25.05¡ÆC
नुवाकोट । किस्पाङ गाउँपालिका वडा नं ५ शान्तिबजारमा सोमबार राती लागेको आगलागीले करीब ७० लाख रुपैयाँ बराबरको धनसम्पत्ति जलेर नष्ट भएको छ । सोमबार राती करीब १० बजेको समयमा विपना घलेको घरमा आगलागी हुदाँ उहाँले सञ्चालन गर्दै आएको पसलमा रहेका सरसामाग्रीहरु, नगद रुपैयाँ सहितको धनमाल जलेर नष्ट भएको हो ।
जिल्ला प्रहरी कार्यलय नुवाकोटका प्रहरी नायव उपरीक्षक इकबाल हवारीको अनुसार रातको समयमा घरधनी विपना घले आफ्नो बालबच्चाहरु सहित निदाएको अबस्थामा उहाँले सञ्चालन गर्दै आएको पसलबाट सुरु भएको आगलागीले पसल सहित घरमा रहेको धनसम्पत्ति जलेर पूर्ण रुपमा नष्ट भएको छ ।
आगो लागे लगत्तै स्थानीयबासी, प्रहरी सहित विदुर नगरपालिकाको दमकलको प्रयोग गरेर करीब दुईघण्टाको प्रयासमा नियन्त्रणमा लिएपनि विपना घलेको घर र उहाँले सञ्चालन गर्दै आएको पसलको सामाग्रिहरु जलेर नष्ट भएको छ । सटर बन्द गरिएको पसलभित्रबाट आगो सुरु भएकाले आगलागीको कारण विद्युतीय गढबढीबाट हुनसक्ने प्रहरीले अनुमान गरेको छ ।
आगलागीमा परेर पसलमा रहेको नगद रुपैयाँ ९ लाख ७५ हजार सहित विपना घलेको भएभरको धनसम्पत्ति सोमबार राती छिनभरमा नै क्षति भएको हो ।
एकल महिला र नाबालक बालबच्चाको साथमा ब्यावसाय गरेर जीवन गुजार्दै आउनुभएका उहाँ अहिले घरबार बिहीन अबस्थामा पुग्नुभएको छ । आगलागीबाट ढलान गरिएको घरका सिमेन्टहरु समेत जलेर रड देखिएसगँ प्रवलिकरण गर्नुपर्ने भएको छ ।
घर र पसलको सरसामाग्रि, लत्ताकपडा, भाडावर्तन सहितका सामानहरु जलेर नष्ट भएसगैँ नाबालक बालबच्चा हुर्काउदै आउनुभएका उहाँले आफ्नो भएभरको सम्पत्ति सकिएकाले सहयोगको लागी सरकारी निकाय एंव दाताहरुसंग आब्हान गर्नुभएको छ । उहाँले वडा नं ५ को कार्यालय, किस्पाङ गाउँपालिकाको कार्यालय, जिल्ला प्रशासन कार्यालय नुवाकोट र प्रहरी कार्यालय नुवाकोटमा निवेदन दिएर राहत तथा सहयोगको अपिल गर्नुभएको हो ।
आफन्त एंव स्थानीय समाजसेवीहरुको सहयोगमा उहाँको परिवारलाई तत्कालै राहत एंव सहयोग सामाग्रि जुटाउनको लागी सम्बन्धित निकाय एंव दाताहरुसंग पहल थालिएको निलकण्ठ माध्यमिक विद्यायलका शिक्षक गणेश श्रेष्ठले जानकारी दिनुभयो ।
