22.12¡ÆC
नुवाकोट । तारकेश्वर गाउँपालिकाले वैशाख ७ गते सोमबारदेखि ११ गते शुक्रबारसम्म सबै वडामा सामाजिक सुरक्षा भत्ता (वृद्धभत्ता) वितरणसँगै निःशुल्क स्वास्थ्य परीक्षण, औषधी वितरण र स्वास्थ्य परामर्श सेवा प्रदान गर्ने भएको छ ।
‘गाउँपालिका अध्यक्षसँग ज्येष्ठ नागरिक कार्यक्रम’ अन्तर्गत सञ्चालन हुने यस अभियानले ज्येष्ठ नागरिकलाई घरदैलोमै सहज सेवा उपलब्ध गराउने लक्ष्य लिएको छ ।
गाउँपालिका अध्यक्ष शिव अधिकारी ‘अविरल’ले कार्यक्रमलाई प्रभावकारी, व्यवस्थित र गुनासोमुक्त बनाउन पञ्जीकरण शाखा र स्वास्थ्य शाखालाई आवश्यक निर्देशन दिनुभएको छ ।
यसअघि भत्ता वितरणमा हुने ढिलाइ र ज्येष्ठ नागरिकले भोग्नुपरेका झन्झट अन्त्य गर्ने उद्देश्यले अध्यक्ष अधिकारीले निर्वाचित भएलगत्तै प्रत्येक ३/३ महिनामा वडा–वडामा पुगेर स्वास्थ्य सेवा सहित भत्ता वितरण गर्ने अभ्यास सुरु गर्नुभएको थियो ।
यस कार्यक्रमबाट ज्येष्ठ नागरिकहरूले आफ्नै वडामै स्वास्थ्य जाँच, औषधी तथा परामर्श सेवा लिनुका साथै भत्ता पनि सहज रूपमा प्राप्त गर्नेछन् ।
कार्यक्रमको तालिका यसप्रकार छ :
वैशाख ७ गते सोमबार बिहान ८ बजेदेखि दिउँसो २:३० बजे सम्म :- ५ नं. वडा कार्यालय, गोर्स्याङ
वैशाख ८ गते मङ्गलबार बिहान ८ बजेदेखि दिउँसो २:३० बजे सम्म :- ६ नं. वडा कार्यालय, मजुवा
वैशाख ९ गते बुधबार र १० गते बिहीबार बिहान ९ बजेदेखि दिउँसो ४ बजे सम्म :- १ नं. वडा कार्यालयसँगैको हिमालयन बैंक, दाङसिङ
वैशाख ९ गते बुधबार बिहान ८ बजेदेखि दिउँसो २:३० बजे सम्म :- ३ नं वडा कार्यालय, तारुका
वैशाख १० गते बिहीबार बिहान ८ बजेदेखि दिउसो २:३० बजेसम्म :- ४ नं वडा कार्यालय, बुधसिंह
वैशाख ११ गते शुक्रबार बिहान ८ बजेदेखि दिउसो २:३० बजेसम्म :- २ नं वडा कार्यालय, तारुका
