22.78¡ÆC
नुवाकोेट । तारकेश्वर गाउँपालिकाको प्रवर्धनमा नेपाल स्पोर्ट्स सेन्टर (नेकोस) ले वडा नम्बर ३ को पिमलडाँडा माविमा सञ्चालन गरेको दुई दिने सेल्फ डिफेन्स तालिम आज सम्पन्न भयो ।
तालिमको समापन सत्रलाई सम्बोधन गर्दै गाउँपालिका अध्यक्ष शिव अधिकारी अविरलले जुनसुकै व्यक्तिका लागि आवश्यक पर्दा आफ्नो रक्षा आफैं गर्न सक्ने सीप र कला आवश्यक रहेको उल्लेख गर्दै विशेषगरी किशोर किशोरीहरूका लागि यस्ता आत्मरक्षाको कार्यक्रमको विशेष महत्व रहने बताउनुभयो ।
यो एक सुरुवात मात्रै भएको बताउँदै उहाँले यस्ता तालिमका कार्यक्रमहरू क्रमशः सबै विद्यालयमा सञ्चालन गरिने बताउनुभयो ।
कार्यक्रममा नेकोसकी मुख्य प्रशिक्षक राधिका हमालसँगै सहायक प्रशिक्षकका रूपमा तारकेश्वर गाउँपालिकाकै स्थानीय समाजसेवी, राजनीतिकर्मी एवं महिला सशक्तीकरण अभियन्ता सरु अधिकारी ढुङ्गाना र नेकोसकी सहायक प्रशिक्षक मनिषा राणाभाटले विद्यालयका शिक्षक शिक्षिका र कक्षा ९ र १० का छात्र-छात्रालाई आत्मरक्षाको प्रशिक्षण दिनुभएको थियो । प्रशिक्षणमा ४० जना छात्रछात्रा र शिक्षकहरू सहभागी हुनुहुन्थ्यो ।
अध्यक्ष अधिकारीले यो अत्यन्तै उपयोगी तालिम सफलतापूर्वक सम्पन्न गरेकोमा आयोजक संस्था नेकोस र तालिममा सहभागी प्रशिक्षकहरूप्रति आभार प्रकट गर्नुभयो ।
