18.47¡ÆC
जनकपुरधाम । सोमबार रातिदेखिको अबिरल वर्षाका कारण कमला खोलामा बाढी आएको छ । कमला नदीमा आएको बाढीले धनुषातर्फको बाँध कटान सुरु गरेको छ । बाढीले सबैला नगरपालिका–१३ स्थित किरतपुरमा नदीको पश्चिमतर्फको बाँध कटान गरिरहेको छ ।
कमला नदी नियन्त्रण आयोजना कार्यालयका प्रमुख एकराज भट्टराईका अनुसार चौडाइमा करिब ८० प्रतिशत कटान भइसकेको छ भने लम्बाइमा चार सय मिटर कटान भएको छ । बाढीले नदीको ६ सय मिटर बाँध जोखिममा छ । मंगलबार बिहानको निरीक्षणपछि बाँध जोगाउने काम सुरु भएपनि अझै (मंगलबार साँझसम्म) नियन्त्रण हुन सकेको छैन । बाँध मर्मतका लागि नेपाली सेना, सशस्त्र प्रहरी र स्थानीयले काम गरिरहेका छन् ।
कार्यालय प्रमुख भट्टराईले भने, “सकारले चालु वर्षमा मर्मत सम्भार गर्न पैसा नै दिएन । बाँकी स्थानीय र प्रदेश सरकारले आश्वासन मात्रै दिन्छ । संघ सरकारले ५० लाख दिने कुरा गरेको छ । तर, अधिकारिक रूपमा आएको छैन् ।”
बाढीका कारण हुनसक्ने सम्भावित जोखिमबाट स्थानीयहरूलाई सतर्क गराइएको छ । बाँध कटान गर्न थालेपछि धनुषाका पूर्वीक्षेत्रका गाउँहरू जोखिममा परेका छन् । खोलामा बाढी आएपछि स्थानीयहरू त्रसित बनेका छन् । बाढीले धनुषाको सबैला नगरपालिका, शहीदनगर नगरपालिका, कमला नगरपालिका र जनकनन्दनी गाउँपालिकाका गाउँहरू डुबानमा पर्ने जोखिम बढेको छ ।
बाढीका कारण डुबान हुनसक्ने क्षेत्रमा प्रहरी परिचालन गरी स्थानीयलाई सतर्क गराइएको धनुषाका प्रमुख जिल्ला अधिकारी बन्धु प्रसाद बास्तोलाले बताए ।
