13.12¡ÆC
काठमाडौँ । सरकारले चीनतर्फका थप नाका खुलाउने गरि गृहकार्य गरेको छ । कोरोला, किमाथाङ्कासहितका नाकाहरू खुलाउनका लागि गृहकार्य थालेको भन्सारका विभागका महानिर्देशक श्यामप्रसाद भण्डारीले बताउनुभयो ।
उहाँका अनुसार तातोपानी र रसुवागढी नाकामा बर्खायाममा निकै समस्या आउन थालेपछि वैकल्पिक नाकाहरूमा संरचना तयार गरेर भन्सार विन्दुहरू विस्तार गर्ने काम भइरहेको हो ।
रसुवा नाका गएको असार २६ गतेको बाढीले बन्द भएको थियो । तातोपानीमा पनि पहिरो गएर बाटो अवरुद्ध हुँदा बर्खायाममा नियमित सञ्चालनमा आउन सकेन ।
वैकल्पिक रूपमा कोरोला नाका सञ्चालनमा ल्याइएको थियो । त्यहाँ कुनै क्वारेनटाइनहरू थिएन तर पनि नाकामा आसिकुडा सिस्टम लागू गराएर भन्सारबाट सामान जाँचपास हुने व्यवस्था मिलाइएको थियो ।
त्यति बेला जुत्ताचप्पलदेखि विद्युतीय गाडीहरू ठूलो परिणाममा कोरोला नाका हुँदै व्यवसायीहरूले भित्र्याएका थिए । कोरोला नाका हुँदै दुई हजारभन्दा धेरै विद्युतीय गाडी जाँचपास गरेर व्यवसायीहरूले भित्र्याएका थिए । एक सय १७ वटा कन्टेनरबाट १९ करोड रुपैयाँ बराबरको निकासी भएको थियो ।
दशैँ लक्षित समानहरू ल्याउन महत्त्वपूर्ण बनेको कोरोला नाकामा थप सुविधा सम्पन्न पूर्वाधारहरू बनाएर सञ्चालनमा ल्याउन लागिएको हो । ओलाङचुङगोला, किमाथाङ्का लगायतका नाकाहरूका चीनतर्फ सडक पूर्वाधारहरू बनिसकेका छन् । नेपालतर्फ त्यस्ता पूर्वाधार बनाएर सञ्चालनमा ल्याउन सकिन्छ ।
