18.12¡ÆC
काठमाडौँ । सरकारले रसुवाको भोटेकोशी बाढीबाट प्रभावितका लागि विभिन्न साझेदार सङ्घसंस्था तथा स्थानीय तहसँग मिलेर तत्काल अस्थायी आवास निर्माणको काम अगाडि बढाउने निर्णय गरेको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणमा आज बसेको बैठकले उक्त निर्णय गरेको प्राधिकरणका कार्यकारी प्रमुख डा धर्मराज उप्रेतीले जानकारी दिनुभयो । उहाँका अनुसार पुनःनिर्माणमा सहयोग गर्न चाहने विकास साझेदार संघसंस्थालाई आफूले कुन पालिकामा कति सङ्ख्यामा घर बनाइदिने हो, त्यसको जानकारी प्राधिकरणलाई गराउन पनि आग्रह गर्ने निर्णय गरिएको छ ।
बैठकको निर्णयअनुसार सहयोगी संस्थाहरूले नेपाल सरकारले उपलब्ध गराएको जग्गामा तोकिएको मापदण्डमा रही घर निर्माण गर्नुपर्ने कार्यकारी प्रमुख डा उप्रेतीको भनाइ छ । यसैगरी, बैठकले प्रभावित क्षेत्रका वास्तविक लाभग्राही परिवारको विवरण सङ्कलन गरी कति सङ्ख्यामा घर बनाउनुपर्ने हो त्यसको यकिन गर्न स्थानीय तहलाई पत्राचार गर्ने निर्णय गरेको छ ।
