28.12¡ÆC
काठमाडौँ । चिनियाँ प्राविधिकले परीक्षण सम्पन्न गरेपछि चार दिनपछि रसुवागढी नाकाको मितेरी पुलबाट गाडी सञ्चालन हुन थालेका छन् ।
नेपालको उत्तरी नाका रसुवागढीमा रहेको मितेरी पुलबाट आवागमन २ दिनका लागि रोकिने भनिएकामा पुल परीक्षण गरी ४ दिनपछि सञ्चालनमा ल्याइएको हो ।
गएको वर्षको असार २४ गते ल्हेन्दे खोलामा आएको बाढीले सिमेन्टको मेसिनरी पुल बगाएपछि तत्काल आवतजावतका लागि बेलीब्रिज निर्माण गरिएको थियो । बेलीब्रिज वर्षायामका लागि उपयुक्त छ/छैन भन्ने परीक्षणका लागि चिनियाँ पक्षले गाडी सञ्चालनमा रोक लगाएको थियो ।
पुलको सफलतापूर्वक परीक्षण सम्पन्न गरी गाडी आवागमन हुन थालेका इलाका प्रहरी कार्यालय टिमुरेले जनाएको छ । पुलको परीक्षण गर्नुका साथै नटलाई पुनः कस्ने काम सम्पन्न गरेपछि सामान आयातका लागि २२ वटा कन्टेनरसहित साना तथा ठूला गाडीहरु हिजैदेखि केरूङ प्रस्थान गरेका जिल्ला प्रहरी प्रमुख अशोक थापाले जानकारी दिनुभयो ।
चीनबाट स्याउ, सुन्तला, अङ्गुर, ड्रागनफ्रुट बोकेका सानाठूला ३३ वटा गाडी नेपाल भित्रिएका प्रहरी प्रमुख थापाले जानकारी दिनुभयो । पुलको क्षमतालाई मध्यनजर गर्दै १४ फिटभन्दा माथि उचाइ भएका सामान ल्याउने गाडी सञ्चालन गर्न नमिल्ने चिनियाँ प्राविधिकले बताएकाले त्यही अनुसार सचेत रहन सरोकार भएका सबैलाई उहाँले आग्रह गर्नुभयो ।
उहाँका अनुसार नेपाल र चीनतर्फका दुवै भागमा १४ फिट लामो डण्डी गाडिएको छ ।
