25.12¡ÆC
नुवाकोट । भोटेकोसी हुँदै त्रिशूली नदीमा आएको बाढीबाट प्रत्यक्ष प्रभावित भएका आफ्ना सदस्यहरूलाई नेशनल लघुवित्त वित्तीय संस्था लिमिटेडले करिब ५० लाख रुपैयाँ बराबरको नगद राहत उपलब्ध गराउन थालेको छ । बाढीबाट प्रभावित रसुवा, नुवाकोट र धादिङका सदस्यहरूको क्षतिको अवस्था हेरेर संस्थाको टोली प्रभावित क्षेत्रमै पुगेर राहतस्वरुप नगद रकम वितरण गरिरहेको हो ।
संस्थाका प्रमुख कार्यकारी अधिकृत रामबहादुर यादवले भन्नुभयो, “बाढीबाट प्रभावित हाम्रा सदस्यहरू अहिले अत्यन्तै कठिन र असहज परिस्थितिमा हुनुहुन्छ । तत्काल आवश्यक पर्ने सामग्री खरिद गर्न सहज होस् भन्ने उद्देश्यले क्षतिको अवस्था हेरेर नगद राहत उपलब्ध गराएका छौँ । विपद्को यो कठिन घडीमा आफ्ना सदस्यहरूसँग संस्था साथमा छ भन्ने अनुभूति दिलाउनु पनि हाम्रो दायित्व हो ।”
भदौ १० गते भोटेकोसी हुँदै त्रिशूली नदीमा आएको बाढीबाट प्रभावित भएका संस्थाका नुवाकोटको किस्पाङ, धादिङको गोगनपानी, धार्के, परेवाटार, मझिमटार, भट्टेडाँडा, खाडीचौर र जाल्पालगायत शाखाका सदस्यहरूलाई नगद राहत उपलब्ध गराइएको प्रमुख कार्यकारी अधिकृत यादवले जानकारी दिनुभयो ।
बाढीपछि असहज र कष्टकर जीवन बिताइरहेका सदस्यहरूको अवस्थालाई मध्यनजर गर्दै शुक्रबारदेखि प्रमुख कार्यकारी अधिकृत यादवको नेतृत्वमा संस्थाको टोली प्रभावित क्षेत्रमा पुगिरहेको छ । टोलीले प्रभावित सदस्यहरू बसोबास गरिरहेका आश्रयस्थलमै पुगेर नगद राहत उपलब्ध गराउनुका साथै उनीहरूको अवस्था, क्षति र समस्याबारे जानकारी लिइरहेको छ ।
संस्थाको केन्द्रीय कार्यालय, अनुगमन एकाइ तथा शाखा कार्यालयहरूले बाढीबाट प्रभावित सदस्यहरूको अवस्थाबारे निरन्तर चासो राख्दै आएका छन् । प्रमुख कार्यकारी अधिकृत यादवसहितको टोलीले प्रभावित घर तथा खेतीयोग्य जमिनमा भएको क्षतिको अवलोकन गर्नुका साथै परिवारका सदस्य हराइरहेका सदस्यहरूको खोजी तथा उद्धारका विषयमा समेत जानकारी लिएको छ ।
बाढीमा परी घाइते भएकाहरूको स्वास्थ्यलाभको कामना गर्दै तथा परिवारका सदस्य गुमाएका संस्थाका सदस्यप्रति समवेदना व्यक्त गर्न प्रमुख कार्यकारी अधिकृत यादव स्वयं प्रभावित सदस्यहरू बसोबास गरिरहेका स्थानमा पुग्नुभएको हो ।
उहाँसँगै संस्थाको केन्द्रीय कार्यालय बनेपाको सञ्चालन विभागका मदन रिजाल, कर्जा विभागका सुशील पौडेल, अनुगमन एकाइ कार्यालय बनेपाका अनुगमन अधिकृत रामचन्द्र लोहनी तथा प्रभावित क्षेत्रका शाखा प्रमुख र कर्मचारीहरू राहत वितरणमा सहभागी हुनुहुन्छ । टोलीले प्रभावित सदस्यहरूलाई उनीहरू बसोबास गरिरहेको स्थानमै पुगेर राहतस्वरुप नगद रकम उपलब्ध गराइरहेको छ ।
बाढी प्रभावित सदस्यहरूलाई तत्काल आवश्यक पर्ने सामग्री खरिद गर्न सहज होस् भन्ने उद्देश्यले क्षतिको अवस्था मूल्याङ्कन गरी नगद राहत उपलब्ध गराइएको गोगनपानी–महादेववेशी शाखाकी प्रमुख प्रतिमा ढकालले बताउनुभयो ।
उहाँका अनुसार, “अहिले प्रभावित सदस्यहरूलाई सबैभन्दा आवश्यक पर्ने सामग्री आफैँले छनोट गरेर खरिद गर्न सकून् भन्ने उद्देश्यले नगद राहत उपलब्ध गराइएको हो । यसले उहाँहरूलाई तत्कालको आवश्यकता पूरा गर्न केही सहज हुने विश्वास लिएका छौँ ।”
राहत वितरणका क्रममा संस्थाले सम्बन्धित स्थानीय तह तथा वडा कार्यालयसँग समन्वय गर्दै आएको छ । जनप्रतिनिधिको उपस्थितिमा प्रभावित सदस्यलाई राहत रकम हस्तान्तरण भइरहेको छ । राहत वितरणमा सहभागी बेलकोटगढी नगरपालिका–५ का अध्यक्ष मदन भुजेलले संस्थाले उपलब्ध गराएको राहतले बाढी प्रभावित परिवारलाई कठिन परिस्थितिमा ठूलो सहयोग पुग्ने विश्वास व्यक्त गर्नुभयो ।
प्रमुख कार्यकारी अधिकृत यादवसहितको टोलीले शुक्रबार धादिङ तथा धादिङतर्फबाट नुवाकोटका बाढी प्रभावित क्षेत्रको अवलोकन गरेको थियो । शनिबारदेखि भने टोलीले नुवाकोटको त्रिशूली क्षेत्रतर्फका प्रभावित स्थानमा पुगेर सदस्यहरूको अवस्था बुझ्दै नगद राहत उपलब्ध गराइरहेको छ ।
संस्थाले बाढीबाट प्रभावित सदस्यहरूलाई क्षतिको अवस्थाका आधारमा राहत रकम उपलब्ध गराएको छ । घरमा क्षति पुगेको र परिवारका सदस्य हराइरहेको अवस्थामा ३० हजार रुपैयाँ, परिवारका सदस्य हराइरहेको अवस्थामा २५ हजार रुपैयाँ, घरमा क्षति पुगेको अवस्थामा २० हजार रुपैयाँ तथा बाढीबाट प्रभावित अन्य सदस्यलाई ५ हजार रुपैयाँ नगद राहत उपलब्ध गराइएको संस्थाले जनाएको छ । सदस्यहरूलाई राहत उपलब्ध गराउन करिब ५० लाख रुपैयाँ खर्च हुने संस्थाको अनुमान छ ।
यसअघि पनि नेशनल लघुवित्त वित्तीय संस्था लिमिटेडले भोटेकोसी–त्रिशूली बाढी प्रभावित क्षेत्रमा खोज तथा उद्धार, राहत वितरण र पुनःउत्थानका लागि सरकारलाई ७० लाख रुपैयाँ सहयोग उपलब्ध गराइसकेको छ ।
