छन् ।३. सडक आन्दोलन चर्काउने संविधान संशोधनविरुद्ध स्वस्फुर्त सडकमा प्रदर्शन भइरहेकाले त्यसको नेतृत्व लिएर आन्दोलन चर्काउने एमालेको निर्णय छ । ‘सडकमा व्यापक जनपरिचालनमार्फत विधेयक फिर्ताका लागि दबाब दिने निर्णय बैठकको छ,’ सचेतक गोकुल घर्तीले बताए । ५ नम्बर प्रदेशका जिल्लामा आन्दोलन चर्किंदै गएकाले ती ठाउँमा कांग्रेस, माओवादी केन्द्रसहितका दल, नागरिक समाजको साथ लिएर आन्दोलन चर्काउने निर्णय भएको पनि उनले बताए ।४. अदालतमार्फत पनि संघर्ष एमालेले अदालतमार्फत पनि विधेयकको विरोध गर्ने निष्कर्ष निकालेको छ । ‘हामीले सदन, सडकसँगै अदालतमा पनि संघर्ष गर्ने निर्णय गरेका छौँ,’ उपाध्यक्ष वामदेव गौतमले भने । तर, प्रदेशको सीमांकन हेरफेरबारे अदालतमा रिट निवेदन परिसकेको र सुनुवाइको प्रक्रिया पनि अघि बढ्न लागेकाले छुट्टै रिट हाल्नु नपर्ने निष्कर्षमा एमाले छ । संसदमा अनिवार्य उपस्थिति हुन ह्विप एमाले संसदीय दलले बिहीबारबाट नियमित रूपमा संसद् बैठकमा उपस्थित हुन र राजधानी नछाड्न पार्टीका सांसदहरूलाई निर्देशन दिएको छ । ‘सांसदहरूलाई राजधानी नछाड्न र नियमित बैठकअगावै उपस्थित हुन निर्देशन दिएका छौँ,’ प्रमुख सचेतक भानुभक्त ढकालले भने, ‘संविधान संशोधन विधेयकविरुद्ध संसद्मा सशक्त प्रतिवाद गर्न निर्देशन गरिएको छ ।’

यस्तो छ संशोधनको विरोधमा आन्दोलन चर्काउने एमालेका चार रणनीति

प्रतिक्रिया

सम्बन्धित खवर

ताजा समाचार

तारकेश्वरमा सरकारी सेवामा जोडिएका व्यक्तिको सन्तान सामुदायिक विद्यालयमै पढ्नुपर्ने

विद्यार्थी सङ्गठनमाथि प्रतिबन्धको विरोधमा कालो बेलुन उडाएर प्रदर्शन

चौतर्फी आलोचनापछि गृहमन्त्री गुरुङको राजीनामा

बट्टारको हावाघरमा आइतबारे कृषि हाट बजार केन्द्र सञ्चालनमा

नेपालद्वारा युएई ८ विकेटले पराजित

सम्पर्क

सूचना विभाग दर्ता नं.

साइट नेभिगेशन

हाम्रो टीम

प्रकाशक/ सम्पादक

नेपाल ब्युरो चीफ़

संवाददाता